ಗರ್ಭಿಣಿಯರು ತಪ್ಪದೇ ಅನುಸರಿಸಬೇಕಾದ ವೈಯಕ್ತಿಕ ಕಾಳಜಿಗಳಿವು

ಪ್ರತಿದಿನ ತೊಳೆದ ಬಟ್ಟೆಯನ್ನೇ ತೊಡಬೇಕು

ಗರ್ಭಿಣಿಯರು ಪ್ರತಿದಿನ ತೊಳೆದ ಬಟ್ಟೆಯನ್ನೇ ತೊಡಬೇಕು. ಹತ್ತಿ ಬಟ್ಟೆಯಾಗಿದ್ದರೆ ದೇಹಕ್ಕೆ ಆರಾಮದಾಯಕ ಅನುಭವ ಆಗುವುದು. ಹತ್ತಿ ಬಟ್ಟೆಯು ತೇವಾಂಶವನ್ನು ಹೀರಿಕೊಂಡು ಬಹಳ ಬೇಗ ಒಣಗುವ ಸಾಮಥ್ರ್ಯ ಹೊಂದಿರುತ್ತದೆ. ಹಾಗಾಗಿ ಸೋಂಕುಗಳುಂಟಾಗುವುದನ್ನು ತಡೆಯಬಹುದು.

ಆದಷ್ಟು ಸ್ವಚ್ಛತೆಗೆ ಆದ್ಯತೆ ನೀಡಿ

ಆಹಾರ ಸೇವಿಸುವಾಗ ಕೈ ಸ್ವಚ್ಛವಾಗಿರುವಂತೆ ನೋಡಿಕೊಳ್ಳಬೇಕು. ಸೇವಿಸುವ ತರಕಾರಿ ಹಾಗೂ ಪಾತ್ರೆಗಳು ಸಹ ಸ್ವಚ್ಛವಾಗಿರಲಿ. ಇಲ್ಲವಾದರೆ ಸೋಂಕು ಹೊಟ್ಟೆಯೊಳಗೆ ಹೋಗುವ ಸಾಧ್ಯತೆ ಇರುತ್ತದೆ.

ಹಲ್ಲಿನ ಕಾಳಜಿ

ಗರ್ಭಾವಸ್ಥೆಯಲ್ಲಿ ಈಸ್ಟ್ರೋಜನ್ ವ್ಯತ್ಯಾಸವಾಗುವುದರಿಂದ ಹಲ್ಲಿನ ಸಮಸ್ಯೆ ಕಾಡಬಹುದು. ವಸಡಲ್ಲಿ ಊತಗಳುಂಟಾಗಬಹುದು. ಈ ಸಂದರ್ಭದಲ್ಲಿ ಬೇರಾವುದೇ ಔಷಧಗಳನ್ನು ನೀಡುವುದಿಲ್ಲ. ಆ ಕಾರಣಕ್ಕೆ ದಿನಕ್ಕೆರಡು ಬಾರಿ ಬ್ರೆಶ್ ಮಾಡುವುದರ ಮೂಲಕ ದಂತ ನೈರ್ಮಲ್ಯ ಕಾಪಾಡಿಕೊಳ್ಳಬೇಕು.

ಜನನಾಂಗಗಳ ಸ್ವಚ್ಛತೆ

ಗರ್ಭಿಣಿಯರು ಜನನಾಂಗಕ್ಕೆ ಸೋಂಕು ತಾಗದಂತೆ ನೋಡಿಕೊಳ್ಳಬೇಕು. ಪಬ್ಲಿಕ್ ಶೌಚಾಲಯ ಬಳಸಬಾರದು. ಮನೆಯ ಶೌಚಾಲಯ, ಸ್ನಾನದ ಕೋಣೆ, ತಂಬಿಗೆ, ಬಕೆಟ್ ಎಲ್ಲವೂ ಸ್ವಚ್ಛವಾಗಿರಲಿ. ಇಲ್ಲವಾದರೆ ಸೋಂಕು ತಗಲುವುದು.

ಸ್ತನಗಳ ಕಾಳಜಿ

ಗರ್ಭಾವಸ್ಥೆಯಲ್ಲಿರುವಾಗ ಸ್ತನಗಳ ಸ್ವಚ್ಛತೆಯೂ ಅಗತ್ಯ. ಬೆವರುವಿಕೆ ಹಾಗೂ ಕೊಳೆಯಿಂದ ಸ್ತನದ ತೊಟ್ಟುಗಳಲ್ಲಿ ತುರಿಕೆ ಉಂಟಾಗಬಹುದು. ಇದನ್ನು ಆದಷ್ಟು ಸ್ವಚ್ಛವಾಗಿಟ್ಟುಕೊಂಡರೆ ಸಮಸ್ಯೆ ಉಂಟಾಗದು.

ಒಳ ಉಡುಪುಗಳ ಕಾಳಜಿ

ಹತ್ತಿ ಒಳ ಉಡುಪನ್ನು ಧರಿಸುವುದರಿಂದ ವೈಯಕ್ತಿಕ ನೈರ್ಮಲ್ಯದ ಬಗ್ಗೆ ಕಾಳಜಿ ವಹಿಸಬಹುದು. ಇವು ಆರಾಮದಾಯಕ ಅನುಭವ ನೀಡುವವು. ಗರ್ಭಿಣಿಯರು ವೈಯಕ್ತಿಕವಾಗಿ ಈ ಎಲ್ಲಾ ವಿಚಾರಗಳ ಬಗ್ಗೆ ಹೆಚ್ಚು ಕಾಳಜಿಯಿಂದ ಸ್ವಚ್ಛತೆಯನ್ನು ಅನುಸರಿಸಿದರೆ ಯಾವ ತೊಂದರೆಯೂ ಉಂಟಾಗದು.