ಬಾಯಲ್ಲಿ ನೀರೂರಿಸುವ ರಾಯಲ್ ಕಾಜು ಪುಲಾವ್! ಈ ರುಚಿಗೆ ಮನಸೋಲದವರಿಲ್ಲ.. ಮಾಡೋದು ಹೇಗೆ?

ಬೋರಿಂಗ್ ಊಟಕ್ಕೆ ಗುಡ್ ಬೈ ಹೇಳಿ! ಬಾಯಿಯಲ್ಲಿ ನೀರೂರಿಸುವ 'ಕಾಜು ಪುಲಾವ್' ಮಾಡುವ ಸರಳ ವಿಧಾನ ಇಲ್ಲಿದೆ. ಹೌದು, ನಿತ್ಯವೂ ಅನ್ನ ಸಾಂಬಾರ್ ಅಥವಾ ಚಿತ್ರಾನ್ನ ಬೇಸರ ತಂದಿದೆಯೇ? ಮನೆಯಲ್ಲಿ ಯಾರಾದರೂ ಅತಿಥಿಗಳು ಬಂದಾಗ ಅಥವಾ ವಿಶೇಷ ಸಂದರ್ಭಗಳಲ್ಲಿ ವಿಶಿಷ್ಟ ಅಡುಗೆಯನ್ನು ತಯಾರಿಸುವ ಯೋಚನೆಯಲ್ಲಿದ್ದೀರಾ? ಹಾಗಾದರೆ, 'ಗೋಡಂಬಿ ಪುಲಾವ್' ಅಥವಾ ರಾಯಲ್ ಕಾಜು ಪುಲಾವ್ (Kaju Pulao) ನಿಮಗೆ ಉತ್ತಮ ಆಯ್ಕೆ.

ಅದರಲ್ಲೂ ಚಳಿಗಾಲದ ಈ ಸಮಯದಲ್ಲಿ ಬಿಸಿಬಿಸಿಯಾದ, ತುಪ್ಪದ ಘಮಘಮಿಸುವ ಕಾಜು ಪುಲಾವ್ ಸವಿಯುವುದು ನೆಮ್ಮದಿಯ ಅನುಭವ ನೀಡುತ್ತೆ. ಕಾಜು ಪುಲಾವ್ (Kaju Pulao Recipe) ಶ್ರೀಮಂತ ಖಾದ್ಯ ಎಂದು ಪರಿಗಣಿತವಾಗಿದೆ. ಗೋಡಂಬಿ ಮತ್ತು ತುಪ್ಪದ ಸಮ್ಮಿಶ್ರಣವು ಅನ್ನಕ್ಕೆ ಅಪೂರ್ವ ರುಚಿ ಮತ್ತು ಪರಿಮಳವನ್ನು ನೀಡುತ್ತದೆ. ಮಕ್ಕಳು ಸಾಮಾನ್ಯವಾಗಿ ತರಕಾರಿಗಳನ್ನು ಇಷ್ಟಪಡದಿದ್ದರೂ, ಈ ಪುಲಾವ್‌ನಲ್ಲಿರುವ ಗರಿಗರಿಯಾದ ಗೋಡಂಬಿ ಅವರಿಗೆ ಖಂಡಿತವಾಗಿ ಆಕರ್ಷಕವಾಗಿ ತೋರುತ್ತದೆ. ಇದರಿಂದ ಆರೋಗ್ಯಕರ ಪೋಷಕಾಂಶಗಳನ್ನೂ ಸುಲಭವಾಗಿ ಸೇರಿಸಬಹುದು.

Photo Credit: ಸಂಗ್ರಹ ಚಿತ್ರ

ಕಾಜು ಪುಲಾವ್ ತಯಾರಿಸಲು ಅಗತ್ಯವಿರುವ ಸಾಮಗ್ರಿಗಳು

• ಬಾಸುಮತಿ ಅಕ್ಕಿ

• ಗೋಡಂಬಿ (ಕಾಜು)

• ಈರುಳ್ಳಿ

• ಹಸಿ ಮೆಣಸಿನಕಾಯಿ

• ಬೆಳ್ಳುಳ್ಳಿ

• ಏಲಕ್ಕಿ

• ಲವಂಗ

• ದಾಲ್ಚಿನ್ನಿ

• ಚಕ್ರಮೊಗ್ಗು

• ತುಪ್ಪ

• ರುಚಿಗೆ ತಕ್ಕಷ್ಟು ಉಪ್ಪು

• ನೀರು

ಕಾಜು ಪುಲಾವ್ ತಯಾರಿಸುವ ವಿಧಾನ

- ಮೊದಲು ಎರಡು ಕಪ್ ಬಾಸುಮತಿ ಅಕ್ಕಿಯನ್ನು ಚೆನ್ನಾಗಿ ತೊಳೆದು, ಸುಮಾರು 30 ನಿಮಿಷಗಳ ಕಾಲ ಅಗತ್ಯ ಪ್ರಮಾಣದ ನೀರಿನಲ್ಲಿ ನೆನೆಯಲು ಬಿಡಿ.

- ಒಂದು ಪ್ರೆಶರ್ ಕುಕ್ಕರ್ ತೆಗೆದುಕೊಂಡು ಅದಕ್ಕೆ 2 ಚಮಚ ತುಪ್ಪ ಹಾಕಿ ಮಧ್ಯಮ ಉರಿಯಲ್ಲಿ ಬಿಸಿ ಮಾಡಿ.

- ತುಪ್ಪ ಕಾದ ನಂತರ ಏಲಕ್ಕಿ, ಲವಂಗ, ದಾಲ್ಚಿನ್ನಿ ಮತ್ತು ಚಕ್ರಮೊಗ್ಗನ್ನು ಸೇರಿಸಿ ಪರಿಮಳ ಬರುವವರೆಗೆ ಹುರಿಯಿರಿ.

- ಮಸಾಲೆಗಳ ಘಮ ಬಂದ ನಂತರ, ಸಣ್ಣದಾಗಿ ಹೆಚ್ಚಿದ ಬೆಳ್ಳುಳ್ಳಿ ಮತ್ತು ಹಸಿರು ಮೆಣಸಿನಕಾಯಿ ಸೇರಿಸಿ.

- ಈಗ ಈರುಳ್ಳಿಯನ್ನು ಹಾಕಿ ಅದು ಹೊಂಬಣ್ಣಕ್ಕೆ ತಿರುಗುವವರೆಗೆ ಚೆನ್ನಾಗಿ ಬಾಡಿಸಿ.

- ಈಗ ನೆನೆಸಿದ ಅಕ್ಕಿಯ ನೀರನ್ನು ಪೂರ್ಣವಾಗಿ ಸೋಸಿಕೊಳ್ಳಿ. ಕುಕ್ಕರ್‌ಗೆ ಗೋಡಂಬಿ, ನೆನೆಸಿದ ಅಕ್ಕಿ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ನಿಧಾನವಾಗಿ ಬೆರೆಸಿ. ಅಕ್ಕಿ ಮುರಿಯದಂತೆ ಎಚ್ಚರಿಕೆ ವಹಿಸಿ.

- ಈಗ ಸುಮಾರು ಒಂದೂವರೆ ಲೋಟ ನೀರನ್ನು ಕುಕ್ಕರ್‌ಗೆ ಸೇರಿಸಿ. ಕುಕ್ಕರ್ ಮುಚ್ಚಳ ಮುಚ್ಚಿ ಕೇವಲ ಒಂದು ಸೀಟಿ ಕೂಗಿಸಿ.

- ನಂತರ ಉರಿಯನ್ನು ಆರಿಸಿ. ಪ್ರೆಶರ್ ಪೂರ್ಣವಾಗಿ ಇಳಿದ ನಂತರ ಮುಚ್ಚಳವನ್ನು ತೆಗೆಯಿರಿ. ಇಷ್ಟು ಮಾಡಿದರೆ ಸಾಕು ಬಿಸಿಬಿಸಿಯಾದ ಕಾಜು ಪುಲಾವ್ ಈಗ ಸಿದ್ಧ!

ಸವಿಯುವುದು ಹೇಗೆ?

• ಈ ರಾಯಲ್ ಕಾಜು ಪುಲಾವ್ ಅನ್ನು ನೀವು ವಿವಿಧ ಬಗೆಯಲ್ಲಿ ಸವಿಯಬಹುದು. ಈರುಳ್ಳಿ ಅಥವಾ ಸೌತೆಕಾಯಿಯ ಮೊಸರು ಬಜ್ಜಿಯೊಂದಿಗೆ ಇದು ಅದ್ಭುತವಾಗಿ ಹೊಂದುತ್ತದೆ, ಊಟದ ರುಚಿಯನ್ನು ಮತ್ತಷ್ಟು ಹೆಚ್ಚಿಸುತ್ತದೆ.

• ಇದಲ್ಲದೆ, ಮಶ್ರೂಮ್ ಮಸಾಲಾ ಅಥವಾ ಪನೀರ್ ಗ್ರೇವಿಯಂತಹ ಸೈಡ್ ಡಿಶ್‌ಗಳೊಂದಿಗೆ ಇದನ್ನು ಸರ್ವ್ ಮಾಡಿದರೆ ಹೋಟೆಲ್ ಊಟದ ಅನುಭವ ಸಿಗುತ್ತದೆ, ಇದು ಅತಿಥಿಗಳಿಗೆ ವಿಶೇಷ ಸಂತೋಷ ನೀಡುತ್ತದೆ.

• ಅಲಂಕಾರಕ್ಕಾಗಿ, ಮೇಲೆ ಸ್ವಲ್ಪ ತಾಜಾ ಕೊತ್ತಂಬರಿ ಸೊಪ್ಪು ಅಥವಾ ಇನ್ನೂ ಸ್ವಲ್ಪ ತುಪ್ಪದಲ್ಲಿ ಹುರಿದ ಗೋಡಂಬಿಗಳನ್ನು ಹಾಕಿದರೆ ನೋಡಲು ಮತ್ತಷ್ಟು ಆಕರ್ಷಕವಾಗಿರುತ್ತದೆ. ಜೊತೆಗೆ ರುಚಿಯನ್ನೂ ಹೆಚ್ಚು ಮಾಡುತ್ತದೆ.

ಒಟ್ಟಾರೆ, ಕಾಜು ಪುಲಾವ್ (Cashew Rice Recipe) ತಯಾರಿಸಲು ಸುಲಭ ಮತ್ತು ತಿನ್ನಲು ಅತ್ಯಂತ ರುಚಿಕರವಾದ ಖಾದ್ಯವಾಗಿದೆ. ವಿಶೇಷವಾಗಿ, ಚಳಿಗಾಲದಲ್ಲಿ ಕುಟುಂಬದ ಸದಸ್ಯರೆಲ್ಲರೂ ಒಟ್ಟಾಗಿ ಕುಳಿತು ಸವಿಯಲು ಇದು ಸೂಕ್ತವಾಗಿದೆ. ಈ ವಾರಾಂತ್ಯದಲ್ಲಿ ನೀವು ಈ ರೆಸಿಪಿಯನ್ನು ಒಮ್ಮೆ ಟ್ರೈ ಮಾಡಿ. ನಿಮ್ಮ ಮನೆಯ ಅಥವಾ ಅತಿಥಿಗಳ ಮೆಚ್ಚುಗೆ ಪಡೆಯಿರಿ.