ಡಾಬಾ ಶೈಲಿಯ ಮೊಟ್ಟೆ ಕರಿ: ಎಗ್‌ ಮಸಾಲೆ ಪುಡಿ ಬೇಕಾಗಿಲ್ಲ ಈ ಸ್ವಾದಿಷ್ಟಕರ ಎಗ್‌ ಕರಿಗೆ

ಈ ಡಾಬಾಗಳಲ್ಲಿ ಮೊಟ್ಟೆ ಸಾರು ತುಂಬಾನೇ ರುಚಿಯಾಗಿರುತ್ತದೆ ಅಲ್ವಾ? ಏನಾದರೂ ಸ್ಪೆಷಲ್ ಮಸಾಲೆ ಹಾಕುತ್ತಾರಾ? ಅದಕ್ಕೆ ಇಷ್ಟೊಂದು ರುಚಿನಾ ಅನಿಸುವುದು, ಆದರೆ ನೀವು ಡಾಬಾ ಶೈಲಿಯ ಮೊಟ್ಟೆ ಕರಿಯನ್ನು ಮನೆಯಲ್ಲಿರುವ ಮಸಾಲೆ ಬಳಸಿ, ಹೊರಗಿನ ಯಾವುದೇ ಮಸಾಲೆ ಪುಡಿ ಸೇರಿಸದೆ ರುಚಿಯಾಗಿ ಮಾಡಬಹುದು, ಬನ್ನಿ ಈ ಸರಳ ರೆಸಿಪಿಯತ್ತ ಕಣ್ಣಾಡಿಸೋಣ:

ಬೇಕಾಗುವ ಸಾಮಗ್ರಿ

ಮೊಟ್ಟೆ 5-6
ಪಲಾವ್ ಎಲೆ
ಸ್ವಲ್ಪ ಚಕ್ಕೆ
2 ಏಲಕ್ಕಿ
3-4 ಲವಂಗ
1/2 ಚಮಚ ಸೋಂಪು
ಎಣ್ಣೆ 2 ಚಮಚ

ಖಾರದ ಪುಡಿ (ನಿಮ್ಮ ಖಾರಕ್ಕೆ ತಕ್ಕಷ್ಟು)
1/2 ಚಮಚ ಅರಿಶಿಣ ಪುಡಿ
1/2 ಚಮಚ ಗರಂ ಮಸಾಲ ಪುಡಿ
ರುಚಿಗೆ ತಕ್ಕ ಉಪ್ಪು
ಟೊಮೆಟೊ 5-6
ಈರುಳ್ಳಿ 1
ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ 1 ಚಮಚ
ಸ್ವಲ್ಪ ಕೊತ್ತಂಬರಿ ಸೊಪ್ಪು
ಫ್ರೆಶ್‌ ಕ್ರೀಮ್‌ (Optional)

ಮಾಡುವ ವಿಧಾನ

• ನೀವು ಮೊಟ್ಟೆ ಬೇಯಿಸಿ ಸಿಪ್ಪೆ ಸುಲಿದು ಇಡಿ
• ಟೊಮೆಟೊವನ್ನು ಚಿಕ್ಕದಾಗಿ ಕತ್ತರಿಸಿ ಪೇಸ್ಟ್ ಮಾಡಿ(ಪೇಸ್ಟ್ ಮಾಡದೆಯೂ ಬಳಸಬಹುದು)
• ನೀವು ಪಾತ್ರೆ ಬಿಸಿ ಮಾಡಿ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದಾಗ ಚಕ್ಕೆ, ಲವಂಗ ಹಾಕಿ
• ಈಗ ಅರ್ಧ ಚಮಚ ಸೋಂಪು ಸೇರಿಸಿ,ಪಲಾವ್ ಎಲೆ ಕೈಯಿಂದಲೇ ಪುಡಿ ಮಾಡಿ ಸೇರಿಸಿ
• ನಂತರ ಈರುಳ್ಳಿ ಹಾಕಿ, ಈರುಳ್ಳಿ ಸ್ವಲ್ಪ ಕಂದು ಬಣ್ಣ ಬರುವವರೆಗೆ ಫ್ರೈ ಮಾಡಿ
• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ
• ನಂತರ ಟೊಮೆಟೊ ಹಾಕಿ, ಟೊಮೆಟೊಪೇಸ್ಟ್ ಹಾಕಬಹುದು, ಇಲ್ಲಾ ಟೊಮೆಟೊ ಹಾಕಿ ಅದು ಮೆತ್ತಗಾಗುವವರೆಗೆ ಸೌಟ್‌ನಿಂದ ಪ್ರೆಸ್‌ ಮಾಡಿ, ರುಚಿಗೆ ತಕ್ಕ ಉಪ್ಪು ಸೇರಿಸಿ
• ಬಳಿಕ ಖಾರದ ಪುಡಿ, ಅರಿಶಿಣ ಪುಡಿ, ಗರಂ ಮಸಾಲ ಪುಡಿ ಸೇರಿಸಿ
• ಎಣ್ಣೆ ಮೇಲ್ಭಾಗದಲ್ಲಿ ತೇಲಿ ಬರುವಂತೆ ಫ್ರೈ ಮಾಡಿ, ನಂತರ ಎಷ್ಟು ಗ್ರೇವಿ ಬೇಕೋ ಅಷ್ಟು ನೀರು ಸೇರಿಸಿ ಕುದಿಸಿ
• ಮೊಟ್ಟೆಯ ಮೇಲೆ ಚಾಕುವಿನಿಂದ ಗೆರೆ ಎಳೆದು ಗ್ರೇವಿಗೆ ಸೇರಿಸಿ ಕಡಿಮೆ ಉರಿಯಲ್ಲಿ ಮತ್ತೆ 5 ನಿಮಿಷ ಕುದಿಸಿ
• ನಂತರ ಸ್ವಲ್ಪ ನಿಂಬೆ ರಸ ಹಿಂಡಿ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ಡಾಬಾ ಶೈಲಿಯ ಮೊಟ್ಟೆಯ ಗ್ರೇವಿ ರೆಡಿ.

ಇತರ ಸಲಹೆ
ಇದಕ್ಕೆ ಟೊಮೆಟೊ ಪೇಸ್ಟ್ ಎಣ್ಣೆಯಲ್ಲಿ ಬೇಯುವಾಗ ಒಂದು ಮೊಟ್ಟೆ ಹಾಕಿ ಮಿಕ್ಸ್ ಮಾಡಿ ನಂತರ ಗ್ರೇವಿಗೆ ಬೇಯಿಸಿದ ಮೊಟ್ಟೆ ಸೇರಿಸಿದರೆ ಅದರ ಟೇಸ್ಟ್ ಇನ್ನೂ ಭಿನ್ನವಾಗಿರುತ್ತದೆ.
ನೀವು ಈ ಗ್ರೇವಿಗೆ ಫ್ರೆಶ್‌ ಕ್ರೀಮ್‌ ಸೇರಿಸಿದರೆ ಇನ್ನೂ ರುಚಿಯಾಗಿರುತ್ತದೆ.
ನೀವು ಮೊಟ್ಟೆಯನ್ನು ಸ್ವಲ್ಪ ಫ್ರೈ ಮಾಡಿ ಸೇರಿಸಬಹುದು. ಬಾಣಲೆಗೆ ಸ್ವಲ್ಪ ಎಣ್ಣೆ ಹಾಕಿ ಅದಕ್ಕೆ ಸ್ವಲ್ಪ ಅರಿಶಿಣ ಪುಡಿ, ಉಪ್ಪಿನ ಪುಡಿ, ಖಾರದ ಪುಡಿ ಸೇರಿಸಿ, ಅದರಲ್ಲಿ ಮೊಟ್ಟೆ ಹಾಕಿ ಸ್ವಲ್ಪ ಫ್ರೈ ಮಾಡಿ ಸೇರಿಸಿದರೆ ರುಚಿ ಚೆನ್ನಾಗಿರುತ್ತದೆ.