ಚಳಿಗಾಲದಲ್ಲಿ ಸುಲಭವಾಗಿ ಬೆಳೆಯಬಹುದಾದ ತರಕಾರಿ

Improvement

oi-Sumalatha

By Sumalatha

Published: Friday, December 16, 2011, 11:29 [IST]

ಚಳಿಗಾಲದಲ್ಲಿ ಬೇಗನೆ ಬೆಳೆಯುವ ಕೆಲವು ರೀತಿಯ ತರಕಾರಿಗಳಿವೆ. ನಿಮ್ಮ ತೋಟದ ಸ್ವಲ್ಪವೇ ಜಾಗದಲ್ಲೂ ಈ ತರಕಾರಿಗಳನ್ನು ಸ್ವಚ್ಛಂದವಾಗಿ ಬೆಳೆಸಬಹುದು. ಚಳಿಗಾಲದಲ್ಲಿ ಯಾವ ರೀತಿ ತರಕಾರಿಯನ್ನು ಕೈದೋಟದಲ್ಲಿ ಬೆಳೆಯಬಹುದು ಎಂದು ಇಲ್ಲಿ ತಿಳಿದುಕೊಳ್ಳಿ.

ಚಳಿಗಾಲದಲ್ಲಿ ಬೆಳೆಯಬಹುದಾದ 4 ರೀತಿ ತರಕಾರಿ:

1. ಬಟಾಣಿ: ಈ ಕಾಲದಲ್ಲಿ ಬಟಾಣಿ ಬೇಗನೆ ಬೆಳೆಯಬಹುದು. ಮಣ್ಣನ್ನು ಅಗೆದು ಬೀಜವನ್ನು ಕೇವಲ ಒಂದು ಇಂಚಿನ ಅಂತರದಲ್ಲಿ ನೆಡಬೇಕು. ನಿಮ್ಮ ತೋಟದಲ್ಲಿರುವ ಜಾಗಕ್ಕೆ ಅನುಗುಣವಾಗಿ ಹಾಕಬಹುದು. ಬಟಾಣಿಯನ್ನು ತೇವದ ಬಟ್ಟೆಯಲ್ಲಿಟ್ಟು ಮೊಳಕೆ ಬರುವ ಸಂದರ್ಭದಲ್ಲಿ ಮಣ್ಣಿನಲ್ಲಿ ಹಾಕಿದರೆ ತುಂಬಾ ಹುಲುಸಾಗಿ ಬೆಳೆಯುತ್ತೆ.

2. ಎಲೆಕೋಸು: ಎಲೆಕೋಸನ್ನು ಕೈ ತೋಟದಲ್ಲಿ ಸುಲಭವಾಗಿ ಬೆಳೆಯಬಹುದು. ಹಸಿರು ಎಲೆಗಳ ಈ ಆರೋಗ್ಯಕರ ತರಕಾರಿಯನ್ನು ಇನ್ನೊಂದು ಗಿಡಕ್ಕೆ 10 ಇಂಚಿನ ಅಂತರದಲ್ಲಿ ಬೆಳೆಯಬೇಕು. ಹೆಚ್ಚು ಬಿಸಿಲು ಬೀಳುವ ಜಾಗದಲ್ಲಿ ಇದನ್ನು ನೆಟ್ಟರೆ ಆಯಿತು.

3. ಪಾಲಾಕ್: ಚಳಿಗಾಲ ಪಾಲಾಕ್ ಬೆಳೆಯಲು ತುಂಬಾ ಸೂಕ್ತ ಕಾಲ. ಮಣ್ಣನ್ನು ಅಗೆದು ಪಾಲಾಕ್ ಬೀಜವನ್ನು ಹಾಕಿದರೆ ಅದು ಚಿಗುರೊಡೆಯಲು 4-6 ವಾರಗಳಿಡಿಯುತ್ತದೆ. ಆದರೆ ಪಾಲಾಕ್ ಸೊಪ್ಪಿಗೆ ಬೇಗನೆ ಕ್ರಿಮಿ ಕೀಟಗಳು ತಗುಲುವ ಸಾಧ್ಯತೆ ಹೆಚ್ಚಿರುವುದರಿಂದ ಉತ್ತಮ ಗೊಬ್ಬರದೊಂದಿಗೆ ಕ್ರಿಮಿ ನಾಶಕವನ್ನೂ ಬಳಸಬೇಕು. ಆದರೆ ಪಾಲಾಕ್ ಸೊಪ್ಪನ್ನು ಅಡುಗೆಗೆ ಬಳಸುವಾಗ ಉಪ್ಪಿನೊಂದಿಗೆ ತೊಳೆದು ಬಳಸಬೇಕು.

4. ಸಾಂಬಾರು ಈರುಳ್ಳಿ: ಸಾಂಬಾರು ಈರುಳ್ಳಿ ಅಡುಗೆಗೆ ರುಚಿ ತರುವ ತರಕಾರಿ. ಲಭ್ಯವಿರುವ ಈರುಳ್ಳಿ ಬೀಜವನ್ನು ಮಣ್ಣಿನಲ್ಲಿ ಹಾಕಿದರೆ ಮೊಳಕೆ ಒಡೆಯುತ್ತದೆ. ಆದರೆ ಮೊಳಕೆ ಒಡೆಯುತ್ತಿದ್ದಂತೆ ಈರುಳ್ಳಿ ಕತ್ತರಿಸಬಾರದು. ಚೆನ್ನಾಗಿ ಹರಡಲು ಸ್ವಲ್ಪ ಕಾಲಾವಕಾಶ ನೀಡಬೇಕು. ಬೇಗನೆ ಕೊಯ್ದರೆ ಈರುಳ್ಳಿಗೆ ಸಿಹಿ ರುಚಿ ಬಂದುಬಿಡುತ್ತದೆ. ಸಾಂಬಾರು ಈರುಳ್ಳಿಯನ್ನು ಪಾಟ್ ನಲ್ಲಿಯೂ ಬೆಳೆಯಬಹುದು. ಎರಡು ವಾರಕ್ಕೊಮ್ಮೆ ನೀರು ಹಾಕಿದರೆ ಸಾಕು.

ಚಳಿಗಾಲದಲ್ಲಿ ಈ 4 ತರಕಾರಿಗಳನ್ನು ಸುಲಭವಾಗಿ ಬೆಳೆಯಬಹುದು. ಕ್ಯಾರೆಟ್, ಬ್ರೊಕೋಲಿ, ಕೊತ್ತಂಬರಿ, ಟೊಮೆಟೊ ಮತ್ತು ಬೆಳ್ಳುಳ್ಳಿಯನ್ನು ಕೂಡ ಚಳಿಗಾಲದಲ್ಲಿ ಬೆಳೆಯಬಹುದು.