ಸಿಸೇರಿಯನ್ ನಂತರ ಪೋಷಣೆ ಹೇಗಿರಬೇಕು?

ಹೆರಿಗೆ ನಂತರ 2 ತಿಂಗಳು ಬೆಡ್ ರೆಸ್ಟ್ ತೆಗೆದುಕೊಳ್ಳುವುದು ಅನಿವಾರ್ಯ. ಇದರ ಹೊರತಾಗಿಯೂ ಸಿಸೇರಿಯನ್ ನಂತರ ಇನ್ನಿತರ ಕಾಳಜಿ ಮಾಡಬೇಕಾಗುತ್ತದೆ. ಅದು ಹೇಗೆಂದು ಇಲ್ಲಿ ತಿಳಿದುಕೊಳ್ಳಿ.

ಸಿಸೇರಿಯನ್ ನಂತರ ಕಾಳಜಿ ಹೇಗೆ?

* ಸಿಸೇರಿಯನ್ ಗಾಯ: ಸಿಸೇರಿಯನ್ ಹೆರಿಗೆ ಮಾಡಿದಾಗ ಹೊಲಿಗೆ ಹಾಕುವುದರಿಂದ ಆ ಗಾಯ ಮಾಸಲು ಕಾಲ ತೆಗೆದುಕೊಳ್ಳುತ್ತದೆ. ಆದ್ದರಿಂದ ವೈದ್ಯರು ಸೂಚಿಸಿದಂತೆ ಕೆಲವು ದಿನ ಸ್ನಾನವನ್ನು ಮಾಡಬಾರದು. ಗಾಯಕ್ಕೆ ನೀರು ಬಿದ್ದರೆ ಸೋಂಕು ಹೆಚ್ಚಾಗುವ ಸಾಧ್ಯತೆ ಇರುವುದರಿಂದ ಗಾಯ ಇನ್ನಷ್ಟು ಉಲ್ಬಣಗೊಳ್ಳುತ್ತದೆ. ಈ ಸಮಯದಲ್ಲಿ ಹೆಚ್ಚು ಬಿಗಿ ಬಟ್ಟೆಗಳನ್ನು ಧರಿಸಬಾರದು. ಕಾಟನ್ ಬಟ್ಟೆಗಳನ್ನು ಧರಿಸಿದರೆ ಉತ್ತಮ.

* ಡ್ರೆಸಿಂಗ್: ಸಿಸೇರಿಯನ್ ನಂತರ ಸ್ನಾನ ಮಾಡುವುದು ಸ್ವಲ್ಪ ಕಷ್ಟವೆನಿಸುತ್ತದೆ. ಆದರೆ ಗಾಯಕ್ಕೆ ವಾರಕ್ಕೊಮ್ಮೆ ಡ್ರೆಸಿಂಗ್ ಮಾಡಿಸಿಕೊಳ್ಳಬೇಕು. ಹೊಲಿಗೆ ತೆಗೆದ ನಂತರ ವೈದ್ಯರು ಸ್ನಾನ ಮಾಡಲು ಸಲಹೆ ನೀಡಿದರೆ, ಸ್ನಾನ ಮಾಡಿದ ನಂತರ ಹತ್ತಿಯಿಂದ ಅಥವಾ ಹತ್ತಿ ಬಟ್ಟೆಯಿಂದ ಗಾಯದ ಜಾಗವನ್ನು ನಿಧಾನಕ್ಕೆ ಒರೆಸಿಕೊಳ್ಳಬೇಕು.

* ನಿಧಾನ ನಡಿಗೆ: ಸಿಸೇರಿಯನ್ ಆದ ಕೆಲವು ದಿನಗಳ ತನಕ ನಿಧಾನವಾಗಿ ನಡೆಯಬೇಕು. ಇದು ತುಂಬಾ ಮುಖ್ಯ. ತುಂಬಾ ಜೋರಾಗಿ ನಡೆಯಬಾರದು. ಸಿಸೇರಿಯನ್ ಆದ 4-6 ವಾರಗಳವರೆಗೂ ಜಾಗರೂಕವಾಗಿ ನಡೆಯಬೇಕು.

* ಆಹಾರ ನಿಯಮ: ಸಮತೋಲನ ಆಹಾರದ ಹೊರತಾಗಿಯೂ ವಿಟಮಿನ್ ಸಿ ಹೆಚ್ಚಿರುವ ಆಹಾರ ಈ ಸಮಯದಲ್ಲಿ ಹೆಚ್ಚು ಅವಶ್ಯಕವಿರುತ್ತದೆ. ಇದು ಗಾಯ ಬೇಗ ಗುಣವಾಗಲು ಸಹಾಯ ಮಾಡುತ್ತದೆ. ಬ್ರೊಕೊಲಿ, ಆಸ್ಪರಾಗಸ್, ಪಾಲಾಕ್, ಮೊಳಕೆ ಕಾಳುಗಳು, ಬಟಾಣಿ, ಕಿತ್ತಳೆ, ದ್ರಾಕ್ಷಿ ಮುಂತಾದುವು ಇರಲಿ. ಎಣ್ಣೆ ಮತ್ತು ಖಾರದ ಪದಾರ್ಥಗಳನ್ನು ಕನಿಷ್ಠ 20 ದಿನಗಳವರೆಗಾದರೂ ದೂರವಿಡಬೇಕು. 6-8 ತಿಂಗಳು ಹೆಚ್ಚು ಭಾರದ ಪದಾರ್ಥಗಳನ್ನು ಎತ್ತಲೇಬಾರದು.