ಝೆನ್ ಕಥೆ: ಝೆನ್ ಬಗ್ಗೆ ಹೇಗೆ ಹೇಳಲಿ?

Updated: Saturday, July 7, 2012, 15:37 [IST]

ವಿಶ್ವವಿದ್ಯಾನಿಲಯದ ಪ್ರಾಧ್ಯಾಪಕರೊಬ್ಬರಿಗೆ ಝೆನ್ ಗುರುಗಳ ಬಗ್ಗೆ ತಿಳಿದುಕೊಳ್ಳಬೇಕೆಂಬ ಕುತೂಹಲವಿತ್ತು. ಅದಕ್ಕಾಗಿ ಅವರು ಝೆನ್ ಗುರುವನ್ನು ಕಾಣಲು ತೀರ್ಮಾನಿಸಿ, ಪ್ರಸಿದ್ದ ಝೆನ್ ಗುರುಗಳನ್ನು ಬೇಟಿಮಾಡಲು ಹೋಗಿದ್ದರು.

ಆ ಸಮಯದಲ್ಲಿ ಗುರುಗಳು ಚಹಾ ಕುಡಿಯುತ್ತಿದ್ದರು, ಬಂದ ಪ್ರಾಧ್ಯಾಪಕರಿಗೂ ಚಹಾ ನೀಡುವ ಸಲುವಾಗಿ ಶಾಂತವಾಗಿ ಚಹಾವನ್ನು ಕಪ್ ಗೆ ಹಾಕುತ್ತಿದ್ದಾಗ ಪ್ರಾಧ್ಯಾಪಕರು ಗುರುಗಳ ಹತ್ತಿರ ಝೆನ್ ಬಗ್ಗೆ ವಿಚಾರಿಸಿದರು. ಗುರುಗಳು ಏನೂ ಮಾತನಾಡದೆ ಕಪ್ ತುಂಬಿದರೂ ಚಹಾ ಇನ್ನೂ ಸುರಿಯುತ್ತಲೇ ಇದ್ದರು.

ಕಪ್ ನಿಂದ ಚಹಾ ತುಂಬಿ ಸುಮ್ಮನೆ ಹರಿಯುತ್ತಿತ್ತು. ಇದನ್ನು ಸ್ವಲ್ಪ ಹೊತ್ತು ನೋಡುತ್ತಾ ನಿಂತಿದ್ದ ಪ್ರಾಧ್ಯಾಪಕರಿಗೆ ಗುರುವಿನ ವರ್ತನೆ ಸಹಿಸಲು ಸಾಧ್ಯವಾಗಲಿಲ್ಲ. ಅವರು ಗುರುವನ್ನು ಉದ್ದೇಶಿಸಿ "ಕಪ್ ತುಂಬಿ ಹರಿಯುತ್ತಿದೆ! ಇನ್ನು ಹೆಚ್ಚು ಚಹಾ ಒಳಗೆ ಹೋಗಲಾರದು!" ಎಂದು ಅಣಕವಾಡಿದರು.

ಅದಕ್ಕೆ ಝೆನ್ ಗುರುಳು "ನೀನೂ ಈ ಲೋಟವಿದ್ದಂತೆ", "ನೀನು ನಿನ್ನ ಲೋಟವನ್ನು ಖಾಲಿಮಾಡದೇ ನಾನು ನಿನಗೆ ಹೇಗೆ ತೋರಿಸಲಿ ಝೆನ್ ಏನೆಂದು " ಎಂದು ಪ್ರತಿಕ್ರಿಯಿಸಿದರು.

ಪ್ರಾಧ್ಯಾಪಕರು ಏನೂ ಮಾತನಾಡದೆ ಗುರುವಿಗೆ ವಂದಿಸಿ ಮರಳಿದರು.