ಕಿಡ್ನಿ ಆರೋಗ್ಯ ಕಾಪಾಡುತ್ತೆ ಈ ಪಲ್ಯ

Palya

oi-Reena

By Hema S

Published: Monday, September 24, 2012, 16:50 [IST]

ಆಹಾರಕ್ರಮ ಸರಿಯಾಗಿದ್ದರೆ ಕಾಯಿಲೆ ಬೀಳುವುದು ಕಡಿಮೆ. ಸಾಮಾನ್ಯವಾಗಿ ಎಲ್ಲಾ ರೀತಿಯ ತರಕಾರಿಗಳನ್ನು ತಿನ್ನಬೇಕು. ಅದರಲ್ಲೂ ಬಾಳೆ ದಿಂಡಿನಿಂದ ಅಡುಗೆ ಮಾಡಿ ತಿಂದರೆ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು.

ಬಾಳೆ ಡಿಂಡಿನಿಂದ ಅಡುಗೆ ಮಾಡಿ ವಾರಕ್ಕೊಮ್ಮೆಯಾದರೂ ತಿನ್ನಬೇಕು. ಈ ದಿಂಡಿಗೆ ಕಿಡ್ನಿಯಲ್ಲಿರುವ ಕಲ್ಲನ್ನು ಹೋಗಲಾಡಿಸುವ ಸಾಮರ್ಥ್ಯ ಇದೆ ಹಾಗೂ ಜೀರ್ಣಕ್ರಿಯೆಗೂ ತುಂಬಾ ಒಳ್ಳೆಯದು. ಈ ಬಾಳೆ ದಿಂಡಿನಿಂದ ರುಚಿಕರವಾದ ಪಲ್ಯ ಮಾಡಬಹುದಾಗಿದ್ದು ರೆಸಿಪಿ ನೋಡಿ ಇಲ್ಲಿದೆ.

ಬೇಕಾದ ಸಾಮಾಗ್ರಿಗಳು
* ಬಾಳೆ ದಿಂಡಿನ ತುಂಡುಗಳು
* ನೆನೆಸಿದ ಕಡಲೆಕಾಳು 1ಕಪ್
* ಈರುಳ್ಳಿ 1 (ಕತ್ತರಿಸಿದ್ದು)
* ಟೊಮೆಟೊ 2(ಕತ್ತರಿಸಿದ್ದು)
* ಮಸಾಲೆ ಪುಡಿ 1 ಚಮಚ
* ಬೆಳ್ಳುಳ್ಳಿ
* ಸಾಸಿವೆ
* ಕರಿಬೇವಿನ ಎಲೆ
* ಹಸಿಮೆಣಸಿನ ಕಾಯಿ 2
* ರುಚಿಗೆ ತಕ್ಕ ಉಪ್ಪು
* ಕೊತ್ತಂಬರಿ ಸೊಪ್ಪು

ತಯಾರಿಸುವ ವಿಧಾನ:

1. ಬಾಳೆದಿಂಡಿನ ನಾರು ತೆಗೆದು ಸಣ್ಣಗೆ ಹೆಚ್ಚಿಕೊಳ್ಳಬೇಕು. ನಂತರ ಈರುಳ್ಳಿ, ಟೊಮೆಟೊ ಸಹ ಸಣ್ಣದಾಗಿ ಹೆಚ್ಚಿಕೊಳ್ಳಬೇಕು.

2. ಈಗ ನೆನೆಸಿದ ಕಡಲೆಕಾಯಿ ಮತ್ತು ಹೆಚ್ಚಿದ ಬಾಳೆದಿಂಡನ್ನು ಸ್ವಲ್ಪ ನೀರು ಹಾಕಿ , ರುಚಿಗೆ ತಕ್ಕ ಉಪ್ಪು ಹಾಕಿ ಬೇಯಿಸಿಕೊಳ್ಳಬೇಕು. ಬೇಯಿಸಿದ ನಂತರ ನೀರನ್ನು ಬಸಿದು ಕಡಲೆ ಮತ್ತು ಬಾಳೆ ದಿಂಡನ್ನು ಒಂದು ಪಾತ್ರೆಯಲ್ಲಿ ಹಾಕಿ ಇಡಬೇಕು.

3. ಈಗ ಬಾಣಲೆಯನ್ನು ಬಿಸಿ ಮಾಡಿ ಎಣ್ಣೆ ಹಾಕಿ , ಸಾಸಿವೆ, ಬೆಳ್ಳುಳ್ಳಿ, ಹಸಿಮೆಣಸಿನಕಾಯಿ ನಂತರ ಹೆಚ್ಚಿದ ಈರುಳ್ಳಿ ಹಾಕಿ ಕಂದು ಬಣ್ಣಕ್ಕೆ ಬೇಯಿಸಿ, ಹೆಚ್ಚಿದ ಟೊಮ್ಯಾಟೋ, ಕರಿಬೇವು ಹಾಕಿ ನೀರು ಹಾಕದೇ ಎಣ್ಣೆಯಲ್ಲಿಯೇ ಬೇಯಿಸಿ. ಬೆಂದ ನಂತರ ಖಾರದ ಪುಡಿ, ಮಸಾಲೆ ಪುಡಿ ಹಾಕಿ ಇದಕ್ಕೆ ಬೇಯಿಸಿದ ಬಾಳೆದಿಂಡು, ಕಡಲೆಕಾಳು, ಕೊತ್ತಂಬರಿ ಸೊಪ್ಪು ಹಾಕಿ ಸ್ವಲ್ಪ ಹೊತ್ತು ಸೌಟ್ ನಿಂದ ತಿರುಗಿಸುತ್ತಾ ಬೇಯಿಸಿಬೇಕು. ನಂತರ ಉರಿಯಿಂದ ಇಳಿಸಬೇಕು. ಹೀಗೆ ಮಾಡಿದರೆ ಆರೋಗ್ಯಕರ ಮತ್ತು ರುಚಿಕರವಾದ ಪಲ್ಯ ರೆಡಿ.