ಇಡೀ ಹೀರೇಕಾಯಿ ಚಟ್ನಿ

Chutney

oi-Staff

Published: Friday, January 8, 2010, 13:28 [IST]

ತರಕಾರಿ ಸಿಪ್ಪೆಗಳಿಂದ ಚಟ್ನಿ ತಯಾರಿಸುವುದು ರೂಢಿ. ಆದರೆ, ಚಟ್ನಿ ಮಾಡುವುದಕ್ಕೆ ಸಿಪ್ಪೆಗಾಗಿ ಕಾಯುವ ಅಗತ್ಯವಿಲ್ಲ. ಇಡೀ ತರಕಾರಿ ಬಳಸಿ ಚಟ್ನಿ ಮಾಡಿದರೆ ಅದರ ರುಚಿಯೇ ಬೇರೆ. ಮೊನ್ನೆ ಹೀರೇಕಾಯಿ ಹಾಕಿ ಚಟ್ನಿ ಮಾಡಿದ್ದೆವು. ಅವತ್ತು ನಮ್ಮ ಮನೆಯಲ್ಲಿ ಊಟಕ್ಕೆ ಅನ್ನ, ಹೀರೇಕಾಯಿ ಚಟ್ನಿ, ಮಜ್ಜಿಗೆ ಅಷ್ಟೆ.

ಬೇಕಾಗುವ ಪದಾರ್ಥಗಳು

ಸಿಪ್ಪೆ ತೆಗೆಯದ ಹೀರೇಕಾಯಿ 1 ಅಥವಾ 2
ಹಸಿಮೆಣಸಿನಕಾಯಿ 5
ಒಗ್ಗರಣೆಗೆ ಎಣ್ಣೆ, ಸಾಸಿವೆ, ಕರಿಬೇವು, ಕಡಲೆಬೇಳೆ
ತುಂಡು ಬೆಲ್ಲ, ಹುಣಸೆಹಣ್ಣು
ರುಚಿಗೆ ಉಪ್ಪು

ಮಾಡುವ ವಿಧಾನ

ಹೀರೇಕಾಯಿ ಚೆನ್ನಾಗಿ ತೊಳೆದು ಪೀಲರ್ ನಲ್ಲಿ ಹೀರೆಕಾಯಿಯ ಚೂಪಾದ ತುದಿಗಳನ್ನು ಮಾತ್ರ ಹೆರೆದುಕೊಳ್ಳಬೇಕು. ಆನಂತರ ಸಣ್ಣ ಹೋಳುಗಳನ್ನಾಗಿ ಹೆಚ್ಚಿಕೊಂಡು, ಕಾಯಿ ಬಲಿತಿದ್ದರೆ ಮಾತ್ರ ಬೀಜ ಮತ್ತು ಬಿಳಿಯಾದ ಅಂಶವನ್ನು ತೆಗೆದುಹಾಕಬೇಕು. ಸಿಪ್ಪೆ ಚಟ್ನಿಗೆ ಒಣಮೆಣಸಿನಕಾಯಿ ಹಾಕಿ ಮಾಡಿದರೆ, ಇಡೀ ಹೀರೇಕಾಯಿ ಚಟ್ನಿಗೆ ಹಸಿಮೆಣಸಿನಕಾಯಿ ಹಾಕಿ ಮಾಡಬೇಕು.

ಸ್ಟೌವ್ ಮೇಲೆ ಪಾತ್ರೆ ಇಟ್ಟು ನಾಕು ಚಮಚ ಎಣ್ಣೆ ಹಾಕಿ ಬಿಸಿ ಮಾಡಿ. ಸಾಸಿವೆ, ಹಸಿಮೆಣಸಿನಕಾಯಿ, ಕರಿಬೇವು, ಕಡಲೆಬೇಳೆ ಒಗ್ಗರಣೆ ಆದ ನಂತರ ಹೆಚ್ಚಿಕೊಂಡ ತರಕಾರಿಯನ್ನು ಬಾಣಲೆಗೆಹಾಕಿ ಚೂರು ನೀರು ಚಿಮುಕಿಸಿ ಬೇಯಿಸಿ. ಇನ್ನೇನು ಬೆಂದಾಯಿತು ಎನ್ನುವಾಗ ತುಂಡು ಬೆಲ್ಲ, ಸ್ವಲ್ಪ ಹುಣಿಸೆ ಹಣ್ಣು ಹಾಕಿ ಕುದಿಸಿರಿ.

ಇದಕ್ಕೆ ಉಪ್ಪು ಬೆರೆಸಿ ಕರೆಂಟು ಹೋಗುವ ಮುಂಚೆ ಮಿಕ್ಸಿಗೆ ಹಾಕಿ ಚಟ್ನಿ ರುಬ್ಬಿಕೊಳ್ಳಿರಿ. ರುಬ್ಬುವಾಗ ಕೊತ್ತಂಬರಿ ಸೊಪ್ಪು ಹಾಕಿದರೆ ಚಟ್ನಿಗೆ ಪರಿಮಳ ಮತ್ತು ಹಸುರು ಹಸುರು ಬಣ್ಣ ಬರತ್ತೆ. ಅನ್ನದ ಜತೆ ಕಲಸಿಕೊಳ್ಳಲು ಇದು ತುಂಬಾ ಚೆನ್ನ. ಚಟ್ನಿ ಅನ್ನಕ್ಕೆ ತುಪ್ಪ ಹಾಕಿಕೊಳ್ಳುವುದನ್ನು ಮರೆಯಬೇಡಿ!