ಕುಟುಂಬಸ್ಥರೇ ನಮಗೆ ಅಪರಿಚಿತರಾಗದಿರಲಿ...

Relationship

oi-Reena

By Hema S

Updated: Saturday, August 18, 2012, 12:56 [IST]

ಕುಟುಂಬದ ಬಗ್ಗೆ ಮಾತನಾಡುವಾಗ "ನಮ್ಮದು ಅವಿಭಕ್ತ ಕುಟುಂಬ" ಎಂದು ಯಾರಾದರು ಹೇಳಿದರೆ ಈ ಕಾಲದಲ್ಲೂ ಅವಿಭಕ್ತ ಕುಟುಂಬದಲ್ಲಿ ಇದ್ದೀರಾ? ಅನ್ನುವಂತೆ ಆಶ್ಚರ್ಯದಿಂದ ಪಿಳಿಪಿಳಿ ಕಣ್ಣು ಬಿಟ್ಟು ಅವರನ್ನು ನೋಡುತ್ತೇವೆ.

ಹಿಂದೆಯೆಲ್ಲಾ ಒಂದು ಮನೆ ಅಂದರೆ ಅಜ್ಜ, ಅಜ್ಜಿ, ಚಿಕ್ಕಪ್ಪ, ಚಿಕ್ಕಮ್ಮ, ದೊಡ್ಡಪ್ಪ, ದೊಡ್ಡಮ್ಮ ಅವರ ಮಕ್ಕಳು ಹೀಗೆ 20-30 ಜನರು ಇರುವ ದೊಡ್ಡ ಕುಟುಂಬವಾಗಿತ್ತು. ಈಗ ಒಂದು ಮನೆಯಲ್ಲಿ ಗಂಡ-ಹೆಂಡತಿ ಅವರಿಗೆ ಎರಡು ಮಕ್ಕಳು ಅಥವಾ ಒಂದೇ ಒಂದು ಮಗು. ಎಷ್ಟೋ ಮಕ್ಕಳಿಗೆ ನಮ್ಮ ಸಂಬಂಧಿಕರು ಯಾರು ಎಂಬುದೇ ಗೊತ್ತಿರುವುದಿಲ್ಲ!

ಇನ್ನು ಆ ಪುಟ್ಟ ಕುಟುಂಬದಲ್ಲಿ ಸಂತೋಷವಾಗಿ ಇದ್ದಾರೆ ಎಂದು ಹೇಳಲು ಸಾಧ್ಯವಿಲ್ಲ. ಒಂದೇ ಮನೆಯಲ್ಲಿ ಇದ್ದರೂ ಒಬ್ಬರಿಗೊಬ್ಬರು ಮುಖ ಕೊಟ್ಟು ಮಾತನಾಡಲು ಪುರುಸೊತ್ತು ಇರುವುದಿಲ್ಲ. ಶಿಫ್ಟ್ ವರ್ಕ್, ಕೆಲಸದ ಒತ್ತಡ, ಕೆಲಸದ ವಿಷಯದಲ್ಲಿ ಮನೆಯಿಂದ ದೂರ ಉಳಿಯಬೇಕಾದ ಪರಿಸ್ಥಿತಿ, ಇರುವ ಒಬ್ಬ ಮಗ ಅಥವಾ ಮಗಳು ಮನೆಯಿಂದ ವಿಧ್ಯಾಭ್ಯಾಸಕ್ಕಾಗಿ ಮನೆಯಿಂದ ದೂರ ಹೋಗಿರುತ್ತಾನೆ/ಳೆ.

ಈ ಎಲ್ಲಾ ಕಾರಣಗಳಿಂದ ಎಲ್ಲೋ ಒಂದು ಕಡೆ ಫ್ಯಾಮಿಲಿ ಸೆಂಟಿಮೆಂಟ್ ಕಡಿಮೆಯಾಗುತ್ತಿದೆ ಎಂದು ಅನಿಸುತ್ತಿದೆ ಅಲ್ಲವೇ? ಇದೇ ಕಾರಣದಿಂದ ಎಷ್ಟೋ ಜನರಿಗೆ ಎಲ್ಲರು ಇದ್ದರೂ ತಾನು ಒಂಟಿ ಎಂದು ಅನಿಸುತ್ತಿರುತ್ತದೆ. ಕೆಲಸದ ಒತ್ತಡ ಅಥವಾ ಮತ್ಯಾವುದೋ ಒಂದು ಕಾರಣದಿಂದ ಕುಟುಂಬಸ್ಥರೇ ನಮಗೆ ಅಪರಿಚಿತರಾಗಬಾರದು ಎಂದು ಬಯಸುವುದಾದರೆ ಈ ಕೆಳಗಿನ ಸಲಹೆಗಳನ್ನು ಪಾಲಿಸಿಬಹುದು.

ಫ್ಯಾಮಿಲಿ ಡಿನ್ನರ್: ಒಂದು ದಿನ ಅಂತ ನಿಗದಿ ಮಾಡಿ ಮನೆಗೆ ಎಲ್ಲರನ್ನು ಕರೆದು ಜೊತೆಯಲ್ಲಿ ಕುಳಿತು ಊಟ ಮಾಡಿ. ಈ ರೀತಿ ಮಾಡಿದರೆ ಮನೆಯವರ ನಡುವೆ ಸ್ನೇಹ ಸಂಬಂಧ ಜಾಸ್ತಿಯಾಗುತ್ತದೆ. ಇನ್ನು ಕೆಲ ಮನೆಗಳಲ್ಲಿಯಂತೂ ಅಪ್ಪ-ಅಮ್ಮ, ಮಕ್ಕಳು ಜೊತೆಯಲ್ಲಿ ಕೂತು ಊಟ ಮಾಡಿ ತುಂಬಾ ಕಾಲವಾಗಿರುತ್ತದೆ! ಈ ರೀತಿ ಇದ್ದರೆ ಪೋಷಕರು ಮತ್ತು ಮಕ್ಕಳ ನಡುವೆ ಅಂತರ ಬೆಳೆದು ಬಿಡುತ್ತದೆ. ಹಾಗೇ ಆಗಲು ಬಿಡಬಾರದು. ನಿಮ್ಮೆಲ್ಲಾ ಕೆಲಸದ ಒತ್ತಡ ಬದಿಗೊತ್ತಿ ವಾರದಲ್ಲಿ ಕನಿಷ್ಠ 2-3 ಬಾರಿಯಾದರೂ ಮನೆಯಲ್ಲಿ ಎಲ್ಲರು ಕುಳಿತು ಊಟ ಮಾಡಿ.

ಈ ರೀತಿ ಮಾಡಿದರೆ ಊಟ ಮಾಡುವಾಗ ಸಂತೋಷ ಇರುವುದು ಮಾತ್ರವಲ್ಲ ಆ ಸಮಯದಲ್ಲಿ ಮನೆಯವರ ಜೊತೆ ಹರಟೆ ಹೊಡೆಯುವುದರಿಂದ ಮನಸ್ಸಿಗೆ ಖುಷಿ ಸಿಗುತ್ತದೆ ಮತ್ತು ಮನೆಯವರ ಭಾವನೆಗಳನ್ನು ಅರ್ಥ ಮಾಡಿಕೊಳ್ಳಬಹುದಾಗಿದೆ, ಪರಸ್ಪರ ಅರ್ಥ ಮಾಡಿಕೊಂಡರೆ ಅಂತಹ ಸಂಸಾರದಲ್ಲಿ ಕಲಹಗಳು ಬರುವುದಿಲ್ಲ, ಚಿಕ್ಕ ಪುಟ್ಟ ಕಲಹ ಉಂಟಾದರೂ ಅದು ಬೇಗನೆ ಮರೆತು ಹೋಗುತ್ತದೆ, ಇದರಿಂದ ಸುಂದರ ಸಂಸಾರ ನಿಮ್ಮದಾಗುವುದು.

ಚಿಕ್ಕ ಮಕ್ಕಳಿದ್ದರೆ ಅವರ ಜೊತೆ ಆಟವಾಡಿ, ಇದರಿಂದ ನಿಮ್ಮ ಟೆನ್ಷನ್ ಕಡಿಮೆಯಾಗುತ್ತದೆ, ಅಲ್ಲದೆ ನಿಮ್ಮ ಮತ್ತು ಮಕ್ಕಳ ಮಕ್ಕಳ ನಡುವೆ ಬಾಂಧವ್ಯ ಹೆಚ್ಚಾಗುವುದು.

ಫ್ಯಾಮಿಲಿ ಔಟಿಂಗ್ : ವಾರಕ್ಕೊಮ್ಮೆ ಅಥವಾ ತಿಂಗಳಿಗೊಮ್ಮೆ ಔಟಿಂಗ್ ಹೋಗುವುದು, ವರ್ಷದಲ್ಲಿ ಒಮ್ಮೆ ಅಥವಾ ಎರಡು ಬಾರಿ ಪ್ರವಾಸಿತಾಣಗಳಿಗೆ ಹೋಗಿ ಬರುವುದು ಇವೆಲ್ಲಾ ಕುಟುಂಬದವರ ನಡುವೆ ಅನುಬಂಧವನ್ನು ಹೆಚ್ಚು ಮಾಡುತ್ತದೆ.

ಆಟ: ಸಮಯ ಸಿಕ್ಕಿದಾಗ ಮನೆಯವರೆಲ್ಲಾ ಜೊತೆಗೂಡಿ ನಿಮಗೆ ಇಷ್ಟವಾದ ಆಟ ಆಡುವುದು, ಬೀಚ್ ಸ್ವಲ್ಪ ಹತ್ತಿರದಲ್ಲಿದ್ದರೆ ಬೀಚ್ ಗೆ ಹೋಗುವುದು, ಅಪರೂಪಕ್ಕೆ ಟ್ರಕ್ಕಿಂಗ್ ಹೋಗುವುದು ಇತರ ಸಾಹಸ ಕ್ರೀಡೆಗಳನ್ನು ಆಡುವುದು ಮಾಡಿ. ಇದರಿಂದ ಮನೆಯವರ ನಡುವೆ ಆತ್ಮೀಯತೆ ಹೆಚ್ಚಾಗುವುದು. ಇನ್ನೊಂದು ಮುಖ್ಯವಾದ ವಿಷಯವೆಂದರೆ ಮನೆಯವರ ಜೊತೆ ಕಳೆಯುವ ಸಮಯದಲ್ಲಿ ನಿಮ್ಮ ಕೆಲಸದ ಬಗ್ಗೆ ಯೋಚಿಸುವುದಾಗಲಿ ಅದರ ಬಗ್ಗೆ ಮಾತನಾಡುವುದಾಗಲಿ ಮಾಡಬಾರದು. ಎಲ್ಲಾ ಒತ್ತಡಗಳನ್ನು ಬಿಟ್ಟು ಕ್ಷಣ ಕಾಲ ಮರೆತು ಮನೆಯವರ ಜೊತೆ ಕಳೆದು ನೋಡಿ, ನಿಮಗೂ ಹೊಸ ಚೈತನ್ಯ ಬರುತ್ತದೆ ಮನೆಯವರ ನಡುವೆ ಸಂಬಂಧ ತುಂಬಾ ಮಧುರವಾಗಿರುತ್ತದೆ.