ಸ್ತನ ಕ್ಯಾನ್ಸರ್: ನಂಬಲೇ ಬಾರದ ಇಂತಹ ತಪ್ಪು ಕಲ್ಪನೆಗಳು

ಕ್ಯಾನ್ಸರ್‌ಗಳಲ್ಲೇ ಅತ್ಯಂತ ಮಾರಕವಾದದ್ದು ಸ್ತನ ಕ್ಯಾನ್ಸರ್

ಅನೇಕ ಅಧ್ಯಯನಗಳು ಈ ಮಾತನ್ನು ಅಲ್ಲಗೆಳೆದಿವೆ. ಮಹಿಳೆಯರು ಸ್ತನ ಕ್ಯಾನ್ಸರ್ ಕಾಣಿಸಿಕೊಂಡರೆ ಎದೆಗುಂದಬೇಕಿಲ್ಲ. ಈಗಿನ ಮುಂದುವರಿದ ತಂತ್ರಜ್ಞಾನದಿಂದ ಸುಲಭವಾಗಿ ಗುಣಪಡಿಸಬಹುದು. ಸುಮಾರು ವರದಿಗಳ ಪ್ರಕಾರ 'ಶ್ವಾಸಕೋಶದ ಕ್ಯಾನ್ಸರ್' ಅತಿ ಹೆಚ್ಚು ಮಹಿಳೆಯರ ಬಲಿತೆಗೆದುಕೊಂಡಿದೆ.

ಸ್ತನ ಕ್ಯಾನ್ಸರ್‌ನ ಸ್ವಯಂಪರೀಕ್ಷೆಯಿಂದ ಯಾವದೇ ಲಾಭಗಳಿಲ್ಲ

ಇದು ಬಹಳ ದೊಡ್ಡ ತಪ್ಪುಕಲ್ಪನೆ. ವೈದ್ಯರ ಸಲಹೆಯಂತೆ ಮಹಿಳೆಯರು ನಿಯಮಿತವಾಗಿ ಸ್ತನ ಪರೀಕ್ಷೆ ಮಾಡಿಕೊಂಡರೆ, ಸ್ತನದಲ್ಲಿರುವ ಗಡ್ಡೆಗಳ ಪತ್ತೆ ಮಾಡಬಹುದು. ಇದರಿಂದ ಪ್ರಾರಂಭಿಕ ಹಂತದಲ್ಲೇ ಕ್ಯಾನ್ಸರ್ ಪತ್ತೆಯಾಗಿ ಸಂಪೂರ್ಣ ಗುಣಮುಖರಾಗಬಹುದು.

’ಮ್ಯಾಮೊಗ್ರಾಮ್‌’ನಿಂದ ಕ್ಯಾನ್ಸರ್ ಬರುತ್ತದೆ

'ಮ್ಯಾಮೊಗ್ರಾಮ್' ಎಂಬ ಆಧುನಿಕ ತಂತ್ರಜ್ಞಾನದಿಂದ ಸ್ತನದಲ್ಲಿರುವ ಗಡ್ಡೆಗಳ ಪತ್ತೆ ಮಾಡಬಹುದು. 40 ವಯಸ್ಸಿನ ನಂತರ ಮಹಿಳೆಯರು ಆರೋಗ್ಯತಪಾಸಣೆ ಸಮಯದಲ್ಲಿ ಮ್ಯಾಮೊಗ್ರಾಮ್ ಮಾಡಿಸಿಕೊಳ್ಳುವದರಲ್ಲಿ ಯಾವುದೇ ನಷ್ಟವಿಲ್ಲ.

ಕ್ಯಾನ್ಸರ್ ಗಡ್ಡೆಯನ್ನು ಶಸ್ತ್ರಚಿಕಿತ್ಸೆ ಮಾಡಿ ತೆಗೆಯುವದರಿಂದ ಕ್ಯಾನ್ಸರ್ ಬೇರೆ ಅಂಗಗಳಿಗೂ ಹರಡುತ್ತದೆ

ಈ ಹೇಳಿಕೆಗೆ ಯಾವುದೇ ತರಹದ ಸಾಕ್ಷ್ಯಾಧಾರಗಳಿಲ್ಲ. ನಿಜ ಹೆಳಬೇಕೆಂದರೆ, ಗಡ್ಡೆಯನ್ನು ಶಸ್ತ್ರಚಿಕಿತ್ಸೆ ಮಾಡಿ ತೆಗೆಯುವದರಿಂದ ಬೇರೆ ಅಂಗಗಳಿಗೆ ಕ್ಯಾನ್ಸರ್ ಹರಡುವದನ್ನು ತಡೆಯಬಹುದು.

ಸ್ತನ ಕ್ಯಾನ್ಸರ್ ತಾಯಿಗೆ ಬಂದರೆ ಮಗಳಿಗೆ ಅಪಾಯ ತಪ್ಪಿದ್ದಲ್ಲ!

ಇದು ಶುದ್ಧ ಸುಳ್ಳು, ತಾಯಿಗೆ ಸ್ತನ ಕ್ಯಾನ್ಸರ್ ಬಂದರೆ ಮಗಳಿಗೆ ಬಂದೇ ಬರುತ್ತದೆ ಎಂದು ಹೇಳಲಾಗುವದಿಲ್ಲ. ಆದರೂ ಸುರಕ್ಷತೆಗಾಗಿ ಮಗಳು ಮ್ಯಾಮೊಗ್ರಾಮ್ ಮಾಡಿಸಿಕೊಳ್ಳುತ್ತಿರಬೇಕು.

ಸ್ತನದಲ್ಲಿ ಗಡ್ಡೆ ಇರುವುದು ಮಾತ್ರ ಸ್ತನ ಕ್ಯಾನ್ಸರ್‌ನ ಲಕ್ಷಣ

ಇದು ಅಸತ್ಯ. ಅನೇಕ ಮಹಿಳೆಯರು ಪ್ರತಿನಿತ್ಯ ಸ್ತನ ಪರೀಕ್ಷೆ ಮಾಡಿಕೊಂಡರೂ ಸ್ತನ ಕ್ಯಾನ್ಸರ್ ಪತ್ತೆ ಮಾಡಲಾಗಿಲ್ಲ. ಆದ್ದರಿಂದ ವೈದ್ಯರ ತಪಾಸಣೆಯೂ ಮುಖ್ಯವಾಗುತ್ತದೆ. ಮಹಿಳೆಯರು ಬೇರೆಯವರ ಮಾತು ಕೇಳದೆ ಸ್ವಂತ ಅಧ್ಯಯನ ಮಾಡಿ, ವೈದ್ಯರ ಸಲಹೆಯ ಮೇರೆಗೆ ಕಾಲಕಾಲಕ್ಕೆ ಸ್ತನ ಪರೀಕ್ಷೆ ಮಾಡಿಕೊಂಡರೆ ಈ ರೋಗವನ್ನು ತಡೆಯಬಹುದು.