ಮುದ್ದು ಮಗಳಿಗೆ ಇಷ್ಟದ ಚಟ್ನಿಪುಡಿ ಹೀಗೆ ಮಾಡ್ತಿನಿ

Chutney

oi-Reena

By ರತ್ನ, ಹಾಸನ

Published: Wednesday, February 1, 2012, 17:39 [IST]

ಮಗಳು ಬೆಂಗಳೂರಲ್ಲಿ ಇದ್ದಾಳೆ. ತಿಂಗಳಿಗೊಮ್ಮೆ ಬಂದಾಗ ಚಟ್ನಿ ಪುಡಿ ರೆಡಿ ಮಾಡು ಅಂತಾಳೆ. ಅದರಲ್ಲೂ ಅವಳಿಗೆ ನಾನು ಮಾಡೋ ಉದ್ದಿನ ಬೇಳೆ ಚಟ್ನಿಪುಡಿ ತುಂಬಾ ಇಷ್ಟ. ಹಾಸ್ಟೇಲ್ ಮೇಟುಗಳೆಲ್ಲ ಅದನ್ನು ಹೊಗಳುತ್ತಾರೆ ಎಂದು ಮಗಳೇ ಎಷ್ಟೋ ಸಾರಿ ಪೂಸಿ ಹೊಡೆದು ಹೆಚ್ಚು ಹೆಚ್ಚು ಪಾರ್ಸೆಲ್ ಮಾಡಿಸಿಕೊಳ್ಳುತ್ತಾಳೆ.

ಉದ್ದಿನ ಬೇಳೆ ಚಟ್ನಿ ಪುಡಿ ತಯಾರಿಸುವುದು ಬ್ರಹ್ಮ ವಿದ್ಯೇಯೆನಲ್ಲ. ತಯಾರಿಸುವುದು ತುಂಬಾ ಸುಲಭ. ಇದನ್ನು ಒಮ್ಮೆ ಮಾಡಿಟ್ಟರೆ ತುಂಬಾ ಕಾಲದವರೆಗೆ ಬಳಸಬಹುದಾಗಿದೆ. ಊಟದ ಜೊತೆ ಉಪ್ಪಿನಕಾಯಿ ಮಾತ್ರ ಸಾಲದು ಅದರ ಜೊತೆ ಸ್ವಲ್ಪ ಚಟ್ನಿ ಪುಡಿ ಇದ್ದರೆ ಒಂದು ಹಿಡಿ ಅನ್ನ ಜಾಸ್ತಿನೇ ಸೇರುತ್ತದೆ. ಚಟ್ನಿ ಪುಡಿಯನ್ನು ಅನೇಕ ಬಗೆಯಲ್ಲಿ ತಯಾರಿಸಬಹುದು. ಉದ್ದಿನ ಬೇಲೆ ಚಟ್ನಿಪುಡಿ ಹೀಗೆ ಮಾಡಿರಿ.

ಬೇಕಾಗುವ ಸಾಮಾಗ್ರಿಗಳು:
* 1/4 ಕೆ ಜಿ ಕಡಲೆ ಬೇಳೆ
* 1/4 ಕೆಜಿ ಉದ್ದಿನ ಬೇಳೆ
* 60 ಗ್ರಾಂ ಬ್ಯಾಡಗಿ ಮೆಣಸು
* ಉಪ್ಪು ( ರುಚಿಗೆ ತಕ್ಕಷ್ಟು)
* 1 ಕಟ್ಟು ಕೊತ್ತಂಬರಿ ಸೊಪ್ಪು
* ಸ್ವಲ್ಪ ಕರಿಬೇವಿನ ಸೊಪ್ಪು
* ಇಂಗು, ಸಾಸಿವೆ( ಒಗ್ಗರಣೆ)
* ಬೆಲ್ಲ, ಸಕ್ಕರೆ( ರುಚಿಗೆ)
* ಹುಣಸೆಹಣ್ಣು

ತಯಾರಿಸುವ ವಿಧಾನ:

1. ಮೆಣಸು. ಕಡಲೆ ಬೇಳೆ, ಉದ್ದಿನ ಬೇಳೆಯನ್ನು ಚೆನ್ನಾಗಿ ಎಣ್ಣೆ ಹಾಕದೆ ಹಾಗೇ ಹುರಿಯಬೇಕು.

2. ಕೊತ್ತಂಬರಿ ಮತ್ತು ಕರಿಬೇವಿನ ಸೊಪ್ಪು ಹುರಿಯಿರಿ.

3. ಮೇಲಿನ ಸಾಮಾಗ್ರಿಗಳ ಜೊತೆ ಸ್ವಲ್ಪ ಹುಣಸೆ ಹಣ್ಣು, ಸ್ವಲ್ಪ ಬೆಲ್ಲ ಅಥವಾ ಸಕ್ಕರೆ ಮತ್ತು ರುಚಿಗೆ ತಕ್ಕ ಉಪ್ಪು ಹಾಕಿ ಪುಡಿ ಮಾಡಿ.( ಖಾರ ಬೇಕೆಂದರೆ ಬೆಲ್ಲ ಕಡಿಮೆ ಹಾಕಿ)

4. ನಂತರ ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ ಅದಕ್ಕೆ ಇಂಗು ಮತ್ತು ಸಾಸಿವೆ ಹಾಕಿ ನಂತರ ಪುಡಿ ಬೆರೆಸಿ 1 ನಿಮಿಷ ಸೌಟ್ ನಿಂದ ಅಲುಗಾಡಿಸಿ ನಂತರ ಗ್ಯಾಸ್ ಆಫ್ ಮಾಡಿ ಚಟ್ನಿಪುಡಿ ಆರಲು ಇಡಬೇಕು.

5. ತಯಾರಾದ ಚಟ್ನಿ ಪುಡಿಯನ್ನು ಡಬ್ಬದಲ್ಲಿ ತುಂಬಿಡಿ.