ಎಗ್ ಗ್ರೇವಿ-ಚೆಟ್ಟಿನಾಡ್ ಶೈಲಿಯ ರೆಸಿಪಿ

ಒಂದೊಂದು ಶೈಲಿಯ ಅಡುಗೆಯೂ ರುಚಿಯಲ್ಲಿ ಭಿನ್ನವಾಗಿರುತ್ತದೆ. ದಕ್ಷಿಣ ಭಾರತದ ಕಡೆ ಅನೇಕ ಶೈಲಿಯ ಅಡುಗೆಗಳು ದೊರೆಯುತ್ತವೆ. ಅವುಗಳಲ್ಲಿ ಚೆಟ್ಟಿನಾಡ್ ಶೈಲಿಯ ಅಡುಗೆ ಕೂಡ ಒಂದು. ಈ ಶೈಲಿಯ ಅಡುಗೆಯೂ ತನ್ನದೇ ಆದ ರುಚಿಯನ್ನು ಹೊಂದಿರುತ್ತದೆ.

ಇಲ್ಲಿ ನಾವು ಚೆಟ್ಟಿನಾಡ್ ಶೈಲಿಯಲ್ಲಿ ಮಾಡುವ ಮೊಟ್ಟೆಯ ರೆಸಿಪಿ ನೀಡಿದ್ದೇವೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು
ಮೊಟ್ಟೆ 4-5
ಈರುಳ್ಳಿ 1
ಟೊಮೆಟೊ 1
ಕೊತ್ತಂಬರಿ ಸೊಪ್ಪು 1 ಚಮಚ
ಗರಂ ಮಸಾಲ 1 ಚಮಚ
ರುಚಿಗೆ ತಕ್ಕ ಉಪ್ಪು
ಎಣ್ಣೆ 2 ಚಮಚ

ಒಗ್ಗರಣೆಗೆ
ಒಂದು ಇಂಚಿನಷ್ಟು ದೊಡ್ದಿರುವ ಚಕ್ಕೆ
ಸ್ವಲ್ಪ ಕರಿಬೇವಿನ ಎಲೆ
ಲವಂಗ 1-2

ಮಸಾಲಗೆ
* ಸ್ವಲ್ಪ ತೆಂಗಿನ ತುರಿ
* ಕೆಂಪು ಮೆಣಸು 2
* ಬೆಳ್ಳುಳ್ಳಿ ಎಸಳು 4-5
* ಅರ್ಧ ಇಂಚಿನಷ್ಟು ದೊಡ್ಡದಿರುವ ಶುಂಠಿ
* ಇಂಗು
* ಕೊತ್ತಂಬರಿ ಬೀಜ ಅರ್ಧ ಚಮಚ
* ಕರಿ ಮೆಣಸಿನ ಪುಡಿ ಅರ್ಧ ಚಮಚ
* ಜೀರಿಗೆ 1 ಚಮಚ

ತೆಂಗಿನ ತುರಿಯನ್ನು ಹುರಿದು, ಅದಕ್ಕೆ ಮಸಾಲೆಯನ್ನು ಸೇರಿಸಿ ಮತ್ತೆ 3-4 ನಿಮಿಷ ಹುರಿದು, ಉರಿಯಿಂದ ಇಳಿಸಿ ಆರಲು ಇಡಿ. ನಂತರ ನುಣ್ಣಗೆ ರುಬ್ಬಿಡಿ.

ತಯಾರಿಸುವ ವಿಧಾನ

* ಮೊಟ್ಟೆಯನ್ನು ಬೇಯಿಸಿ ಅದರ ಸಿಪ್ಪೆಯನ್ನು ಸುಲಿದಿಡಿ.

* ಈಗ ಪಾತ್ರೆಯನ್ನು ಬಿಸಿ ಮಾಡಿ ಅದರಲ್ಲಿ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದಾಗ ಚಕ್ಕೆ, ಲವಂಗ, ಕರಿಬೇವಿನ ಎಲೆ, ಕತ್ತರಿಸಿದ ಈರುಳ್ಳಿ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಿರಿ.

* ನಂತರ ಟೊಮೆಟೊ ಹಾಕಿ ಮೆತ್ತಗಾಗುವವರೆಗೆ ಫ್ರೈ ಮಾಡಿ. ಈಗ ರುಬ್ಬಿದ ಮಿಶ್ರಣವನ್ನು ಹಾಕಿ 2 ನಿಮಿಷ ಸೌಟ್ ನಿಂದ ಆಡಿಸಿ, ರುಚಿಗೆ ತಕ್ಕ ಉಪ್ಪು ಹಾಕಿ , ಅರ್ಧ ಕಪ್ ನೀರು ಹಾಕಿ ಸಾಧಾರಣ ಹುರಿಯಲ್ಲಿ ಕುದಿಸಿ.

* ಮಿಶ್ರಣ ಗಟ್ಟಿಯಾದಾಗ ಮೊಟ್ಟೆಯನ್ನು ಎರಡು ಭಾಗ ಮಾಡಿ ಹಾಕಿ ಮತ್ತೆ ಎರಡು ನಿಮಿಷ ಕುದಿಸಿ, ಉರಿಯಿಂದ ಇಳಿಸಿದರೆ ಚೆಟ್ಟಿನಾಡ್ ಶೈಲಿಯಲ್ಲಿ ಎಗ್ ಗ್ರೇವಿ ರೆಡಿ.