ಒಂದಿಷ್ಟು ಸಮಯ ಸಂಗಾತಿ ಕೊಡುವುದು ತುಂಬಾ ಮುಖ್ಯ, ಏಕೆ ಗೊತ್ತಾ?

ಮನಸ್ತಾಪ ಹೆಚ್ಚುವುದು

ಯಾವಾಗ ನಾವು ನಮ್ಮ ಸಂಗಾತಿಗಾಗಿ ಒಂದಿಷ್ಟು ಸಮಯ ಮೀಸಲಿಡುವುದಿಲ್ಲವೋ ಅವರಿಗೆ ಈತ/ಈಕೆ ನನ್ನನ್ನು ನಿರ್ಲಕ್ಷ್ಯ ಮಾಡುತ್ತಿದ್ದಾನೆ/ಳೆ ಎಂಬ ಭಾವನೆ ಬರಲಾರಂಭಿಸುತ್ತದೆ. ಈ ಭಾವನೆ ಬೆಳೆಯುತ್ತಿದ್ದಂತೆ ಸಣ್ಣ-ಪುಟ್ಟ ಸಮಸ್ಯೆಗಳೂ ದೊಡ್ಡದಾಗುವುದು. ನಮ್ಮಲ್ಲಿರುವ ಅತೃಪ್ತಿಯನ್ನು ಜಗಳದ ಮೂಲಕ ಹೊರ ಹಾಕುತ್ತೇವೆ. ಇದರಿಂದ ಮನಸ್ತಾಪ ಹೆಚ್ಚುವುದು.

ಬೇರೆ ಕಡೆಗೆ ಆಕರ್ಷಣೆ ಬೆಳೆಯುವ ಸಾಧ್ಯತೆ ಹೆಚ್ಚು

ಎಷ್ಟೋ ಅನೈತಿಕ ಸಂಬಂಧಗಳ ಹಿಂದೆ ಇಂಥದ್ದೊಂದು ಕಾರಣವಿರುತ್ತದೆ. ತಮ್ಮ ಸಂಗಾತಿ ನಮ್ಮ ಕಡೆ ಗಮನ ಕೊಡುತ್ತಿಲ್ಲ ಎಂದು ಕೊರಗುತ್ತಿರುವ ಸಮಯದಲ್ಲಿ ಯಾರಾದರೂ ಸ್ವಲ್ಪ ಅನುಕಂಪ ತೋರಿಸಿದರೆ ಅಥವಾ ಇವರ ಬಗ್ಗೆ ಆಸಕ್ತಿ ತೋರಿದರೆ ಆ ಸೆಳೆತಕ್ಕೆ ಸಿಗುವ ಸಾಧ್ಯತೆ ತುಂಬಾನೇ ಹೆಚ್ಚು. ಯಾವ ದಾಂಪತ್ಯದಲ್ಲಿ ಒಬ್ಬರನ್ನೊಬ್ಬರು ಅರ್ಥ ಮಾಡಿಕೊಂಡು ಜೀವನ ಮಾಡುತ್ತಾರೋ ಅಂಥ ಸಂಸಾರದಲ್ಲಿ ಇಂಥ ಸಮಸ್ಯೆ ಬರಲ್ಲ.

ಸಂಗಾತಿಯಲ್ಲಿ ಖಿನ್ನತೆ ಉಂಟಾಗುವುದು

ನನ್ನ ಜೀವನ ಸಂಗಾತಿ ನನ್ನ ಜೊತೆ ಮಾತನಾಡುತ್ತಿಲ್ಲ, ಸದಾ ಕೆಲಸ-ಕೆಲಸ ಅಂತ ಇರುತ್ತಾರೆ, ಸ್ವಲ್ಪ ಹೊತ್ತು ನನ್ನ ಜೊತೆ ಸಮಯ ಕಳೆದರೆ ಏನಾಗುತ್ತೆ? ಮನೆಯಿದೆ, ಆಸ್ತಿ ಇದೆ ಆದರೆ ನನಗೆ ಅದಕ್ಕಿಂತ ಮುಖ್ಯವಾಗಿ ಬೇಕಿರುವುದು ನನ್ನನ್ನು ಪ್ರೀತಿಸುವ ಜೀವ... ಆ ಭಾಗ್ಯವೇ ನನಗಿಲ್ಲ ಎಂಬ ಕೊರಗು ಅನೇಕರಲ್ಲಿ ಇರುತ್ತದೆ. ಈ ರೀತಿಯ ಕೊರಗಿನಿಂದಲೇ ಖಿನ್ನತೆ ಕಾಡುವುದು. ಪ್ರೀತಿಯ ಎರಡು ಮಾತು, ಮೆಚ್ಚುಗೆ ಒಂದು ನೋಟ ಬಯಸುವಾಗ ಅದು ದೊರಕದೇ ಹೋದಾಗ ಉಂಟಾಗುವ ವೇತನೆ ಜೀವನದ ಬಗ್ಗೆ ಜಿಗುಪ್ಸೆಯನ್ನು ಮೂಡಿಸಬಹುದು.

ಖುಷಿಯಾದ ದಾಂಪತ್ಯಕ್ಕೆ ನೀಡಲೇಬೇಕು ಸಮಯ

ಎಷ್ಟೇ ಬ್ಯುಸಿ ಇರಿ, ತಮ್ಮ ಸಂಗಾತಿಗಾಗಿ ಒಂದಿಷ್ಟು ಸಮಯ ತೆಗೆದು ಇಡಲೇಬೇಕು. ನಾವು ತುಂಬಾ ಆಸ್ತಿ, ಅಂತಸ್ತು ಮಾಡಬಹುದು, ಆದರೆ ಅವುಗಳಿಂದ ಖುಷಿ ಸಿಗಬೇಕಾದರೆ ನಮ್ಮ ಸಂಗಾತಿಗಾಗಿ, ಮಕ್ಕಳಿಗಾಗಿ ಒಂದಿಷ್ಟು ಸಮಯ ಮೀಸಲಿಡಬೇಕು. ಸ್ವಲ್ಪ ಹೊತ್ತು ಅವರ ಜೊತೆ ಕೂತು ಮನಸ್ಸು ಬಿಚ್ಚಿ ಮಾಡುವುದರಿಂದ ಎಷ್ಟೋ ಸಮಸ್ಯೆಗಳು ದೂರವಾಗುವುದು, ಇಬ್ಬರ ಮನಸ್ಸು ತಿಳಿಯಾಗುವುದು, ಪ್ರೀತಿ ಹೆಚ್ಚುವುದು. ಮದುವೆಯಾದ ಮೇಲೆ ನಮ್ಮದೇ ಲೋಕದಲ್ಲಿ ಕಳೆಯುವುದಕ್ಕಿಂತ ನಮ್ಮವರ ಲೋಕದಲ್ಲೂ ಸ್ವಲ್ಪ ಹೊತ್ತು ಕಳೆಯಬೇಕು, ಅವರ ಮನಸ್ಸು ಅರಿಯಲು ಪ್ರಯತ್ನಿಸಬೇಕು. ಸಂಸಾರದಲ್ಲಿ ಇತ್ತೀಚೆಗೆ ಏಕೋ ಮನಸ್ತಾಪ ಹೆಚ್ಚುತ್ತಿದೆ, ಏನೂ ಮೊದಲಿನಂತೆ ಇಲ್ಲ ಎಂದು ಅನಿಸಿದರೆ ಅದಕ್ಕೆ ಮೊದಲ ಪರಿಹಾರ ಸಮಯ.. ಇಬ್ಬರು ಒಟ್ಟಿಗೆ ಒಂದಿಷ್ಟು ಸಮಯ ನಿಮಗೋಸ್ಕರ ಕಳೆದು ನೋಡಿ ನಿಮ್ಮ ಎಷ್ಟೋ ಸಮಸ್ಯೆ ದೂರವಾಗುವುದು... ಸಮಯ ಎಂಬುವುದು ಯಾರ ಪರಿಧಿಗೂ ಸಿಕ್ಕಲ್ಲ, ಸಿಕ್ಕ ಸಮಯವನ್ನು ಸರಿಯಾಗಿ ಬಳಸಿಕೊಳ್ಳದೆ ಮುಂದೆ ಚಿಂತಿಸಿ ಫಲವಿಲ್ಲ, ಏನಂತೀರಿ?