ನಿದ್ದೆ ಬರುವಳು ಕದ್ದು ನಿಮ್ಮ ಬಳಿಗೂ...

Wellness

oi-Sumalatha N

By Sumalatha N

Published: Monday, July 25, 2011, 12:15 [IST]

ರಾತ್ರಿ ನಿದ್ದೆ ಹತ್ತಿಲ್ಲ ಅಂದ್ರೆ ದಿನವೆಲ್ಲ ಆಕ್ಟಿವ್ ಆಗಿ ಕೆಲಸ ಮಾಡೋದಕ್ಕೆ ಸಾಧ್ಯವೇ ಇಲ್ಲ. ಬಾಯಿ ಆಕಳಿಸಿ ಆಕಳಿಸಿ ಆಸಕ್ತಿ ಇಲ್ಲದೆ ದಿನ ಕಳೆಯೋದು ಅಂದ್ರೆ ತುಂಬಾ ಕಷ್ಟ. ಇದೇ ಒಂದು ಅಭ್ಯಾಸ ಆದ್ರೆ ಇನ್ನೂ ತೊಂದರೆ. ಯಾಂತ್ರಿಕ ಬದುಕು, ಕೆಲಸದ ಒತ್ತಡ ಅನಿವಾರ್ಯವಾಗಿ ನಮ್ಮ ನಿದ್ದೆಯನ್ನ ಕದಿಯಲು ಆರಂಭಿಸಿರುತ್ತೆ. ಹಾಸಿಗೆಗೆ ಹೋದರೂ ನಿದ್ದೆ ಮಾತ್ರ ನಮ್ಮ ಕಣ್ಣು ಹತ್ತೋದಕ್ಕೆ ಸತಾಯಿಸ್ತಾನೇ ಇರುತ್ತೆ. ಅದರಲ್ಲೂ ಶಿಫ್ಟ್ ಕೆಲಸ ಮಾಡೋರಿಗಂತೂ ನಿದ್ರಾಹೀನತೆ ಪರಮ ಶತ್ರು. ಇದೊಂದು ದೊಡ್ಡ ಸಮಸ್ಯೆ ಅಂತ ಮಾತ್ರೆಗಳ ಮೊರೆ ಹೋಗೋರೂ ಕಡಿಮೆ ಇಲ್ಲ.

ಹೆಚ್ಚಾಗಿ ಮಧ್ಯ ವಯಸ್ಕರಲ್ಲಿ ಕಾಣಿಸುತ್ತಿದ್ದ ನಿದ್ರಾಹೀನತೆ ಈಗ ಹದಿ ಹರೆಯದವರ ನಿದ್ದೆಯನ್ನೂ ಕದಿಯುತ್ತಿದೆ. ಆದರೆ ದೈಹಿಕ ಚಟುವಟಿಕೆಗಳತ್ತ ಸ್ವಲ್ಪ ಗಮನ ಹರಿಸಿದರೆ ನಿದ್ರಾಹೀನತೆಯಿಂದ ಸ್ವಲ್ಪವಾದರೂ ದೂರ ಆಗಬಹುದು.

* ಸ್ಥಿರವಾಗಿರಿ: ದಿನಕ್ಕೆ 7 ಗಂಟೆಯಷ್ಟು ನಿದ್ದೆ ಉತ್ತಮ. ನಿತ್ಯವೂ ಆದಷ್ಟು ಒಂದೇ ಸಮಯಕ್ಕೆ ಏಳುವುದು, ಮಲಗುವುದು ಮಾಡಬೇಕು. ಈ ರೀತಿ ಪ್ರತಿದಿನ ಅನುಸರಿಸುವುದರಿಂದ ದೇಹ ಆ ಸಮಯಕ್ಕೆ ಚೆನ್ನಾಗಿ ಹೊಂದುಕೊಳ್ಳುತ್ತದೆ. ಆತಂಕ ಅನಾವಶ್ಯಕ ಭಯಗಳು ನಿದ್ದೆಯ ಶತ್ರುಗಳು. ಆದ್ದರಿಂದ ಎಲ್ಲ ಒತ್ತಡಗಳನ್ನು ದೂರ ಸರಿಸಿ ಮಲಗಲು ಪ್ರಯತ್ನಿಸಿದರೆ ಒಳ್ಳೆ ನಿದ್ದೆ ನಿಮ್ಮ ಕೈಯಲ್ಲಿ.

* ಮನಸ್ಸನ್ನು ರಿಲಾಕ್ಸ್ ಗೊಳಿಸಿ: ಹಾಸಿಗೆಗೆ ಬೇಗ ಹೋದರೂ ನಿದ್ದೆ ಕಾಣವುದು ಕಷ್ಟ ಅನ್ನೋ ಎಷ್ಟೋ ಮಂದಿ ಇದ್ದಾರೆ. ನಿಮ್ಮ ದೇಹಕ್ಕೆ ದಣಿವಾಗಿ ಮಲಗಲು ಅಣಿಯಾಗುತ್ತಿದ್ದರೂ ಮೆದುಳು ಮನಸ್ಸು ಮಾತ್ರ ರಿಲಾಕ್ಸ್ ಆಗಲು ಬಯಸುತ್ತಿರುತ್ತದೆ. ಮಲಗುವ ಮುನ್ನ ಮುಂದಿನ ದಿನದ ಕೆಲಸಗಳನ್ನು ಪಟ್ಟಿ ಮಾಡಿ ಮನಸ್ಸನ್ನು ಖಾಲಿಯಾಗಿಸಿ ರಿಲಾಕ್ಸ್ ಆಗುವಂತೆ ಮಾಡಬೇಕು. ತೀರಾ ನಿದ್ದೆ ಬರದ ಸಮಯದಲ್ಲಿ ಪೇಪರ್, ಚಿಕ್ಕ ಕತೆಗಳನ್ನು ಒಂದದಿನೈದು ನಿಮಿಷ ಓದಬೇಕು. ಆಗ ನಿದ್ದೆ ತಂತಾನೆ ಕಣ್ಣು ಹತ್ತುತ್ತದೆ.

* ವ್ಯಾಯಾಮದೆಡೆಗೆ ಸಾಗಿ: ದಿನಕ್ಕೆ ಒಂದು ಬಾರಿಯಾದರೂ ವ್ಯಾಯಾಮದ ರೂಢಿಯಿಟ್ಟುಕೊಂಡರೆ ಖಂಡಿತ ದೇಹಕ್ಕೆ ಮತ್ತು ಮನಸ್ಸಿಗೆ ವಿಶ್ರಾಮ ದೊರೆತು ನಿದ್ದೆಗೆ ಸಹಾಯ ಮಾಡುತ್ತದೆ. ಒಳ್ಳೆಯ ಹೃದಯದ ಆರೋಗ್ಯದಿಂದ ಮನಸ್ಸಿಗೆ ಉತ್ಸುಕತೆ ತುಂಬಿ ಒತ್ತಡ ದೂರವಾಗಿ ಋಣಾತ್ಮಕ ಪರಿಣಾಮ ಬೀರುತ್ತದೆ. ಆದರೆ ನಿತ್ಯವೂ ನಿಗದಿತ ಸಮಯಕ್ಕೆ ಮಾಡದೆ ಹೋದರೆ ನಿದ್ರಾಹೀನತೆ ತೊಂದರೆ ಕಾಣಿಸಿಕೊಳ್ಳುವ ಸಂಭವವೂ ಇದೆ. ಹಾಸಿಗೆಗೆ ಹೋಗುವ ಸುಮಾರು 3 ಗಂಟೆಗಳ ಮುನ್ನ ವ್ಯಾಯಾಮ ಮಾಡಿದರೆ ಉತ್ತಮ.

* ಚಟಗಳಿಂದ ದೂರವಾಗಿ: ನಿದ್ದೆಯ ಮುನ್ನ ಸಿಗರೇಟ್, ಮದ್ಯ, ಕಾಫಿ ಇಂತಹವುದನ್ನು ಸೇವನೆ ಮಾಡದಿದ್ದರೆ ಉತ್ತಮ. ಅದರಲ್ಲಿನ ನಿಕೋಟಿನ್ ಅಂಶ ನಿದ್ದೆಯನ್ನು ಕೆಡಿಸಿ ಅರ್ಧ ರಾತ್ರಿಗೆ ಎಚ್ಚರ ಮಾಡುತ್ತದೆ. ಒಂದು ಸಂಶೋಧನೆ ಪ್ರಕಾರ ಧೂಮಪಾನಿಗಳು ರಾತ್ರಿ ವೇಳೆ ಆಮ್ಲಜನಕವನ್ನು ಕಡಿಮೆ ಸೇವಿಸುವುದರಿಂದ ಅತಿ ಬೇಗನೆ ಸಾವು ಸಂಭವಿಸುವ ಸಾಧ್ಯತೆಗಳು ಹೆಚ್ಚು. ಇದು ಚಿರನಿದ್ದೆಗೆ ಸಾಗಲು ಸಹಾಯ ಮಾಡುತ್ತದೆ.

* ಕತ್ತಲನ್ನು ಪ್ರೀತಿಸಿ: ಇದು ಮಧ್ಯವಯಸ್ಕರಿಗೆ ಮತ್ತು ವೃದ್ದರಿಗೆ ಅತಿ ಮುಖ್ಯವಾದುದು. ರೂಮಿನ ಬಾಗಿಲನ್ನು ಪೂರ್ತಿ ಮುಚ್ಚಿ ಎಲ್ಲ ಎಲೆಕ್ಟ್ರಾನಿಕ್ ವಸ್ತುಗಳನ್ನು ಆಫ್ ಮಾಡಬೇಕು. ಈ ವಸ್ತುಗಳ ಬೆಳಕು ಕತ್ತಲಲ್ಲಿ ಕಣ್ಣಿಗೆ ರಾಚುವುದರಿಂದ ನಿದ್ದೆ ಹತ್ತಲು ಸಾಧ್ಯವಾಗುವುದಿಲ್ಲ. ರೂಂ ನಲ್ಲಿನ ಕತ್ತಲು, ನಿಶ್ಯಬ್ದ ಮತ್ತು ಚಲನ ವಲನಗಳ ಅನುಪಸ್ಥಿತಿ ನಿದ್ದೆಗೆ ಉತ್ತಮ.

* ಗೊರಕೆಗೆ ಪರಿಹಾರ ಕಂಡುಕೊಳ್ಳಿ: ನೀವು ಗೊರಕೆ ಹೊಡೆಯುತ್ತೀರಿ ಎಂದರೆ ಅದು ನಿಮಗೂ ತೊಂದರೆ, ಪಕ್ಕದಲ್ಲಿದ್ದವರಿಗೂ ಸಹ. ಆದ್ದರಿಂದ ಗೊರಕೆಯಿಂದ ದೂರವಾಗಲು ನಿದ್ದೆಗ ಮೊದಲು ಮದ್ಯ ಸೇವನೆ ತ್ಯಜಿಸುವುದು, ಅವಶ್ಯವಿದ್ದರೆ ತೂಕ ಇಳಿಸಿಕೊಳ್ಳುವುದು ಮತ್ತು ಮಗ್ಗುಲಾಗಿ ಮಲಗಿದರೆ ಉತ್ತಮ.

* ಶುದ್ದವಾಗಿರಿ: ಮಲಗುವ ವಾತಾವರಣ ಶುದ್ಧವಾಗಿರಲಿ, ಕ್ರಿಯೇಟಿವ್ ಮತ್ತು ಮೆತ್ತನೆ ಹೊದಿಕೆಗಳು ಹಾಸಿಗೆ ಮೇಲಿರಲಿ. ಇದರಿಂದ ಖಿನ್ನತೆ ಕಡಿಮೆಯಾಗುವುದಲ್ಲದೆ ಮೂಳೆಗಳು ರಿಲಾಕ್ಸ್ ಆಗಿ ಮೂಳೆ ಸಂಬಂಧಿ ರೋಗಗಳಿಗೆ ಪರಿಹಾರ ಒದಗಿಸುತ್ತದೆ.

* ನಿಯಮ ಮೀರಿ: ಯಾವಾಗಲೂ ಒಂದೇ ರೀತಿ ಕೆಲಸ ನಿರ್ವಹಿಸಲು ಸಾಧ್ಯವಿಲ್ಲ. ಆದ್ದರಿಂದ ವಾರಕ್ಕೆ ಒಂದು ಬಾರಿ ಅಥವಾ ಅಪರೂಪಕ್ಕೊಮ್ಮೆ ಹೆಚ್ಚಾಗಿ ನಿದ್ದೆ ಮಾಡಿ. ವೀಕೆಂಡ್ ನಲ್ಲೋ ಯಾವಾಗಲೋ ಮಧ್ಯಾಹ್ನದ ಹೊತ್ತು ಸ್ವಲ್ಪ ನಿದ್ದೆಗೆ ಜಾರಬಹುದು. ಆದರೆ ಅದೇ ಅಭ್ಯಾಸವಾಗದಂತೆ ಎಚ್ಚರವಹಿಸಿ. ಸಾಧ್ಯವಾದಷ್ಟು ಹೆಚ್ಚು ಮಲಗುವುದರಿಂದ ದೂರವಿರಿ..

* ವೈದ್ಯರ ಸಂಪರ್ಕ: ಏನೇ ಮಾಡಿದರೂ ನಿದ್ದೆಗೆ ಪರಿಹಾರ ದೊರಕುತ್ತಲೇ ಇಲ್ಲ ಎಂಬ ಪಕ್ಷದಲ್ಲಿ ತಪ್ಪದೆ ವೈದ್ಯರನ್ನು ಕಂಡು ತಕ್ಷಣ ಪರಿಹಾರವನ್ನು ಕಂಡುಕೊಳ್ಳಲು ಪ್ರಯತ್ನಿಸಿ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.