ರುಚಿ ರುಚಿಯಾದ ನಾಟಿಕೋಳಿ ಸಾರು

Non Vegetarian

oi-Reena

By Hema S

Updated: Monday, August 20, 2012, 11:10 [IST]

ನಾಟಿ ಕೋಳಿ ರುಚಿಗೆ ಸರಿಸಾಟಿಯಾದ ಕೋಳಿ ಮಾಂಸ ಮತ್ತೊಂದಿಲ್ಲ. ನಾಟಿ ಕೋಳಿಯನ್ನು ಮಾಡುವಾಗ ಮಾರುಕಟ್ಟೆಯಲ್ಲಿ ದೊರೆಯುವ ಚಿಕನ್ ಪೌಡರ್ ಹಾಕಿದರೆ ಸಾರು ರುಚಿ ಆಗುವುದಿಲ್ಲ. ನಾಟಿ ಸಾರಿಗೆ ಮಸಾಲೆಯನ್ನು ಅರೆದು ಮಾಡಬೇಕು. ಆಗ ಬಾಯಲ್ಲಿ ನೀರೂರಿಸುವ ರುಚಿಯ ನಾಟಿಕೋಳಿ ತಯಾರಿಸಬಹುದು. ನಾಟಿಕೋಳಿ ಮಾಡ ಬಯಸುವುದಾದರೆ ಇಲ್ಲಿದೆ ನೋಡಿ ರೆಸಿಪಿ.

ಬೇಕಾಗುವ ಸಾಮಾಗ್ರಿಗಳು:
* ಒಂದು ಕೆಜಿ ನಾಟಿ ಕೋಳಿ ಮಾಂಸ
* 10 ಒಣ ಕೆಂಪು ಮೆಣಸು
* 1 ಚಮಚ ಕೊತ್ತಂಬರಿ ಬೀಜ
* ಅರ್ಧ ಚಮಚ ಅರಿಶಿಣ
* 1 ಚಮಚ ಜೀರಿಗೆ
* 1 ಕಪ್ ತೆಂಗಿನ ತುರಿ
* ರುಚಿಗೆ ತಕ್ಕ ಉಪ್ಪು
* 1 ನಿಂಬೆ ಹಣ್ಣು
* ಕರಿ ಬೇವಿನ ಎಲೆ
* ಈರುಳ್ಳಿ 2
* ಬೆಳ್ಳುಳ್ಳಿ 4-6 ಎಸಳು
* ಎಣ್ಣೆ

ತಯಾರಿಸುವ ವಿಧಾನ:

1. ತೆಂಗಿನ ತುರಿಯನ್ನು ಒಂದು ಬಾಣಲೆಯಲ್ಲಿ ಹಾಕಿ, ಒಂದು ಚಮಚ ಎಣ್ಣೆ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿದು ಒಂದು ಪಾತ್ರೆಯಲ್ಲಿ ಹಾಕಿಡಬೇಕು.

2. ಮಸಾಲೆ ತಯಾರಿಸಲು ಒಣ ಕೆಂಪು ಮೆಣಸು, ಕೊತ್ತಂಬರಿ ಬೀಜ, ಅರಿಶಿಣ , ಜೀರಿಗೆ, ಬೆಳ್ಳುಳ್ಳಿಯನ್ನು ಬಾಣಲೆಗೆ ಹಾಕಿ ಅರ್ಧ ಚಮಚ ಎಣ್ಣೆ ಹಾಕಿ ಕೊತ್ತಂಬರಿ ಬೀಜ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು.

3. ನಂತರ ಹುರಿದ ತೆಂಗಿನ ತುರಿ ಮತ್ತು ಮಸಾಲೆ ಸಾಮಾಗ್ರಿಗಳನ್ನು ಮಿಶ್ರಣ ಮಾಡಿ ನುಣ್ಣನೆ ಅರೆಯಬೇಕು.

4. ನಂತರ ಒಂದು ಪಾತ್ರೆಯಲ್ಲಿ ಅರೆದ ಮಿಶ್ರಣಕ್ಕೆ ಶುಚಿ ಮಾಡಿದ ನಾಟಿ ಕೋಳಿ ಮಾಂಸ ಹಾಕಿ ಮಿಶ್ರಣ ಮಾಡಿ ರುಚಿಗೆ ತಕ್ಕ ಉಪ್ಪು ಅರ್ಧ ಗಂಟೆ ಕಾಲ ಇಡಬೇಕು.

5. ನಂತರ ಸಾರು ಪಾತ್ರೆ ಬಿಸಿ ಮಾಡಿ ಅದರಲ್ಲಿ ಒಂದು ಚಮಚ ಎಣ್ಣೆ ಹಾಕಿ ಅದರಲ್ಲಿ ಕರಿಬೇವಿನ ಎಲೆ ಹಾಕಿ ನಂತರ ಈರುಳ್ಳಿ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು. ಮಸಾಲೆ ಮಿಶ್ರಣ ಮಾಡಿದ ಕೋಳಿ ಮಾಂಸವನ್ನು ಹಾಕಿ ಒಂದು ಕಪ್ ನೀರು ಹಾಕಿ ಅರ್ಧ ಗಂಟೆ ಬೇಯಿಸಬೇಕು.

6. ನಂತರ ಬೆಂದ ಕೋಳಿ ಮಾಂಸವನ್ನು ಉರಿಯಿಂದ ತೆಗೆದು ಸ್ವಲ್ಪ ನಿಂಬೆ ರಸ ಹಿಂಡಿದರೆ ರುಚಿಯಾದ ನಾಟಿ ಕೋಳಿ ಸಾರು ರೆಡಿ.