ಆರೋಗ್ಯಕ್ಕೆ ಬೆಸ್ಟ್, ಊಟದ ರುಚಿ ಹೆಚ್ಚಿಸುವ ಟೇಸ್ಟ್! ಇಲ್ಲಿದೆ ಪಾಲಕ್ ತಂಬುಳಿ

ಪಾಲಕ್ ಸೊಪ್ಪಿನ ಹಲವು ರೀತಿಯ ಪ್ರಯೋಜನಗಳನ್ನು ನೀವು ತಿಳಿದಿರಬಹುದು. ಅದ್ರಲ್ಲೂ ಪಾಲಕ್‌ನಿಂದ ರುಚಿ ರುಚಿಯ ಖಾದ್ಯಗಳ ಮಾಡಿ ಸವಿದಿರುತ್ತೀರಿ. ಹಾಗೆ ಪಾಲಕ್ ನಿಮ್ಮ ದೇಹಕ್ಕೆ ಕೂಡ ಬಹಳ ಉತ್ತಮ ಹಸಿರು ತರಕಾರಿಯಾಗಿದೆ. ಪಾಲಕ್ ಸೊಪ್ಪು ಕಬ್ಬಿಣ, ವಿಟಮಿನ್ ಎ, ಸಿ, ಮತ್ತು ಕೆ, ಫೋಲೇಟ್, ಮತ್ತು ನಾರಿನಾಂಶಗಳಂತಹ ಪೋಷಕಾಂಶಗಳ ಹೊಂದಿದೆ.

ಈ ಪಾಲಕ್ ಸೊಪ್ಪು ರಕ್ತಹೀನತೆ ತಡೆಗಟ್ಟಲು, ಮೂಳೆಗಳನ್ನು ಬಲಪಡಿಸಲು, ದೃಷ್ಟಿ ಮತ್ತು ಚರ್ಮದ ಆರೋಗ್ಯವನ್ನು ಸುಧಾರಿಸಲು, ಹಾಗೂ ಮಲಬದ್ಧತೆ ನಿವಾರಿಸಲು ಸಹಕಾರಿಯಾಗಿದೆ. ಕೆಲವು ಅಧ್ಯಯನಗಳ ಪ್ರಕಾರ ಪಾಲಕ್ ಸೊಪ್ಪು ಕ್ಯಾನ್ಸರ್ ಅಪಾಯವನ್ನು ಕಡಿಮೆ ಮಾಡಬಹುದು ಎಂದು ಸಹ ವಿವರಿಸಲಾಗಿದೆ.

ಪಾಲಕ್‌ ಸೊಪ್ಪು ಬಳಸಿ ಹಲವು ರೀತಿಯ ಖಾದ್ಯಗಳ ಮಾಡಿ ಸವಿಯುತ್ತೀರಿ. ಅದ್ರಲ್ಲೂ ಪಾಲಕ್ ಸೊಪ್ಪಿನ ವಡೆ, ದೋಸೆ, ಹಾಗೆ ಗ್ರೇವಿ ಸೇರಿದಂತೆ ವಿವಿಧ ಖಾದ್ಯಗಳ ಮಾಡಿ ಸವಿಯೋದು ಸಾಮಾನ್ಯ. ಆದರೆ ನಾವಿಂದು ಪಾಲಕ್‌ನಿಂದ ಮಾಡುವಂತಹ ತಂಬುಳಿ ಕುರಿತು ತಿಳಿದುಕೊಳ್ಳೋಣ. ಇದು ನಿಮ್ಮ ದೇಹಕ್ಕೆ ಬಹಳ ತಂಪು ನೀಡಲಿದೆ.

ಹಾಗಾದ್ರೆ ಈ ಪಾಲಕ್ ಸೊಪ್ಪಿನ ತಂಬುಳಿ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕು? ಮಾಡುವ ವಿಧಾನವೇನು? ಹೇಗೆ ತಯಾರಿ ಮಾಡಿಕೊಳ್ಳಬೇಕು ಎಂಬುದನ್ನು ನಾವಿಂದು ತಿಳಿಯೋಣ.

ಪಾಲಕ್ ಸೊಪ್ಪಿನ ತಂಬುಳಿ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕು?

• ಪಾಲಕ್ ಸೊಪ್ಪು
• ತೆಂಗಿನಾಕಾಯಿ
• ಜೀರಿಗೆ
• ಸಾಸಿವೆ
• ತುಪ್ಪ ಅಥವಾ ಬೆಣ್ಣೆ
• ಉಪ್ಪು
• ಒಣ ಮೆಣಸು
• ಹಸಿ ಮೆಣಸು
• ಕರಿಬೇವು

ಪಾಲಕ್ ಸೊಪ್ಪಿನ ತಂಬುಳಿ ಮಾಡುವ ಸುಲಭದ ವಿಧಾನವೇನು?

ಪಾಲಕ್ ಸೊಪ್ಪನ್ನು ಚೆನ್ನಾಗಿ ತೊಳೆದು ನಂತರ ದೊಡ್ಡದಾಗಿ ಕತ್ತರಿಸಿಕೊಂಡು ಇಟ್ಟುಕೊಳ್ಳಿ. ಈಗ ಒಲೆ ಮೇಲೆ ಒಂದು ಬಾಣಲೆ ಇಟ್ಟು ಅದಕ್ಕೆ ಅರ್ಧ ಚಮಚ ತುಪ್ಪ ಅಥವಾ ಬೆಣ್ಣೆ ಹಾಕಿ ಬಿಸಿ ಮಾಡಿ.

ಅನಂತರ ಇದಕ್ಕೆ ಜೀರಿಗೆ ಹಾಗೂ 1 ಹಸಿ ಮೆಣಸು ಹಾಕಿ ಹುರಿದುಕೊಳ್ಳಬೇಕು. 1 ನಿಮಿಷ ಬಿಟ್ಟು ಇದಕ್ಕೆ ಕತ್ತರಿಸಿಕೊಂಡ ಪಾಲಕ್ ಸೊಪ್ಪು ಹಾಕಿಕೊಂಡು ಹುರಿದುಕೊಳ್ಳಬೇಕು. ಸಣ್ಣ ಉರಿಯಲ್ಲಿ ಇದನ್ನು ಹುರಿದುಕೊಳ್ಳಬೇಕು. ಈ ಸೊಪ್ಪು ಬಾಡಿದ ಬಳಿಕ ಒಲೆ ಆಫ್ ಮಾಡಿ ತಣ್ಣಗಾಗಲು ಬಿಡಿ.

ಈಗ ಒಂದು ಮಿಕ್ಸಿ ಜಾರ್ ತೆಗೆದುಕೊಂಡು ಅದಕ್ಕೆ ತೆಂಗಿನಕಾಯಿ ಹಾಕಿಕೊಳ್ಳಿ. ಹಾಗೆ ಹುರಿದುಕೊಂಡ ಸೊಪ್ಪು ಸೇರಿ ಎಲ್ಲಾ ಪದಾರ್ಥ ಹಾಕಿ, ನೀರು, ಉಪ್ಪು ಸಹ ಹಾಕಿ ನುಣ್ಣಗೆ ರುಬ್ಬಿಕೊಳ್ಳಬೇಕು.

ರುಬ್ಬಿಕೊಂಡ ಈ ತಂಬುಳಿಯನ್ನು ಒಂದು ಪಾತ್ರೆಗೆ ಹಾಕಿಟ್ಟುಕೊಳ್ಳಿ. ಅನಂತರ ಈ ಪಾಲಕ್ ಗ್ರೇವಿಗೆ ಮಜ್ಜಿಗೆ ಹಾಕಿಕೊಳ್ಳಿ. ಈಗ ಒಂದು ಒಗ್ಗರಣೆ ಮಾಡಿಕೊಳ್ಳಿ.

ಒಲೆ ಮೇಲೆ ಬಾಣಲೆ ಇಟ್ಟು ಅದಕ್ಕೆ ಎಣ್ಣೆ ಹಾಕಿ ಸಾಸಿವೆ, ಜೀರಿಗೆ, ಒಣ ಮೆಣಸು, ಕರಿಬೇವು ಹಾಕಿ ಒಗ್ಗರಣೆ ಮಾಡಿ ಈ ತಂಬುಳಿಗೆ ಹಾಕಿ ಮಿಕ್ಸ್ ಮಾಡಿಕೊಂಡರೆ ನಿಮ್ಮ ಮುಂದೆ ಪಾಲಕ್ ಸೊಪ್ಪಿನ ತಂಬುಳಿ ಸಿದ್ದವಾಗುತ್ತೆ. ನೀವು ಕೂಡ ಊಟದೊಂದಿಗೆ ಸವಿಯಲು ಈ ತಂಬುಳಿ ಮಾಡಿ ಸವಿದು ನೋಡಿ. ಅದರ ರುಚಿಗೆ ಊಟದ ಮಜಾ ಮತ್ತಷ್ಟು ಹೆಚ್ಚಾಗೋದು ಖಚಿತ.