ಮೀನು ಸಾರು- ಮಂಗಳೂರು ಶೈಲಿಯ ಅಡುಗೆ

ಮಂಗಳೂರು ವೆಜ್ ಮತ್ತು ನಾನ್ ವೆಜ್ ಅಡುಗೆಗೆ ಫೇಮಸ್. ಅದರಲ್ಲೂ ಮೀನಿನ ಅಡುಗೆಗೆ ತುಂಬಾ ಪ್ರಸಿದ್ಧಿಯನ್ನು ಪಡೆದಿದೆ. ಫ್ರೈ, ಗ್ರೇವಿ, ಸಾರು ಅಂತ ಅನೇಕ ಬಗೆಯ ಮೀನಿನಿಂದ ಅನೇಕ ರೀತಿಯ ಅಡುಗೆಗಳನ್ನು ತಯಾರಿಸುತ್ತಾರೆ.

ಇಲ್ಲಿ ನಾವು ಮಾಡಲು ತುಂಬಾ ಸರಳವಾದ ಮೀನಿನ ಸಾರಿನ ರೆಸಿಪಿ ನೀಡಿದ್ದೇವೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು

ಮೀನು ಒಂದು ಕೆಜಿ
ಈರುಳ್ಳಿ 2
ಕೊತ್ತಂಬರಿ ಬೀಜ 2 ಚಮಚ
ಒಣ ಮೆಣಸು 9-10 (ಖಾರಕ್ಕೆ ತಕ್ಕಂತೆ)
ತೆಂಗಿನ ತುರಿ 2 ಕಪ್
ಸ್ವಲ್ಪ ಶುಂಠಿ
ಬೆಳ್ಳುಳ್ಳಿ 8-10 ಎಸಳು
ಅರಿಶಿಣ ಅರ್ಧ ಚಮಚ
ನಿಂಬೆ ಹಣ್ಣು ಗಾತ್ರದಷ್ಟು ಹುಣಸೆ ಹಣ್ಣು
ತೆಂಗಿನ ತುರಿ ಅರ್ಧ
ಜೀರಿಗೆ 1 ಚಮಚ
ಎಣ್ಣೆ 2 ಚಮಚ
ರುಚಿಗೆ ತಕ್ಕ ಉಪ್ಪು
ಕರಿಬೇವಿನ ಎಲೆ

ತಯಾರಿಸುವ ವಿಧಾನ

* ಮೀನನ್ನು ಶುಚಿ ಮಾಡಿ ಉಪ್ಪು ಹಾಕಿಡಿ.

* ಬಾಣಲೆಯಲ್ಲಿ ಒಣ ಮೆಣಸು ಮತ್ತು ಕೊತ್ತಂಬರಿ ಬೀಜ ಹಾಕಿ ಹುರಿಯಿರಿ. ತೆಂಗಿನ ತುರಿಯನ್ನು ಬಾಣಲೆಗೆ ಹಾಕಿ, ಸ್ವಲ್ಪ ಎಣ್ಣೆ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಿರಿ.
ನಂತರ ಇದನ್ನು ತುರಿದ ತೆಂಗಿನಕಾಯಿಗೆ ಹಾಕಿ , ಅರಿಶಿಣ, 1 ಚಮಚ ಜೀರಿಗೆ ಹಾಕಿ ರುಬ್ಬಿ.

* ಹುಣಸೆ ಹಣ್ಣನ್ನು ಚಿಕ್ಕ ಕಪ್ ನಲ್ಲಿ ಬಿಸಿ ನೀರು ಹಾಕಿ ಅದರಲ್ಲಿ ಹಾಕಿಡಿ.

* ಈಗ ಪಾತ್ರೆಯನ್ನು ಬಿಸಿ ಮಾಡಿ ಅದರಲ್ಲಿ ಎಣ್ಣೆ ಹಾಕಿ ಎಣ್ಣೆ ಬಿಸಿಯಾದಾಗ ಕರಿಬೇವಿನ ಎಲೆ, ಜಜ್ಜಿದ ಶುಂಠಿ, ಬೆಳ್ಳುಳ್ಳಿ ಹಾಕಿ ನಂತರ ಈರುಳ್ಳಿ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಿರಿ.

* ನಂತರ ರುಬ್ಬಿದ ತೆಂಗಿನ ಕಾಯಿ ಹಾಕಿ ಅದಕ್ಕೆ ಹುಣಸೆ ಹಣ್ಣನ್ನು ಹಾಕಿ ಕುದಿಸಿ. ಮಿಶ್ರಣ ಕುದಿ ಬರುವಾಗ ಮೀನಿನ ತುಂಡುಗಳನ್ನು ಹಾಕಿ ರುಚಿಗೆ ತಕ್ಕ ಉಪ್ಪನ್ನು ಹಾಕಿ ಬೇಕಿದ್ದರೆ ಸ್ವಲ್ಪ ನೀರು ಹಾಕಿ(ಸಾರನ್ನು ತುಂಬಾ ನೀರು ಮಾಡಬೇಡಿ) ಬೇಯಿಸಿದರೆ ರುಚಿಕರವಾದ ಮೀನಿನ ಕರಿ ರೆಡಿ.