ಮಳೆಯಲ್ಲಿ ತಿನ್ನಲೇಬೇಕೆನಿಸುವ ತಿಂಡಿಗಳಿವು!

ಹೊರಗಡೆ ಮಳೆ ಸುರಿಯುತ್ತಿದ್ದರೆ ಏನಾದರೂ ತಿನ್ನಬೇಕೆಂದು ಅನಿಸುವುದು ಸಹಜ. ಆದರೆ ಈ ಸಮಯದಲ್ಲಿ ಘನ ಆಹಾರಕ್ಕಿಂತ ಕರಿದ ತಿಂಡಿಗಳು, ಹುರಿದ ಕಡಲೆ ಪದಾರ್ಥಗಳು, ಚಿಪ್ಸ್ ಗಳನ್ನು ತಿನ್ನಬೇಕು ಅನಿಸುತ್ತಿರುತ್ತದೆ. ಈ ಸಮಯದಲ್ಲಿ ಡಯಟ್ ಬಗ್ಗೆ ಚಿಂತೆ ಮಾಡುವುದಕ್ಕಿಂತ ಇಷ್ಟದ ಪದಾರ್ಥಗಳನ್ನು ತಿಂದರೆ ಮನಸ್ಸಿಗೆ ತುಂಬಾ ಖುಷಿ ಸಿಗುವುದು. ಅದರಲ್ಲೂ ಈ ಕೆಳಗಿನ ತಿಂಡಿಗಳನಂತೂ ಡಯಟ್‌ನಲ್ಲಿರುವವರನ್ನು ಕೂಡ ತಮ್ಮತ್ತ ಸೆಳೆಯುವ ತಾಕತ್ತು ಹೊಂದಿವೆ.

1. ಸೂಪ್: ಹೊರಗಡೆ ಮಳೆ ಸುರಿಯುತ್ತಿದ್ದರೆ, ಬಿಸಿಬಿಸಿಯಾದ ಸೂಪ್ ಕುಡಿಯಲು ತುಂಬಾ ಇಷ್ಟವಾಗುತ್ತದೆ. ಸೂಪ್ ಕುಡಿಯುವುದು ಆರೋಗ್ಯಕ್ಕೆ ಕೂಡ ಒಳ್ಳೆಯದು, ಆದ್ದರಿಂದ ಸ್ಟ್ರಿಕ್ಟ್ ಡಯಟ್ ನಲ್ಲಿರುವವರು ಕೂಡ ಸೂಪ್ ಕುಡಿಯಲು ಹಿಂದೆ-ಮುಂದೆ ನೋಡಬೇಕಾದ ಅವಶ್ಯಕತೆಯಿಲ್ಲ.

2. ಮಸಾಲೆ ಟೀ: ಮಳೆ ಸುರಿಯುತ್ತಿರುವಾಗ ಚಹಾ ಹೀರುವುದರ ಸುಖನೇ ಬೇರೆ. ಆದರೆ ಈ ಸಮಯದಲ್ಲಿ ಮಾಮೂಲಿ ಕುಡಿಯುವ ಚಹಾಕ್ಕಿಂತ ಮಸಾಲೆ ಟೀ ಕುಡಿದರೆ ಬೆಚ್ಚನೆಯ ಅನುಭವದ ಜೊತೆ, ಮನಸ್ಸಿಗೆ ತುಂಬಾ ಖುಷಿ ಸಿಗುತ್ತದೆ.

3. ಚಿಪ್ಸ್ : ದಿನಾ ಚಿಪ್ಸ್ ತಿಂದರೆ ದಪ್ಪಗಾಗುತ್ತೇವೆ, ಆದರೆ ಅಪರೂಪಕ್ಕೆ ಚಿಪ್ಸ್ ತಿಂದರೆ ಆಕರ್ಷಕ ಮೈಕಟ್ಟಿಗೆ ಯಾವುದೇ ಭಂಗ ಉಂಟಾಗುವುದಿಲ್ಲ. ಚಿಪ್ಸ್ ಅನ್ನು ಚೀಸ್ ಅಥವಾ ಟೊಮೆಟೊ ಸಾಸ್ ಜೊತೆ ತಿಂದರೆ ಅದರ ರುಚಿನೇ ಬೇರೆ.

4. ಪಕೋಡ: ಏನೇ ಹೇಳಿ ಮಳೆಗಾಲದಲ್ಲಿ ತಿನ್ನಲು ಸೂಕ್ತ ತಿಂಡಿಯೆಂದರೆ ಪಕೋಡ, ಬಜ್ಜಿ. ಬಿಸಿ ಬಿಸಿ ಪಕೋಡ ಅಥವಾ ಬಜ್ಜಿಯನ್ನು ತಿನ್ನುತ್ತಾ , ಮಳೆ ಅಂದ ನೋಡುತ್ತಿದ್ದರೆ ಒಂದು ಕ್ಷಣ ನಮ್ಮನ್ನೇ ನಾವು ಮರೆತು ಬಿಡುತ್ತೇವೆ.

ಮಳೆ ಸುರಿಯುತ್ತಿರುವಾಗ ನಿಮಗೂ ಕೂಡ ಈ ರೀತಿಯ ತಿಂಡಿಗಳನ್ನು ತಿನ್ನಬೇಕೆಂದು ಅನಿಸುತ್ತದೆ ತಾನೆ?