ಫ್ರೈ ಮಾಡಿದ ಇಡ್ಲಿ ಮತ್ತು ಪಲ್ಯ ಟ್ರೈ ಮಾಡಿ

Breakfast

oi-Prasad P Naik

By * ವಾಸಂತಿ ಕೃಷ್ಣ, ಮೈಸೂರು

Published: Tuesday, June 15, 2010, 16:12 [IST]

ಮಲ್ಲಿಗೆ ಬಿಳುಪಿನ ಇಡ್ಲಿಗಳು ಬಿಸಿಬಿಸಿಯಾಗಿದ್ದಾಗಲೇ ತಿನ್ನಲು ಚೆನ್ನ. ಆದರೆ, ಕೆಲ ಬಾರಿ ಹೋಲ್ಸೇಲಾಗಿ ಮಾಡಿದಾಗ, ಸಿಕ್ಕಾಪಟ್ಟೆ ಉಳಿದರೆ ಏನು ಮಾಡುತ್ತೀರಿ? ಇಲ್ಲಿದೆ ಸಖತ್ ಉಪಾಯ.

ಕರಿದ ಇಡ್ಲಿಗಳೊಂದಿಗೆ ವಿವಿಧ ತರಕಾರಿ ಹಾಕಿದ ಪಲ್ಯ ಮಾಡಿದರೆ ಎಂಥ ಡೆಡ್ಲಿ ಕಾಂಬಿನೇಷನ್ ಆಗತ್ತೆ ಗೊತ್ತಾ? ಫ್ರೈ ಮಾಡಿದ ಇಡ್ಲಿ ಈರುಳ್ಳಿ ಚಟ್ನಿಯೊಂದಿಗೆ ಅಥವಾ ಶುಂಠಿ ಚಟ್ನಿಯೊಂದಿಗೆ ಕೂಡ ಸೂಪರಾಗಿರುತ್ತದೆ. ತಣ್ಣಗಿನ ಇಡ್ಲಿ ತಿನ್ನಲು ತಕರಾರು ಮಾಡುವ ಮಕ್ಕಳಿಗೆ ಇದು ಹೇಳಿ ಮಾಡಿಸಿದ ತಿಂಡಿ. ಮಕ್ಕಳೂ ಖಷ್, ತಂಗಳು ಎಂದು ಚೆಲ್ಲಬೇಕಾಗೂ ಇಲ್ಲ. ಒಮ್ಮೆ ಪ್ರಯೋಗಿಸಿ ನೋಡಿ.

ಬೇಕಾಗುವ ಪದಾರ್ಥಗಳು : ಅಕ್ಕಿ ಇಡ್ಲಿ | ಕ್ಯಾರೆಟ್, ಕ್ಯಾಬೇಜ್, ಬೀನ್ಸ್ ಮೂರೂ ಸೇರಿ ಎರಡು ಬಟ್ಟಲು | ಈರುಳ್ಳಿ ಎರಡು | ಹಸಿ ಮೆಣಸಿನಕಾಯಿ ನಾಲ್ಕಾರು | ಕರಿಬೇವು, ಕೋತಂಬರಿ | ಹಸಿ ಶುಂಠಿ ತುಣುಕು | ತುರಿದ ತೆಂಗಿನಕಾಯಿ ಅರ್ಧ ಬಟ್ಟಲು | ನಿಂಬೆಹಣ್ಣು | ಒಗ್ಗರಣೆ ಮತ್ತು ಕರಿಯಲು ಎಣ್ಣೆ.

ತಯಾರಿ:

* ಮೊದಲಿಗೆ ಬಿಳಿಬಳಿ ಇಡ್ಲಿಗಳನ್ನು ಎರಡು ಅಥವಾ ನಾಲ್ಕು ಭಾಗಗಳಲ್ಲಿ ಕತ್ತರಿಸಿಕೊಂಡು ಒಂದು ಬಾಣಲೆಯಲ್ಲಿ ಎಣ್ಣೆ ಹಾಕಿ ಬಿಸಿಯಾದ ನಂತರ ಕಂದು ಬಣ್ಣ ಬರುವವರೆಗೆ ಕರಿದಿಡಿ. ಕರಿದ ಇಡ್ಲಿಗಳನ್ನು ಎಣ್ಣೆ ಹೀರಿಕೊಳ್ಳಲು ಟಿಶ್ಯೂ ಪೇಪರ್ ಅಥವಾ ನ್ಯೂಸ್ ಪೇಪರಿನ ಮೇಲೆ ಹರಿಡಿರಿ.

* ಇದಾದ ನಂತರ ಪಲ್ಯ ತಯಾರಿಸಲು ಶುರು ಹಚ್ಚಿಕೊಳ್ಳಿ. ಒಂದೆಡೆ ತರಕಾರಿಗಳನ್ನು ಬೇಯಿಸಿಡಿ.

* ಒಗ್ಗರಣೆಗೆ ನಾಲ್ಕು ಚಮಚ ಎಣ್ಣೆ ಹಾಕಿ ಬಿಸಿಯಾಗುತ್ತಿದ್ದಂತೆ ಸಾಸಿವೆ ಚಟಚಟ ಅನ್ನಿಸಿ ಅರಿಷಿಣ, ಹೆಚ್ಚಿಟ್ಟುಕೊಂಡ ಹಸಿ ಮೆಣಸಿನಕಾಯಿ, ಈರುಳ್ಳಿ, ಶುಂಠಿ, ಕರಿಬೇವು, ಕೊತಂಬರಿಗಳನ್ನು ಒಂದೊಂದಾಗಿ ಬಾಣಲೆಗೆ ತಳ್ಳುತ್ತಾ ಬನ್ನಿ. ಬೇಕಿದ್ದರೆ ತೆಂಗಿನ ತುರಿ ಈಗಲೇ ಸೇರಿಸಿ.

* ಐದಾರು ನಿಮಿಷ ಬಾಡಿಸಿದ ನಂತರ ಬೇಯಿಸಿಟ್ಟುಕೊಂಡ ತರಕಾರಿಯನ್ನು ಬಾಣಲೆಗೆ ಧುಮುಕಿಸಿ ಕೈಯಾಡಿಸಿ ಬೇಕಿದ್ದರೆ ಸ್ವಲ್ಪ ನೀರು ಸೇರಿಸಿ. ಉಪ್ಪು ಹಾಕಿ ಸ್ಟೌವನ್ನು ಸಿಮ್ ಮಾಡಿ ಕೆಲ ಹೊತ್ತು ಪ್ಲೇಟನ್ನು ಮುಚ್ಚಿಟ್ಟುಬಿಡಿ.

* ಬೆಂದು ಬಂದ ಪಲ್ಯವನ್ನು ಫ್ರೈ ಮಾಡಿದ ಇಡ್ಲಿಯೊಂದಿಗೆ ತಿನ್ನಲು ನೀಡಿ. ನೆನಪಿಡಿ ಈ ಕರಿದ ಇಡ್ಲಿಗಳು ಮತ್ತೂ ಒಂದು ದಿನ ಕೆಡುವುದಿಲ್ಲ. ಸೋ, ಹೇಗಿದೆ ಉಪಾಯ? ಜಸ್ಟ್ ಟ್ರೈ ಇಟ್.