1 ಕಪ್ ರಾಗಿ ಸಾಕು! ಹೆಲ್ದಿ & ಟೇಸ್ಟಿ ರಾಗಿ ಬೋಂಡಾ ರೆಡಿ.. ಮಾಡೋದು ಹೇಗೆ?

ಕೇವಲ 1 ಕಪ್ ರಾಗಿ ಸಾಕು! ಮಕ್ಕಳು ಇಷ್ಟಪಡುವ ಪೌಷ್ಟಿಕ ಮತ್ತು ರುಚಿಕರವಾದ ತಿಂಡಿಯನ್ನು ನೀವು ಮಾಡಬಹುದು. ಎಲ್ಲರಿಗೂ ಸ್ನ್ಯಾಕ್ಸ್ ತಿನ್ನಲು ತುಂಬಾ ಇಷ್ಟ. ದೊಡ್ಡವರು ಕೂಡ ಇಷ್ಟಪಟ್ಟು ತಿನ್ನುತ್ತಾರೆ. ಮಕ್ಕಳ ಆರೋಗ್ಯ, ದೊಡ್ಡವರಿಗೆ ಬರುವ ಸಕ್ಕರೆ ಕಾಯಿಲೆ ಇವುಗಳನ್ನು ಯೋಚಿಸಿ ನಾವು ಸ್ನ್ಯಾಕ್ಸ್ ಗಳನ್ನು ಕಡಿಮೆ ಮಾಡುತ್ತೇವೆ. ಆದರೆ, ನಾವು ಆರೋಗ್ಯಕರವಾಗಿ ಮನೆಯಲ್ಲೇ ಮಾಡುವ ಸ್ನ್ಯಾಕ್ಸ್ ಗಳು ಮಕ್ಕಳಿಗೆ ಮತ್ತು ದೊಡ್ಡವರಿಗೂ ಸೂಕ್ತವಾಗಿದ್ದರೆ ಹೇಗಿರುತ್ತೆ? ಹಾಗೆಯೇ ಹಲವು ಆರೋಗ್ಯಕರ ಗುಣಗಳನ್ನು ಹೊಂದಿರುವ ಒಂದು ಸ್ನ್ಯಾಕ್ಸ್ ರಾಗಿ ಬೋಂಡಾ (Ragi Bonda). ಇದನ್ನು ಹೇಗೆ ಮಾಡುವುದು ಎಂದು ತಿಳಿಯೋಣ ಬನ್ನಿ.

ರಾಗಿ ಬೋಂಡಾವು ಕರ್ನಾಟಕದ ಒಂದು ಜನಪ್ರಿಯ ತಿಂಡಿ. ರಾಗಿ ಬೋಂಡಾ (Ragi Bonda Recipe) ತಯಾರಿಸುವುದು ಸುಲಭ ಮತ್ತು ಆರೋಗ್ಯಕರವೂ ಆಗಿದೆ. ರಾಗಿಯು ಪೌಷ್ಟಿಕಾಂಶಗಳಿಂದ ತುಂಬಿದ್ದು, ಬೋಂಡಾ ಮಾಡುವ ಮೂಲಕ ಅದರ ರುಚಿಯನ್ನು ಹೆಚ್ಚಿಸಬಹುದು. ಈ ರಾಗಿ ಬೋಂಡಾವನ್ನು ಟೊಮೆಟೊ ಸಾಸ್ ಅಥವಾ ಚಟ್ನಿಯೊಂದಿಗೆ ಸವಿಯಬಹುದು. ಸಂಜೆಯ ಟೀ ಟೈಮ್‌ಗೆ ಇದು ಉತ್ತಮ ತಿಂಡಿಯಾಗಿದೆ. ರಾಗಿಯಲ್ಲಿ ಕ್ಯಾಲ್ಸಿಯಂ ಮತ್ತು ಕಬ್ಬಿಣಾಂಶ ಹೆಚ್ಚಿರುವುದರಿಂದ ಇದು ಆರೋಗ್ಯಕ್ಕೂ ಒಳ್ಳೆಯದು.

ರಾಗಿ ಬೋಂಡಾ ತಯಾರಿಸಲು ಬೇಕಾಗುವ ಪದಾರ್ಥಗಳು

• 1 ಕಪ್ ರಾಗಿ ಹಿಟ್ಟು - 1 ಕಪ್
• 1 ಕಪ್ ಗೋಡಂಬಿ
• ಸ್ವಲ್ಪ ಕೊತ್ತಂಬರಿ ಸೊಪ್ಪು
• ಸ್ವಲ್ಪ ಪುದೀನಾ
• 2 ಹಸಿ ಮೆಣಸಿನಕಾಯಿ
• ಒಂದು ಚಿಟಿಕೆ ಇಂಗು
• ಸ್ವಲ್ಪ ಶುಂಠಿ
• 10 ಅಥವಾ 12 ಎಸಳು ಬೆಳ್ಳುಳ್ಳಿ
• ½ ಸ್ಪೂನ್ ಜೀರಿಗೆ ಪುಡಿ
• ½ ಸ್ಪೂನ್ ಮೆಣಸು
• ರುಚಿಗೆ ತಕ್ಕಷ್ಟು ಉಪ್ಪು
• 2 ಈರುಳ್ಳಿ
• ಕರಿಬೇವು
• ಎಣ್ಣೆ (ಕರಿಯಲು)

ರಾಗಿ ಬೋಂಡಾ ಮಾಡುವ ವಿಧಾನ

ಮೊದಲು, ಈರುಳ್ಳಿ ಮತ್ತು ಬೆಳ್ಳುಳ್ಳಿಯನ್ನು ಸಿಪ್ಪೆ ತೆಗೆದು ಸ್ವಚ್ಛಗೊಳಿಸಿ. ಈರುಳ್ಳಿಯ ಮೇಲ್ಮೈಯಲ್ಲಿ ಕಪ್ಪು ಬಣ್ಣದ ಶಿಲೀಂಧ್ರವಿದ್ದರೆ ತೊಳೆದು ಸ್ವಚ್ಛಗೊಳಿಸಿ. ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಟ್ಟುಕೊಳ್ಳಿ. ಶುಂಠಿಯನ್ನು ಮಣ್ಣಿಲ್ಲದೆ ತೊಳೆದು ಸಿಪ್ಪೆ ತೆಗೆದು ಸಣ್ಣಗೆ ಹೆಚ್ಚಿಕೊಳ್ಳಿ. ಸಿಪ್ಪೆ ತೆಗೆದ ಬೆಳ್ಳುಳ್ಳಿ ಮತ್ತು ಹೆಚ್ಚಿದ ಶುಂಠಿಯನ್ನು ಮಿಕ್ಸಿ ಜಾರಿಗೆ ಹಾಕಿ ರುಬ್ಬಿಕೊಳ್ಳಿ. ಹಸಿ ಮೆಣಸಿನಕಾಯಿಯನ್ನು ಸ್ವಚ್ಛವಾಗಿ ತೊಳೆದು ಸಣ್ಣಗೆ ಹೆಚ್ಚಿಕೊಳ್ಳಿ. ಪುದೀನಾ ಮತ್ತು ಕೊತ್ತಂಬರಿ ಸೊಪ್ಪನ್ನು ಮಣ್ಣಿಲ್ಲದೆ ಸ್ವಚ್ಛವಾಗಿ ತೊಳೆದು ಸಣ್ಣಗೆ ಹೆಚ್ಚಿಕೊಳ್ಳಿ. ಕರಿಬೇವನ್ನು ಸ್ವಚ್ಛವಾಗಿ ತೊಳೆದು ಸ್ವಲ್ಪ ಸ್ವಲ್ಪವೇ ಕತ್ತರಿಸಿ ಇಟ್ಟುಕೊಳ್ಳಿ.

ಒಣಗಿದ ಮಿಕ್ಸಿ ಜಾರಿಗೆ ಗೋಡಂಬಿಯನ್ನು ಹಾಕಿ ನುಣ್ಣಗೆ ರುಬ್ಬಿ. ಅಗತ್ಯವಿದ್ದರೆ ಉಳಿದದ್ದನ್ನು ಮತ್ತೆ ರುಬ್ಬಿ ಜರಡಿ ಹಿಡಿದು ½ ಕಪ್ ನಷ್ಟು ತೆಗೆದುಕೊಳ್ಳಿ. ಅದೇ ರೀತಿ ಒಂದು ಕಪ್ ರಾಗಿ ಹಿಟ್ಟನ್ನು ಜರಡಿಯಲ್ಲಿ ಹಾಕಿ ಗಂಟುಗಳಿಲ್ಲದಂತೆ ಜರಡಿ ಹಿಡಿದುಕೊಳ್ಳಿ. ನಂತರ ಒಂದು ಬೌಲ್‌ನಲ್ಲಿ ಅಥವಾ ಒಂದು ಅಗಲವಾದ ಪಾತ್ರೆಯಲ್ಲಿ ರಾಗಿ ಹಿಟ್ಟು, ಗೋಡಂಬಿ ಹಿಟ್ಟು ಮತ್ತು ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ ಗಂಟುಗಳಿಲ್ಲದಂತೆ ಮಿಕ್ಸ್ ಮಾಡಿ. ಅದಕ್ಕೆ ಜೀರಿಗೆ ಪುಡಿ, ಮೆಣಸು, ಹೆಚ್ಚಿದ ಹಸಿ ಮೆಣಸಿನಕಾಯಿ, ಕೊತ್ತಂಬರಿ ಸೊಪ್ಪು, ಪುದೀನಾ, ಕರಿಬೇವು, ಹೆಚ್ಚಿದ ಈರುಳ್ಳಿ, ಇಂಗು ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.

ನಂತರ ಅದರಲ್ಲಿ ಸ್ವಲ್ಪ ಸ್ವಲ್ಪವೇ ನೀರು ಸೇರಿಸಿ ಗಟ್ಟಿಯಾಗಿ ಬೋಂಡಾ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. ಈಗ ಬಾಣಲೆಯನ್ನು ಒಲೆ ಮೇಲೆ ಇಟ್ಟು, ಎಣ್ಣೆ ಹಾಕಿ ಕಾಯಲು ಬಿಡಿ. ಎಣ್ಣೆ ಬಿಸಿಯಾದ ನಂತರ ಕಲಸಿದ ಹಿಟ್ಟನ್ನು ಸಣ್ಣ ಸಣ್ಣ ಉಂಡೆಗಳನ್ನಾಗಿ ಮಾಡಿ ಎಣ್ಣೆಯಲ್ಲಿ ಹಾಕಿ ಬೇಯಿಸಿ. ಚೆನ್ನಾಗಿ ಬೆಂದ ನಂತರ ತೆಗೆದು ಎಣ್ಣೆಯನ್ನು ಬಸಿದು ಆರಲು ಬಿಡಿ. ಇದೇ ರೀತಿ ಉಳಿದ ಹಿಟ್ಟನ್ನು ಕರಿದರೆ ರುಚಿಯಾದ ಆರೋಗ್ಯಕರ ರಾಗಿ ಬೋಂಡಾ ಸವಿಯಲು ಸಿದ್ಧ. ಈ ರಾಗಿ ಬೋಂಡಾವನ್ನು ಟೊಮೆಟೊ ಸಾಸ್ ಅಥವಾ ಚಟ್ನಿಯೊಂದಿಗೆ ಸವಿಯಬಹುದು.