ಹೆರಿಗೆಯ ನಂತರ ಅವಶ್ಯಕವಾದ ವಿಟಮಿನ್ಸ್

ಗರ್ಭಿಣಿಯಾಗಿರುವಾಗ ಕಬ್ಬಿಣದಂಶ, ಕ್ಯಾಲ್ಸಿಯಂ, ಪ್ರೊಟೀನ್, ಫಾಲಿಕ್ ಆಸಿಡ್ ಈ ರೀತಿಯ ಅಂಶಗಳು ಎಷ್ಟು ಮುಖ್ಯವೋ ಅದೇ ರೀತಿ ಹೆರಿಗೆಯಾದ ನಂತರ ಕೂಡ ಕೆಲವೊಂದು ವಿಟಮಿನ್ ಗಳ ಕೊರತೆಯಾಗದಂತೆ ನೋಡಿಕೊಳ್ಳಬೇಕು. ಇಲ್ಲದಿದ್ದರೆ ಖಿನ್ನತೆ ಕಾಣಿಸುವುದು. ಬೆನ್ನು ನೋವು, ಸೊಂಟ ನೋವಿನಂತಹ ಕಾಯಿಲೆಗಳು ಕಂಡು ಬರುತ್ತವೆ.

ಮಗುವಿಗೆ ಎದೆ ಹಾಲು ಕುಡಿಯುವವರೆಗೆ ಅಧಿಕ ಪೋಷಕಾಂಶದ ಅಗತ್ಯವಿರುತ್ತದೆ. ತಾಯಿ ಮತ್ತು ಮಗುವಿನ ಆರೋಗ್ಯಕ್ಕೆ ಅಗತ್ಯವಾದ ಪೋಷಕಾಂಶವನ್ನು ತಾಯಿ ತಿನ್ನಬೇಕಾಗುತ್ತದೆ. ಅದರಲ್ಲೂ ಈ ಕೆಳಗಿನ ವಿಟಮಿನ್ ಗಳಿರುವ ಆಹಾರದ ಕಡೆ ಹೆಚ್ಚು ಗಮನ ಕೊಡಬೇಕು.

ವಿಟಮಿನ್ ಬಿ 9: ಈ ವಿಟಮಿನ್ ಇರುವ ಮಾತ್ರೆಯನ್ನು ಗರ್ಭಿಣಿಯರು ಮಗು ಆರೋಗ್ಯಕರವಾಗಿ ಬೆಳವಣಿಗೆಯಾಗಲು ತಿನ್ನಬೇಕು. ಹೆರಿಗೆಯ ನಂತರ ಸ್ವಲ್ಪ ಕಾಲದವರೆಗೆ ಈ ಮಾತ್ರೆಯನ್ನು ತಿನ್ನಿ. ಇದರಿಂದ ಬಾಣಂತಿಯರ ಆರೋಗ್ಯ ವೃದ್ಧಿಸುವುದು.

ವಿಟಮಿನ್ ಎ: ಹೆರಿಗೆಯ ನಂತರ ಮಹಿಳೆಯರಲ್ಲಿ ತುಂಬಾ ಕೂದಲು ಉದುರುವ ಸಮಸ್ಯೆ ಕಂಡು ಬರುತ್ತದೆ. ಕೂದಲು ಉದುರುವುದನ್ನು ತಡೆಯಲು ವಿಟಮಿನ್ ಎ ಇರುವ ಆಹಾರಗಳನ್ನು ತಿನ್ನಬೇಕು.

ವಿಟಮಿನ್ ಸಿ: ಈ ವಿಟಮಿನ್ ಎದೆ ಹಾಲು ಕಮೊಡುತ್ತಿರುವ ತಾಯಿಗೆ ಅವಶ್ಯ. ಇದು ದೇಹದಲ್ಲಿ ರೋಗ ನಿರೋಧಕ ಸಾಮರ್ಥ್ಯವನ್ನು ಹೆಚ್ಚಿಸುತ್ತದೆ.

ವಿಟಮಿನ್ ಡಿ: ಹೆರಿಗೆಯ ಸಮಯದಲ್ಲಿ ತುಂಬಾ ಕ್ಯಾಲ್ಸಿಯಂ ನಷ್ಟವಾಗುತ್ತದೆ. ಹೆರಿಗೆಯ ನಂತರ ಕ್ಯಾಲ್ಸಿಯಂ ಕೊರತೆಯನ್ನು ನೀಗಿಸಲು ಕ್ಯಾಲ್ಸಿಯಂ ಜೊತೆ ವಿಟಮಿನ್ ಡಿ ಇರುವ ಆಹಾರ ತಿನ್ನಬೇಕು. ಏಕೆಂದರೆ ವಿಟಮಿನ್ ಡಿ ಕೊರತೆ ಉಂಟಾದರೆ ದೇಹವು ಕ್ಯಾಲ್ಸಿಯಂ ಅನ್ನು ಹೀರಿಕೊಳ್ಳುವುದಿಲ್ಲ.

ವಿಟಮಿನ್ ಇ: ಇದು ಜೀವ ಕಣದಲ್ಲಿ ಹಾನಿ ಉಂಟಾಗಿದ್ದರೆ ಅವುಗಳನ್ನು ಸರಿಪಡಿಸುತ್ತದೆ, ದೇಹಕ್ಕೆ ಶಕ್ತಿಯನ್ನು ತುಂಬುತ್ತದೆ.