ಯಾವ ಬಗೆಯ ಮೀನಿನ ಅಡುಗೆ ಹೆಚ್ಚು ಆರೋಗ್ಯಕರ?

Updated: Wednesday, February 27, 2013, 11:39 [IST]

ಸಮುದ್ರಾಹಾರ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು ಅನ್ನುವುದು ನಮಗೆಲ್ಲಾ ತಿಳಿದಿರುವ ವಿಷಯ. ಅದರಲ್ಲೂ ಮೀನು ಅತೀ ಹೆಚ್ಚಾಗಿ ತಿನ್ನುವ ಸಮುದ್ರಾಹಾರವಾಗಿದೆ. ಮೀನಿನಲ್ಲಿ ಒಮೆಗಾ 3 ಅಂಶ ಹಾಗೂ ಇತರ ಖನಿಜಾಂಶಗಳು ಇರುವುದರಿಂದ ಪೋಷಕಾಂಶದ ಕೊರತೆ ಉಂಟಾಗುವುದಿಲ್ಲ.

ಮೀನು ಆರೋಗ್ಯಕರ, ಆದರೆ ಅದನ್ನು ಸರಿಯಾದ ವಿಧಾನದಲ್ಲಿ ಮಾಡಿ ತಿನ್ನದಿದ್ದರೆ ಅದು ಆರೋಗ್ಯಕರವಲ್ಲ. ಮೀನನ್ನು ತುಂಬಾ ಬೇಯಿಸಿದರೆ ಅದರಲ್ಲಿ ಒಮೆಗಾ 3 ಅಂಶ ನಷ್ಟವಾಗುತ್ತದೆ. ಇದನ್ನು ಕರಿದರೆ ಇದರಲ್ಲಿರುವ ಖನಿಜಾಂಶಗಳು ನಾಶವಾಗುತ್ತದೆ. ಆದ್ದರಿಂದ ಮೀನಿನ ಸಂಪೂರ್ಣ ಪ್ರಯೋಜವನ್ನು ಪಡೆಯಲು ಅದನ್ನು ಹೇಗೆ ಬೇಯಿಸಬೇಕೆಂದು ತಿಳಿದಿರಬೇಕು.

ಮೀನಿನಿಂದ ಯಾವ ರೀತಿಯ ಅಡುಗೆ ತಯಾರಿಸಿದರೆ ಹೆಚ್ಚು ಆರೋಗ್ಯಕರ ಎಂದು ನೋಡೋಣ ಬನ್ನಿ:

ಮಸಾಲೆ ಮೀನು

ಚಿಲ್ಲಿ, ಟೊಮೆಟೊ ಸಾಸ್ ಹಾಕಿ ಮಾಡುವ ಮಸಾಲೆ ಮೀನು ಅಡುಗೆ ಹೆಚ್ಚು ಆರೋಗ್ಯಕರ. ಈ ಅಡುಗೆಗೆ 1 ಚಮಚ ಎಣ್ಣೆಯಷ್ಟೇ ಬಳಸುತ್ತೇವೆ. ಇದು ಬಾಯಿಗೂ ರುಚಿ, ಆರೋಗ್ಯಕ್ಕೂ ಒಳ್ಳೆಯದು.

ಹಬೆಯಲ್ಲಿ ಬೇಯಿಸಿದ ಮೀನು

ಮೀನಿಗೆ ಉಪ್ಪು , ಮಸಾಲೆ ಹಾಕಿ, ಬಾಳೆ ಎಲೆಯಲ್ಲಿ ಇಟ್ಟು, ಹಬೆಯಲ್ಲಿ ಬೇಯಿಸಿದರೆ ತಿನ್ನಲೂ ರುಚಿ, ಆರೋಗ್ಯಕ್ಕೂ ಒಳ್ಳೆಯದು. ಇದನ್ನು ಮಾಡಿಸಲು ಎಣ್ಣೆ ಸ್ವಲ್ಪವೂ ಬೇಕಾಗಿಲ್ಲ.

ಸಾರು

ಸಂಬಾರ ಪದಾರ್ಥಗಳನ್ನು ಹಾಕಿ ರುಬ್ಬಿ ಮಾಡುವ ಮೀನಿನ ಅಡುಗೆ ತಿನ್ನಲು ತುಂಬಾ ರುಚಿಯಾಗಿರುತ್ತದೆ, ಈ ರೀತಿ ಮಾಡಿದ ಮೀನಿನ ಅಡುಗೆಯನ್ನು ತಿಂದರೆ ಸಂಬಾರ ಪದಾರ್ಥಗಳಲ್ಲಿ ಹಾಗೂ ಮೀನಿನಲ್ಲಿರುವ ಪೋಷಕಾಂಶ ದೇಹವನ್ನು ಸೇರುತ್ತದೆ.

ಸೂಪ್

ಮೀನಿನ ಸೂಪ್ ತಯಾರಿಸಬಹುದು. ಈ ಸೂಪ್ ಅನ್ನು ಮೀನನ್ನು ಬೇಯಿಸಿ , ಟೊಮೆಟೊ ಪೇಸ್ಟ್ ಮಾಡಿ ಅದರಲ್ಲಿ ಹಾಕಿ ತಯಾರಿಲಾಗುವುದು. ಮೀನಿನ ಸೂಪ್ ಕೂಡ ಆರೋಗ್ಯಕರವಾದ ಅಡುಗೆಯಾಗಿದೆ. ಮೀನಿನ ಸೂಪ್ ಗೆ ವಾಸನೆ ಕಮ್ಮಿಯಿರುವ ದೊಡ್ಡ ಮೀನನ್ನು ಬಳಸಲಾಗುವುದು.