ಎಕ್ಟೋಪಿಕ್‌ ಪ್ರೆಗ್ನೆನ್ಸಿಯಾದರೆ ಕೂಡಲೇ ತುರ್ತು ಚಿಕಿತ್ಸೆ ಸಿಗದಿದ್ದರೆ ಪ್ರಾಣಕ್ಕೇ ಅಪಾಯಕಾರಿ!

ಎಕ್ಟೋಪಿಕ್ ಪ್ರೆಗ್ನೆನ್ಸಿ ಎಂದರೇನು?

ಮುಟ್ಟಾಗದಿದ್ದಾಗ ಪ್ರೆಗ್ನೆನ್ಸಿ ಕಿಟ್‌ ತಂದು ಪರೀಕ್ಷಿಸಿದಾಗ ಗರ್ಭಿಣಿ ಎಂದು ಗೊತ್ತಾದಾಗ ತುಂಬಾನೇ ಖುಷಿಯಾಗುವುದು, ಆಸ್ಪತ್ರೆಯಲ್ಲಿ ಹೋಗಿ ಪರೀಕ್ಷಿಸಿದಾಗಲೂ ಗರ್ಭಿಣಿಯೆಂಬುವುದು ಖಾತರಿಯಾಗುವುದು. ಆದರೆ ಎಕ್ಟೋಪಿಕ್ ಪ್ರೆಗ್ನೆನ್ಸಿ ಬಗ್ಗೆ ತಿಳಿಯುವುದು ಸ್ಕ್ಯಾನಿಂಗ್ ಮಾಡಿದಾಗಲೇ.

ಎಕ್ಟೋಪಿಕ್ ಪ್ರೆಗ್ನೆನ್ಸಿ ಎಂದರೇನು?

ಎಕ್ಟೋಪಿಕ್ ಪ್ರೆಗ್ನೆನ್ಸಿ ಎಂದರೆ ಗರ್ಭದ ಹೊರಗಡೆ ಭ್ರೂಣ ರೂಪುಗೊಳ್ಳುವುದು. ಕೆಲವರಲ್ಲಿ ಎರಡು ಫಾಲೋಪಿಯನ್ ಟ್ಯೂಬ್‌ನಲ್ಲಿ ಒಂದರಲ್ಲಿ ಭ್ರೂಣ ರೂಪುಗೊಳ್ಳುವುದು. ಹೀಗಾದಾಗ ಬೇಗನೆ ಗುರುತಿಸದಿದ್ದರೆ ಇಂಟರ್ನಲ್‌ ಬ್ಲೀಡಿಂಗ್(ಒಳ ಭಾಗದಲ್ಲಿಯೇ ರಕ್ತಸ್ರಾವ) ಉಂಟಾಗುವುದು. ಹೀಗಾದರೆ ತುಂಬಾನೇ ಅಪಾಯ, ಕೂಡಲೇ ತುರ್ತು ಚಿಕಿತ್ಸೆ ಅವಶ್ಯಕ. ಆದರೆ ಈ ರೀತಿ ಗರ್ಭಧಾರಣೆಯಾದಾಗ ಫಲವತ್ತತೆಯಾದ ಅಂಡಾಣುವನ್ನು ತೆಗೆದು ಗರ್ಭದ ಒಳಗಡೆ ಹಾಕಲು ಸಾಧ್ಯವಾಗಲ್ಲ.

ಎಕ್ಟೋಪಿಕ್ ಗರ್ಭಧಾರಣೆಯಾದರೆ ತೊಂದರೆಯೇನು?

ಎಕ್ಟೋಪಿಕ್ ಗರ್ಭವಾದಾಗ ಫಲವತ್ತತೆ ಅಂಡಾಣು ಫಾಲೋಪಿಯನ್ ಟ್ಯೂಬ್‌ನಲ್ಲಿ ಸಿಕ್ಕಿ ಹಾಕಿಕೊಳ್ಳುವುದು, ಇದಕ್ಕೆ ಚಿಕಿತ್ಸೆ ಪಡೆಯದಿದ್ದರೆ ಫಾಲೋಫಿಯನ್ ಟ್ಯೂಬ್‌ನಲ್ಲಿಯೇ ಭ್ರೂಣ ಒಡೆದು ಇಂಟರ್ನಲ್ ಬ್ಲೀಡಿಂಗ್ ಶುರುವಾಗುವುದು. ಒಂದು ವೇಳೆ ಫಾಲೋಪಿಯನ್ ಟ್ಯೂಬ್‌ಗೆ ಹಾನಿಯಾದರೆ ಭವಿಷ್ಯದಲ್ಲಿ ಗರ್ಭಧಾರಣೆಯಾಗಲು ಕಷ್ಟವಾಗುವುದು.

ಎಕ್ಟೋಪಿಕ್ ಗರ್ಭಕ್ಕೆ ಕಾರಣವೇನು?

* ವಯಸ್ಸಾಗಿ ಗರ್ಭಧಾರಣೆಯಾದಾಗ

* ಲೈಂಗಿಕ ಸೋಂಕು

* ಸರ್ಜರಿ

* ಫಾಲೋಪಿಯನ್ ಟ್ಯೂಬ್‌ಗೆ ಹಾನಿಯಾಗಿದ್ದರೆ

* ಫಾಲೋಪಿಯನ್ ಟ್ಯೂಬ್‌ ಆಕಾರದಲ್ಲಿ ವ್ಯತ್ಯಾಸವಿದ್ದರೆ ಈ ರೀತಿ ಉಂಟಾಗುವ ಸಾಧ್ಯತೆ ಇದೆ. ಬೇಗನೆ ಚಿಕಿತ್ಸೆ ಕೊಡಿಸಿದಷ್ಟೂ ಮಹಿಳೆಯ ಆರೋಗ್ಯ ಸ್ಥಿತಿ ದುರ್ಬಲವಾಗುವುದನ್ನು ತಡೆಯಬಹುದು.

ಎಕ್ಟೋಪಿಕ್ ಗರ್ಭಧಾರಣೆಯ ಲಕ್ಷಣಗಳೇನು

* ಅಸಹಜ ರಕ್ತಸ್ರಾವ

* ಕೆಳಹೊಟ್ಟೆಯಲ್ಲಿ ಅಸಾಧ್ಯ ನೋವು

* ಪೆಲ್ವಿಕ್ ಭಾಗದಲ್ಲಿ ಸೆಳೆತ

* ಸುಸ್ತು, ತಲೆಸುತ್ತು

ನಂತರ ಏನಾಗುವುದು?

ಎಕ್ಟೋಪಿಕ್‌ ಗರ್ಭಧಾರಣೆಯಾದರೆ ಮಗುವನ್ನು ಉಳಿಸಲು ಸಾಧ್ಯವಾಗುವುದಿಲ್ಲ, ಆದರೆ ಬೇಗನೆ ಚಿಕಿತ್ಸೆ ನೀಡಿದರೆ ತಾಯಿಯನ್ನು ಉಳಿಸಬಹುದು. ಕೆಲವರಿಗೆ ಲ್ಯಾಪ್ರೋಸ್ಕೋಪಿ ಮೂಲಕ ಭ್ರೂಣವನ್ನು ತೆಗೆದರೆ ಇನ್ನು ಕೆಲವರಿಗೆ ಸರ್ಜರಿ ಬೇಕಾಗುವುದು.

ಎಕ್ಟೋಪಿಕ್‌ ಪ್ರೆಗ್ನೆನ್ಸಿ ಅಂತ ಗೊತ್ತಾದರೆ ಒಂದು ದಿನ ಕೂಡ ತಡಮಾಡಬಾರದು, ಆ ಕ್ಷಣವೇ ಆಸ್ಪತ್ರೆಗೆ ದಾಖಲಾಗಿ ಚಿಕಿತ್ಸೆ ಪಡೆಯಿರಿ.

ಗರ್ಭಿಣಿ ಅಂತ ತಿಳಿದ ತಕ್ಷಣವೇ ಸ್ಕ್ಯಾನಿಂಗ್ ಮಾಡಿಸಿದರೆ ಈ ಎಕ್ಟೋಪಿಕ್ ಗರ್ಭಧಾರಣೆ ಬಗ್ಗೆ ಬೇಗನೆ ತಿಳಿಯಬಹುದು.