ಬಾದಾಮಿ ಸೂಪ್ ಕುಡಿದರೆ ರೂಪದರ್ಶಿಯ ಮೈಕಟ್ಟು

Drinks

oi-Reena

By Hema S

Published: Tuesday, January 10, 2012, 17:31 [IST]

ಬಾದಾಮಿಯಲ್ಲಿ ಅಧಿಕ ಪೋಷಕಾಂಶಗಳಿರುವುರಿಂದ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ಕಟ್ಟು ನಿಟ್ಟಿನ ಡಯಟ್ ಮಾಡುವವರಿಗೆ ಬಾದಾಮಿ ಹೆಚ್ಚು ಸೂಕ್ತ. ಏಕೆಂದರೆ ಇದರ ಸೇವನೆ ಆರೋಗ್ಯಕ್ಕೂ ಒಳ್ಳೆಯದು, ದೇಹದ ತೂಕ ಕೂಡ ಕಡಿಮೆಯಾಗುತ್ತದೆ. ಆದರೆ ದಿನವೂ ಬಾದಾಮಿಯನ್ನು ಹಾಗೆ ತಿಂದು ಬೋರಾಗಿದ್ದರೆ ಅದರ ಸೂಪ್ ಮಾಡಿ ಕುಡಿಯಬಹುದು. ರುಚಿಕರವಾಗಿರುವ ಈ ಸೂಪ್ ಕುಡಿದರೆ ಹೊಟ್ಟೆ ತುಂಬುವುದರ ಜೊತೆಗೆ ದೇಹದ ತೂಕ ಕೂಡ ಕಡಿಮೆಯಾಗುತ್ತದೆ.

ಬೇಕಾಗುವ ಸಾಮಾಗ್ರಿಗಳು:
* 1/2 ಕಪ್ ಬಾದಾಮಿ
* 1 ಕಪ್ ಹಾಲು
* ರುಚಿಗೆ ತಕ್ಕಷ್ಟು ಉಪ್ಪು
* 2 ಚಮಚ ಚಿಕ್ಕದಾಗಿ ಕತ್ತರಿಸಿದ ಬಾದಾಮಿ
* 1 ಚಮಚ ಕಾರ್ನ್ ಹಿಟ್ಟು
* 1 ಚಮಚ ಕರಿಮೆಣಸಿನ ಪುಡಿ

ಮಾಡುವ ವಿಧಾನ:

1. ಬಾದಾಮಿಯನ್ನು ಚೆನ್ನಾಗಿ ಪುಡಿ ಮಾಡಿ ಅದರಲ್ಲಿ 1/2 ಕಪ್ ಹಾಲು ಹಾಕಿ ಮಿಶ್ರಣ ಮಾಡಬೇಕು.

2. ಬಾಣಲೆಯನ್ನು ಬಿಸಿ ಮಾಡಿ ಉಳಿದ 1/2 ಕಪ್ ಹಾಲು ಹಾಕಿ ಅದಕ್ಕೆ ಕಾರ್ನ್ ಹಿಟ್ಟು ಸೇರಿಸಿ, ಈ ಹಿಟ್ಟು ಹಾಲಿನಲ್ಲಿ ಕರಗುವರೆಗೆ ತಿರುಗಿಸಬೇಕು.

3. ನಂತರ ಈ ಮಿಶ್ರಣಕ್ಕೆ ಮೊದಲೇ ತಯಾರಿಸಿಟ್ಟದ್ದ ಹಾಲು ಮತ್ತು ಬಾದಾಮಿ ಮಿಶ್ರಣವನ್ನು ಸೇರಿಸಿ ಸ್ವಲ್ಪ ಗಟ್ಟಿಯಾಗುವರೆಗೆ ಮಿಕ್ಸ್ ಮಾಡಬೇಕು. ನಂತರ ಗ್ಯಾಸ್ ಆಫ್ ಮಾಡಿ ಈ ಮಿಶ್ರಣವನ್ನು ಸ್ವಲ್ಪ ತಣ್ಣಗಾಗಲು ಬಿಡಬೇಕು.

3. ಈಗ ರುಚಿಗೆ ತಕ್ಕ ಉಪ್ಪು ಮತ್ತು ಕರಿಮೆಣಸಿನ ಪುಡಿಯನ್ನು ಬೆರೆಸಿ, ಅದಕ್ಕೆ ಕತ್ತರಿಸಿದ ಬಾದಾಮಿ ಚೂರುಗಳನ್ನು ಹಾಕಿದರೆ ಬಾದಾಮಿ ಸೂಪ್ ರೆಡಿ.