ಕೊಯಮತ್ತೂರು ಸ್ಪೆಷಲ್ ಚಟ್ನಿ.. ಇಡ್ಲಿ ಜೊತೆ ತಿಂದ್ರೆ ಬೆರಳು ಚಪ್ಪರಿಸುತ್ತೀರ! ಮಾಡುವುದು ಹೇಗೆ?

ಒಮ್ಮೆ ತಿಂದರೆ ಕಳೆದುಹೋಗ್ತೀರ! ಇಡ್ಲಿಗೆ ಸೂಪರ್ ಜೋಡಿ, ಕೋಯಮತ್ತೂರಿನ ರಸ್ತೆಗಳ ಫೇಮಸ್ ಚಟ್ನಿ (Coimbatore special chutney) ಇದು. ಬೆಳಗ್ಗೆ ಬಿಸಿ ಬಿಸಿ ಮಲ್ಲಿಗೆ ಹೂವಿನಂತಹ ಮೃದುವಾದ ಇಡ್ಲಿಗಳಿಗೆ ಉತ್ತಮ ಚಟ್ನಿ (chutney) ಇಲ್ಲದಿದ್ದರೆ, ಆ ಇಡ್ಲಿಗಳ ರುಚಿ ಅಪೂರ್ಣ. ಪ್ರತಿದಿನ ಮಾಡುವ ತೆಂಗಿನಕಾಯಿ ಚಟ್ನಿ, ಶೇಂಗಾ ಚಟ್ನಿ ಹೊರತುಪಡಿಸಿ, ಹೊಸದಾದ, ರುಚಿಕರವಾದ, ಮತ್ತೆ ಮತ್ತೆ ತಿನ್ನಬೇಕೆನಿಸುವ ಚಟ್ನಿಗಾಗಿ ಹುಡುಕುತ್ತಿದ್ದೀರಾ? ಹಾಗಿದ್ದರೆ ಕೋಯಂಬತ್ತೂರು ರೋಡ್‌ಸೈಡ್ ಟೊಮೆಟೊ ವಾಟರ್ ಚಟ್ನಿಯನ್ನು (tomato water chutney) ಒಮ್ಮೆ ಪ್ರಯತ್ನಿಸಿ. ಹೆಸರೇ ಸೂಚಿಸುವಂತೆ ಈ ಚಟ್ನಿ ಸ್ವಲ್ಪ ನೀರಾಗಿ, ತೆಳ್ಳಗಿರುತ್ತದೆ. ಆದರೆ, ಅದರ ರುಚಿ ಮಾತ್ರ ಅದ್ಭುತ.

ಕೋಯಂಬತ್ತೂರು ಬೀದಿ ಬದಿಯ ಬಂಡಿಗಳ ಮೇಲೆ ಮಾರಾಟವಾಗುವ ಈ ಚಟ್ನಿಗೆ ಒಂದು ವಿಶೇಷತೆ ಇದೆ. ಇದರ ಸುವಾಸನೆ, ಇದರ ರುಚಿ ನಿಮ್ಮನ್ನು ಮಂತ್ರಮುಗ್ಧರನ್ನಾಗಿಸುತ್ತದೆ. ಈ ಚಟ್ನಿಯೊಂದಿಗೆ ಒಮ್ಮೆ ಇಡ್ಲಿ ತಿಂದರೆ, ನೀವು ಸಾಮಾನ್ಯವಾಗಿ ತಿನ್ನುವುದಕ್ಕಿಂತ ನಾಲ್ಕೈದು ಇಡ್ಲಿಗಳನ್ನು ಹೆಚ್ಚಾಗಿ ತಿನ್ನುತ್ತೀರಿ. ಇದು ಇಡ್ಲಿಗಳಿಗೆ ಮಾತ್ರವಲ್ಲ, ಗರಿಗರಿಯಾದ ದೋಸೆ, ಮೃದುವಾದ ಉತ್ತಪ್ಪಂ, ಬಿಸಿ ಬಿಸಿ ವಡೆ.. ಹೀಗೆ ಯಾವುದೇ ತಿಂಡಿಯೊಂದಿಗೆ ತಿಂದರೂ ಆ ಟೇಸ್ಟ್ ನೆಕ್ಸ್ಟ್‌ ಲೆವೆಲ್. ಟೊಮೆಟೊ ವಾಟರ್ ಚಟ್ನಿಯನ್ನು ಹೇಗೆ ತಯಾರಿಸುವುದು ಎಂದು ಇಲ್ಲಿ ನೋಡಿ.

ಟೊಮೆಟೊ ವಾಟರ್ ಚಟ್ನಿಗೆ ಬೇಕಾಗುವ ಸಾಮಗ್ರಿಗಳು

• ಚೆನ್ನಾಗಿ ಹಣ್ಣಾದ ಟೊಮೆಟೊ
• ಅಡುಗೆ ಎಣ್ಣೆ
• ಜೀರಿಗೆ
• ಸಾಸಿವೆ
• ಈರುಳ್ಳಿ
• ಹಸಿ ಮೆಣಸಿನಕಾಯಿ
• ಕರಿಬೇವಿನ ಎಲೆಗಳು
• ಅರಿಶಿನ
• ಮೆಣಸಿನ ಪುಡಿ
• ಕೊತ್ತಂಬರಿ ಪುಡಿ
• ಕೊತ್ತಂಬರಿ ಸೊಪ್ಪು
• ರುಚಿಗೆ ತಕ್ಕಷ್ಟು ಉಪ್ಪು

ಟೊಮೆಟೊ ವಾಟರ್ ಚಟ್ನಿ ತಯಾರಿಸುವ ವಿಧಾನ

ಮೊದಲು ಟೊಮೆಟೊಗಳನ್ನು ಚೆನ್ನಾಗಿ ತೊಳೆಯಿರಿ. ಬಳಿಕ ಅವುಗಳ ಮೇಲೆ ಸಣ್ಣಗೆ ಗಾಯ ಮಾಡಿ. ಈಗ ಒಂದು ಪಾತ್ರೆಯಲ್ಲಿ ಒಂದೂವರೆ ಕಪ್ ನೀರು ಹಾಕಿ ಒಲೆಯ ಮೇಲೆ ಇಟ್ಟು, ಈ ಟೊಮೆಟೊಗಳನ್ನು ಅದರಲ್ಲಿ ಹಾಕಿ. ಟೊಮೆಟೊ ಸಿಪ್ಪೆ ಸುಲಭವಾಗಿ ಬಿಡಿಸಿಕೊಳ್ಳುವವರೆಗೆ ಸುಮಾರು ಐದು ನಿಮಿಷಗಳ ಕಾಲ ಬೇಯಿಸಿ. ಬೇಯಿಸಿದ ಟೊಮೆಟೊಗಳನ್ನು ನೀರಿನಿಂದ ತೆಗೆದು ಅವುಗಳ ಸಿಪ್ಪೆಯನ್ನು ತೆಗೆಯಿರಿ. ಅವು ಸಂಪೂರ್ಣವಾಗಿ ತಣ್ಣಗಾದ ನಂತರ ಮಿಕ್ಸಿ ಜಾರ್‌ಗೆ ಹಾಕಿ ನುಣ್ಣಗೆ ರುಬ್ಬಿ ಅಥವಾ ಪ್ಯೂರಿ ಮಾಡಿ ಪಕ್ಕಕ್ಕೆ ಇಡಿ.

ಈಗ ಒಲೆಯ ಮೇಲೆ ಆಳವಾದ ಬಾಣಲೆ ಇಟ್ಟು ಎಣ್ಣೆ ಹಾಕಿ. ಎಣ್ಣೆ ಬಿಸಿಯಾದ ನಂತರ, ಸಾಸಿವೆ, ಜೀರಿಗೆ ಹಾಕಿ ಚಟಪಟ ಸಿಡಿಯುವವರೆಗೆ ಹುರಿಯಿರಿ. ಸಾಸಿವೆ ಚಟಪಟನೆ ಸಿಡಿದ ನಂತರ ಸಣ್ಣಗೆ ಕತ್ತರಿಸಿದ ಈರುಳ್ಳಿ ಚೂರುಗಳು, ಹಸಿ ಮೆಣಸಿನಕಾಯಿ, ಕರಿಬೇವಿನ ಎಲೆಗಳನ್ನು ಹಾಕಿ, ಈರುಳ್ಳಿ ಗೋಲ್ಡ್ ಕಲರ್ ಬರುವವರೆಗೆ ಚೆನ್ನಾಗಿ ಹುರಿಯಿರಿ.

ಈರುಳ್ಳಿ ಚೆನ್ನಾಗಿ ಫ್ರೈ ಆದ ಬಳಿಕ ಮೊದಲೇ ತಯಾರಿಸಿಟ್ಟ ಟೊಮೆಟೊ ಪ್ಯೂರಿಯನ್ನು ಬಾಣಲೆಗೆ ಹಾಕಿ. ಅದರೊಂದಿಗೆ ಮತ್ತೊಂದು ಒಂದೂವರೆ ಕಪ್ ನೀರು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಈಗ ಅರಿಶಿನ, ಮೆಣಸಿನ ಪುಡಿ, ಕೊತ್ತಂಬರಿ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ. ಗಂಟುಗಳಿಲ್ಲದೆ ಎಲ್ಲವೂ ಚೆನ್ನಾಗಿ ಬೆರೆಯುವಂತೆ ಸೌಟಿನಿಂದ ತಿರುಗಿಸಿ. ಉರಿಯನ್ನು ಮಧ್ಯಮಕ್ಕೆ ಇಟ್ಟು ಚಟ್ನಿಯಿಂದ ಹಸಿ ವಾಸನೆ ಹೋಗಿ, ಎಣ್ಣೆ ಮೇಲೆ ಬರುವವರೆಗೆ ಸುಮಾರು 10 ನಿಮಿಷಗಳ ಕಾಲ ಬೇಯಿಸಿ. ಹೀಗೆ ಮಾಡಿದರೆ ಚಟ್ನಿ ಸ್ವಲ್ಪ ದಪ್ಪವಾಗುತ್ತದೆ.

ಅಂತಿಮವಾಗಿ ಸಣ್ಣಗೆ ಕತ್ತರಿಸಿದ ಕೊತ್ತಂಬರಿ ಸೊಪ್ಪನ್ನು ಹಾಕಿ. ಒಮ್ಮೆ ಮಿಕ್ಸ್ ಮಾಡಿ. ಬಳಿಕ ಗ್ಯಾಸ್ ಅಥವಾ ಒಲೆ ಆಫ್ ಮಾಡಿ. ಇಷ್ಟು ಮಾಡಿದರೆ ಘಮಘಮಿಸುವ, ಬಾಯಲ್ಲಿ ನೀರೂರಿಸುವ ಕೋಯಂಬತ್ತೂರು ರೋಡ್‌ಸೈಡ್ ಟೊಮೆಟೊ ವಾಟರ್ ಚಟ್ನಿ ಸಿದ್ಧವಾಗಲಿದೆ. ಇದನ್ನು ತಯಾರಿಸುವ ವಿಧಾನ ಸ್ವಲ್ಪ ವಿಭಿನ್ನವಾಗಿ ಕಂಡರೂ, ಒಮ್ಮೆ ಮಾಡಿ ನೋಡಿದರೆ ಮತ್ತೆ ಮತ್ತೆ ಇದನ್ನೇ ತಿನ್ನಬೇಕು ಅಂತೀರಾ. ಮನೆಯವರೆಲ್ಲರೂ ವಾಹ್, ಏನು ಚಟ್ನಿ ಮಾಡಿದ್ದೀರಿ ಅನ್ನೋದು ಖಚಿತ.