ಸುಪ್ರೀಂ ಕೋರ್ಟ್ ವಿಶೇಷ ಲೋಕ್ ಅದಾಲತ್: ವಿಚ್ಛೇದನ, ಕಸ್ಟಡಿ ಸಮಸ್ಯೆಗಳಿಗೆ ಇಲ್ಲಿದೆ ಸುಲಭ ಪರಿಹಾರ!

ಇಂದಿನಿಂದ, ಅಂದರೆ ಆಗಸ್ಟ್ 21ರಿಂದ 23ರವರೆಗೆ ಸುಪ್ರೀಂ ಕೋರ್ಟ್‌ನಲ್ಲಿ 'ವಿಶೇಷ ಲೋಕ್ ಅದಾಲತ್' ನಡೆಯಲಿದೆ. ಸುಪ್ರೀಂ ಕೋರ್ಟ್‌ನಲ್ಲಿ ಬಾಕಿ ಇರುವ ಕುಟುಂಬ ವ್ಯಾಜ್ಯಗಳನ್ನು ಪರಸ್ಪರ ಸಮ್ಮತಿಯೊಂದಿಗೆ ಇತ್ಯರ್ಥಪಡಿಸಿಕೊಳ್ಳಲು ಇದು ಸುವರ್ಣಾವಕಾಶ. ಇದರಲ್ಲಿ ನೇರವಾಗಿ ಅಥವಾ ಹೈಬ್ರಿಡ್ (ಆನ್‌ಲೈನ್) ಮಾದರಿಯಲ್ಲೂ ಭಾಗವಹಿಸಬಹುದು. 'ಸಮಾಧಾನ ಸಮಾರೋಹ' ಅಡಿಯಲ್ಲಿ ವಿಶೇಷ ಪೀಠಗಳನ್ನು ರಚಿಸಲಾಗಿದೆ. ರಾಜಿ ಮಾಡಿಕೊಳ್ಳಲು ಸಿದ್ಧರಿರುವ ದಂಪತಿಗಳು ವಿಚ್ಛೇದನ, ಮಗುವಿನ ಅಭಿರಕ್ಷೆ (ಕಸ್ಟಡಿ) ಮತ್ತು ಜೀವನಾಂಶದ ವಿಷಯಗಳನ್ನು ಕೆಲವೇ ದಿನಗಳಲ್ಲಿ ಬಗೆಹರಿಸಿಕೊಳ್ಳಬಹುದು.

ಇದರಲ್ಲಿ ಭಾಗವಹಿಸಲು ಅರ್ಹತೆ ಅತ್ಯಂತ ಸರಳ. ನಿಮ್ಮ ಪ್ರಕರಣ ಸುಪ್ರೀಂ ಕೋರ್ಟ್‌ನಲ್ಲಿ ಬಾಕಿ ಇರಬೇಕು ಮತ್ತು ಅದು ಕುಟುಂಬ ವ್ಯಾಜ್ಯಕ್ಕೆ ಸಂಬಂಧಿಸಿರಬೇಕು. ಕೂಡಲೇ ನಿಮ್ಮ ಅಡ್ವೊಕೇಟ್-ಆನ್-ರೆಕಾರ್ಡ್ (AOR) ಅವರನ್ನು ಸಂಪರ್ಕಿಸಿ, ರಾಜಿ ಮಾಡಿಕೊಳ್ಳಲು ಇಬ್ಬರೂ ಸಿದ್ಧರಿದ್ದೇವೆ ಎಂದು ತಿಳಿಸಿ. ಎರಡೂ ಕಡೆಯವರ ಒಪ್ಪಿಗೆಯಿದ್ದರೆ ಹೆಚ್ಚುವರಿ ವಿಷಯಗಳನ್ನೂ ಇಂದೇ ಕೈಗೆತ್ತಿಕೊಳ್ಳಬಹುದು. ನೆರವಿಗಾಗಿ 011-23112428 ಅಥವಾ 011-23112528 ಸಂಖ್ಯೆಗೆ ಕರೆ ಮಾಡಬಹುದು ಅಥವಾ [email protected] ಗೆ ಇಮೇಲ್ ಕಳುಹಿಸಬಹುದು.

ಸುಪ್ರೀಂ ಕೋರ್ಟ್ ಲೋಕ್ ಅದಾಲತ್: ಬೇಕಾಗುವ ದಾಖಲೆಗಳು ಮತ್ತು ಸಮ್ಮತಿ ಪತ್ರದ ವಿವರ

ಆಧಾರ್, ಪಾನ್ ಕಾರ್ಡ್ ಮತ್ತು ಮದುವೆ ನೋಂದಣಿ ಪ್ರಮಾಣಪತ್ರದ ಪ್ರತಿಯನ್ನು ಸಿದ್ಧವಿಟ್ಟುಕೊಳ್ಳಿ. ಮಗುವಿನ ಕಸ್ಟಡಿಗೆ ಸಂಬಂಧಿಸಿದ ವಿಚಾರಗಳಿದ್ದರೆ ಮಗುವಿನ ಆಧಾರ್ ಕಾರ್ಡ್ ಮತ್ತು ಶಾಲಾ ಗುರುತಿನ ಚೀಟಿ ಅಗತ್ಯ. ಹಣಕಾಸು ವರ್ಗಾವಣೆಗಾಗಿ ಇತ್ತೀಚಿನ ಬ್ಯಾಂಕ್ ವಿವರಗಳು ಹಾಗೂ ಯುಪಿಐ (UPI) ವ್ಯವಸ್ಥೆ ಇರಲಿ. ಜೊತೆಗೆ ಎರಡು ಪಾಸ್‌ಪೋರ್ಟ್ ಸೈಜ್ ಫೋಟೋಗಳನ್ನು ತರಬೇಕು. ಒಂದು ಪುಟದ ಒಪ್ಪಂದದ ಕರಡನ್ನು ಸಿದ್ಧಪಡಿಸಿ. ಅದರಲ್ಲಿ ಈ ಸರಳ ಸಮ್ಮತಿ ವಾಕ್ಯಗಳಿರಲಿ: "ನಾವು ಪರಸ್ಪರ ಸಮಮತಿಯೊಂದಿಗೆ ವಿಚ್ಛೇದನಕ್ಕೆ ಸಮ್ಮತಿಸುತ್ತೇವೆ." "ಪೋಷಣೆ ರೂ. X ಪಾವತಿಗೆ ಒಪ್ಪುತ್ತೇವೆ." "ಮಗು Yರ ಸಂರಕ್ಷಣೆ ತಾಯಿಯ ಬಳಿ ಇರುವುದು."

ಸುಪ್ರೀಂ ಕೋರ್ಟ್ ಲೋಕ್ ಅದಾಲತ್: ಪ್ರಮುಖ ಅಂಶಗಳು, ನಿರ್ಧಾರ ಮತ್ತು ಎಚ್ಚರಿಕೆಗಳು

ಇಲ್ಲಿ ದಾಖಲಾಗುವ ಪ್ರತಿಯೊಂದು ವಿಚಾರವೂ ಅತ್ಯಂತ ಪ್ರಮುಖ. ಲೋಕ್ ಅದಾಲತ್‌ನಲ್ಲಿ ಕೈಗೊಳ್ಳುವ ರಾಜಿ ತೀರ್ಮಾನವು ಸಿವಿಲ್ ಕೋರ್ಟ್‌ ಆದೇಶಕ್ಕೆ ಸಮಾನವಾಗಿರುತ್ತದೆ. ಇದು ಅಂತಿಮವಾಗಿದ್ದು, ಇದರ ವಿರುದ್ಧ ಯಾವುದೇ ಮೇಲ್ಮನವಿ (ಅಪೀಲ್) ಸಲ್ಲಿಸಲು ಅವಕಾಶವಿರುವುದಿಲ್ಲ. ಅಪರೂಪದ ರಿಟ್ ಅರ್ಜಿಗಳ ಮೂಲಕ ಮಾತ್ರ ಇದನ್ನು ಪ್ರಶ್ನಿಸಬಹುದು. ಆದ್ದರಿಂದ ನಿರ್ಧಾರಗಳು ನಿಮ್ಮ ಸ್ವ ಇಚ್ಛೆಯಿಂದ ಮತ್ತು ನ್ಯಾಯಸಮ್ಮತವಾಗಿವೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಿ. ಯಾವುದೇ ಗೊಂದಲವಿದ್ದರೆ ಅಥವಾ ಯಾರಾದರೂ ಒತ್ತಡ ಹೇರುತ್ತಿದ್ದರೆ, ಸಹಿ ಮಾಡದೆ ಕಾಯುವುದು ಒಳಿತು.

ಸುಪ್ರೀಂ ಕೋರ್ಟ್ ಹೊರತಾದ ಪ್ರಕರಣಗಳಿಗೆ ರಾಜ್ಯ ಲೋಕ್ ಅದಾಲತ್ ಮಾಹಿತಿ

ನಿಮ್ಮ ಪ್ರಕರಣ ಸುಪ್ರೀಂ ಕೋರ್ಟ್‌ನಲ್ಲಿ ಇಲ್ವಾ? ಚಿಂತಿಸಬೇಕಿಲ್ಲ, ನಿಮ್ಮ ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರವನ್ನು (DLSA) ಸಂಪರ್ಕಿಸಿ. ಮುಂಬರುವ ಲೋಕ್ ಅದಾಲತ್ ಮತ್ತು ಅಗತ್ಯ ದಾಖಲೆಗಳ ಮಾಹಿತಿ ಪಡೆಯಲು ನಾಲ್ಸಾ (NALSA) ಉಚಿತ ಸಹಾಯವಾಣಿ 15100 ಅನ್ನು ಬಳಸಬಹುದು. ಹಲವು ರಾಜ್ಯಗಳು 2026ರ ವೇಳಾಪಟ್ಟಿಯನ್ನು ಈಗಾಗಲೇ ಪ್ರಕಟಿಸಿದ್ದು, ಲೋಕ್ ಅದಾಲತ್‌ಗೂ ಮುನ್ನ ನಡೆಸುವ ಸಂಧಾನ ಸಭೆಗಳಿಗೆ ಅರ್ಜಿ ಸ್ವೀಕರಿಸುತ್ತಿವೆ. ಈ ಪ್ರಕ್ರಿಯೆಯು ಶೀಘ್ರ ರಾಜಿ ಸಂಧಾನಕ್ಕೆ ಮತ್ತು ಪ್ರಕರಣಗಳ ಶೀಘ್ರ ವಿಲೇವಾರಿಗೆ ನೆರವಾಗುತ್ತದೆ.