ನಿಮ್ಮ ಕೂದಲಿಗೆ ಸೂಕ್ತವಾದ ಬಾಚಣಿಕೆ ಯಾವುದು?

ಹೆಚ್ಚಿನವರು ತಮ್ಮ ಕೂದಲಿಗೆ ಸೂಕ್ತವಾದ ಬಾಚಣಿಕೆ ಯಾವುದೆಂದು ನೋಡುವುದಿಲ್ಲ. ಕೂದಲಿನ ಆರೈಕೆಗೆ ಬಾಚಣಿಕೆ ಕೂಡ ಪ್ರಮುಖವಾದ ಅಂಶ. ಸೂಕ್ತವಾದ ಬಾಚಣಿಕೆ ಬಳಸದಿದ್ದರೆ ಕೂದಲು ಬಾಚಣಿಯಲ್ಲಿ ಹೆಚ್ಚು ಬರುತ್ತದೆ.

ಗುಂಗುರು ಕೂದಲಿನವರು ನೇರ ಕೂದಲಿನವರು ಬಾಚುವಂತಹ ಬಾಚಣಿಕೆಯಿಂದ ಬಾಚಿದರೆ ಕೂದಲು ಮತ್ತಷ್ಟು ಸುರುಳಿ ಸುತ್ತಿ, ಕಿತ್ತು ಬರುವುದು. ನಿಮ್ಮ ಕೂದಲಿಗೆ ಸೂಕ್ತವಾದ ಬಾಚಣಿಕೆ ಯಾವುದು ನೋಡೋಣ ಬನ್ನಿ:

ಸಲಹೆ: ಬಾಚಣಿಕೆಯನ್ನು ಕೊಳ್ಳುವಾಗ ಗುಣಮಟ್ಟದ ಬಾಚಣಿಕೆಯನ್ನು ಕೊಳ್ಳಿ.

ನೇರ ಕೂದಲು
ನೇರವಾದ ಕೂದಲಿರುವವರು ಮೊದಲು ದಪ್ಪ ಹಲ್ಲುಗಳಿರುವ ಬಾಚಣಿಕೆಯಿಂದ ಬಾಚಿ ನಂತರ ಚಿಕ್ಕ ಹಲ್ಲುಗಳಿರುವ ಬಾಚಣಿಕೆಯಿಂದ ಬಾಚಬೇಕು. ಗುಂಗುರು ಮಾಡಲು ಬಾಚಣಿಕೆಯನ್ನು ಬಳಸಬಹುದು. ಕೂದಲನ್ನು ಮುಂದೆಕ್ಕೆ ಹಾಕಿ ಬಾಚಿ, ಹಿಂದೆ ಹಾಕಿ ಬಾಚಿದರೆ ಕೂದಲು ಸ್ವಲ್ಪ ತೆಳ್ಳಗೆ ಕಾಣುವುದು.

ಗುಂಗುರು ಕೂದಲು
ಗುಂಗುರು ಕೂದಲು ಬೇಗನೆ ಸಿಕ್ಕಾಗುವುದರಿಂದ ಆದಷ್ಟು ಇದು ಸಿಕ್ಕಾಗದಂತೆ ಬಾಚಬೇಕು. ಗುಂಗುರು ಕೂದಲು ಇರುವವರು ದೊಡ್ಡ ಹಲ್ಲಿನ ಬಾಚಣಿಕೆಯನ್ನು ಮಾತ್ರ ಬಳಸಬೇಕು. ಇತರ ಬಾಚಣಿಕೆಗಳು ಕೂದಲನ್ನು ಕಿತ್ತು ಬರುವಂತೆ ಮಾಡುತ್ತವೆ.

ತೆಳುವಾದ ಸುರುಳಿ ಕೂದಲು
ಈ ಕೂದಲು ಸಂಪೂರ್ಣ ಗುಂಗುರು ಕೂದಲಿನಂತೆ ಇರುವುದಿಲ್ಲ. ಆದರೆ ಸ್ವಲ್ಪ ಸುರುಳಿಯಾಗಿದ್ದು, ತೆಳುವಾಗಿರುತ್ತದೆ. ಇಂತಹ ಕೂದಲನ್ನು ಬಾಚಲು ಚಿಕ್ಕ ಹಲ್ಲಿನ, ಚಿಕ್ಕ ಹಣಿಗೆಯನ್ನು ಬಳಸಿ.

ತೆಳುವಾದ ಕೂದಲು
ಕೂದಲು ತುಂಬಾ ಉದುರುತ್ತಿದ್ದು, ತೆಳುವಾಗಿದ್ದರೆ ತಲೆ ಬಾಚಲು ಭಯಪಡುತ್ತಾರೆ. ಆದರೆ ತಲೆ ಬಾಚುವುದರಿಂದ ಆ ಭಾಗದಲ್ಲಿ ರಕ್ತ ಸಂಚಾರ ಹೆಚ್ಚಿ ಕೂದಲಿನ ಆರೋಗ್ಯ ಹೆಚ್ಚಾಗುವುದು. ತೆಳು ಕೂದಲಿರುವವರು ಮೃದುವಾದ ಬಾಚಣಿಕೆ ಬಳಸಿ ಬಾಚಬೇಕು. ಹೇರ್ ಡ್ರೈಯರ್ ಬಳಸಬಾರದು.