ಮಗುವಿನ ಗ್ಯಾಸ್ಟ್ರಿಕ್ ಸಮಸ್ಯೆಯ ಲಕ್ಷಣಗಳು ಮತ್ತು ಚಿಕಿತ್ಸೆಗಳು

ಮಗುವಿಗೆ ಗ್ಯಾಸ್ಟ್ರಿಕ್ ಆಗಿದೆ ಎಂದು ಅರ್ಥ ಮಾಡಿಕೊಳ್ಳುವುದು ಹೇಗೆ ?

ಮಗುವಿಗೆ ಗ್ಯಾಸ್ಟ್ರಿಕ್ ಆದಾಗ ದೊಡ್ಡವರಿಗೆ ಆಗುವಂತೆ ಎಲ್ಲಾ ಲಕ್ಷಣಗಳೂ ತಲೆದೋರುತ್ತವೆ . ಆದರೆ ಮಗು ಬಾಯಿ ಬಿಟ್ಟು ಹೇಳುವುದಕ್ಕಾಗುವುದಿಲ್ಲ ಅಳುತ್ತದೆ ಅಷ್ಟೇ . ಆದರೆ ಆ ಅಳುವಿನ ಜೊತೆಗೆ ಈ ಲಕ್ಷಣಗಳೇನಾದರೂ ಕಂಡು ಬಂದರೆ ಅದು ನಿಜಕ್ಕೂ ಗ್ಯಾಸ್ಟ್ರಿಕ್ ಆಗಿದೆ ಎಂದು ಅಮ್ಮಂದಿರು ಅರ್ಥ ಮಾಡಿಕೊಳ್ಳಬಹುದು .

1 . ಮಗು ಅಳುವುದು , ಯಾರಾದರೂ ಎತ್ತಿಕೊಂಡು ಸಮಾಧಾನ ಮಾಡಿದರೆ ಅಳು ನಿಲ್ಲಿಸಿ ನಗುವುದು ಸರ್ವೇ ಸಾಮಾನ್ಯ . ಆದರೆ ಆ ರೀತಿ ಮಾಡಿದಾಗಲೂ ಅಳು ನಿಲ್ಲಿಸದೆ ಒಂದೇ ಸಮನೆ ಅಳುತ್ತಾ ಇದ್ದರೆ ಅದು ಗ್ಯಾಸ್ಟ್ರಿಕ್ ಇದ್ದರೂ ಇರಬಹುದು .

2 . ಹೊಟ್ಟೆ ಉಬ್ಬರಿಸಿಕೊಂಡಂತೆ ಕಾಣುವುದು .

3 . ಹೊಟ್ಟೆ ಹಿಸುಕಿದಾಗ ಗಟ್ಟಿಯಾದಂತೆ ಕಾಣುವುದು :

ಹೌದು . ಇದು ತಾಯಂದಿರಿಗೆ ಮಗುವಿನಲ್ಲಿ ಗ್ಯಾಸ್ಟ್ರಿಕ್ ಆಗಿದೆ ಎಂದು ಖಚಿತ ಪಡಿಸಿಕೊಳ್ಳಲು ಸುಲಭ ಉಪಾಯ . ನೀವು ಮಗುವಿನ ಹೊಟ್ಟೆಯನ್ನು ಮೃದುವಾಗಿ ಸ್ಪರ್ಶಿಸಿದಾಗ ನಿಮಗೆ ಗಟ್ಟಿಯಾದಂತೆ ಕಂಡು ಮಗು ಅಳಲು ಶುರು ಮಾಡಿದರೆ ಅದು ಗ್ಯಾಸ್ಟ್ರಿಕ್ ಸಮಸ್ಯೆಯೇ ಖಂಡಿತ . ಹಾಗಾದರೆ ಮುದ್ದಾದ ಮಗುವಿಗೆ ಕಾಡುವ ಈ ಗ್ಯಾಸ್ಟ್ರಿಕ್ ಅನ್ನು ಗುಣ ಪಡಿಸುವುದು ಹೇಗೆ?

ಮಗುವಿಗೆ ಹಾಲು ಕುಡಿಸುವ ರೀತಿ

ತಾಯಂದಿರು ಗಮನಿಸಬೇಕಾದ ಬಹು ಮುಖ್ಯ ಅಂಶ ಇದು . ನಿಮ್ಮ ಮಗುವಿಗೆ ಹಾಲು ಕುಡಿಸುವಾಗ ಯಾವಾಗಲೂ ಅಷ್ಟೇ ಮಗುವಿನ ತಲೆ ಅದರ ಹೊಟ್ಟೆ ಇರುವುದಕ್ಕಿಂತ ಮೇಲೆಯೇ ಇರಬೇಕು . ಇದರಿಂದ ಮಗುವು ಕುಡಿದ ಹಾಲು ನೇರ ವಾಗಿ ಅದರ ಹೊಟ್ಟೆಗೆ ತಲುಪುತ್ತದೆ ಮತ್ತು ಅದು ಉಸಿರಾಡುವ ಗಾಳಿ ಕೂಡ ಸರಾಗವಾಗಿ ಆಚೆ ಬರುತ್ತದೆ . ಮಗು ಅದನ್ನು ಸುಲಭವಾಗಿ ಮೂಗಿನ ಮುಖಾಂತರ ಹೊರಹಾಕಲು ಸಹಾಯಕವಾಗುತ್ತದೆ . ಆದ್ದರಿಂದ ನೀವು ನಿಮ್ಮ ಮಗುವಿಗೆ ಹಾಲುಣಿಸಲು ಕುಳಿತುಕೊಂಡರೆ ಮಗುವಿನ ತಲೆಯನ್ನು ಇಟ್ಟುಕೊಳ್ಳುವ ನಿಮ್ಮ ಕಾಲು ಸ್ವಲ್ಪ ಮೇಲೆಯೇ ಇರಬೇಕು . ಇಲ್ಲವೆಂದರೆ ನಿಮ್ಮ ತೊಡೆಯ ಮೇಲೆ ಮಗುವಿನ ತಲೆಗೆ ಒಂದು ಮೆತ್ತಗಿನ ದಿಂಬನ್ನು ಇಟ್ಟು ಹಾಲು ಕುಡಿಸಿದರೆ ಇನ್ನೂ ಉತ್ತಮ .

ಮಗುವಿನ ಬೆನ್ನ ಮೇಲೆ ಮೆತ್ತಗೆ ತಟ್ಟುವುದು

ಇದು ಪ್ರತಿಯೊಬ್ಬ ತಾಯಿಯೂ ಪಾಲಿಸಬೇಕಾದ ನಿಯಮ ಅಂದುಕೊಂಡರೂ ಸರಿ . ನಿಮ್ಮ ಮಗುವಿಗೆ ಹಾಲು ಕುಡಿಸಿದ ಸ್ವಲ್ಪ ಸಮಯದ ನಂತರ ಅದನ್ನು ನಿಮ್ಮ ಭುಜದ ಮೇಲೆ ಎತ್ತಿಕೊಂಡು ಅದರ ಬೆನ್ನ ಮೇಲೆ ನಿಧಾನವಾಗಿ ತಟ್ಟಿ . ಇದರಿಂದ ಮಗುವಿಗೆ ಹಾಲು ಕುಡಿಯುವಾಗ ಗಾಳಿ ಒಳ ಹೋಗಿದ್ದರೆ ಬಹು ಬೇಗನೆ ಆಚೆ ಬಂದಂತಾಗುತ್ತದೆ . ಇದು ಒಂದು ವೇಳೆ ಆ ಕ್ಷಣ ಕೆಲಸ ಮಾಡದಿದ್ದರೆ ನಿಮ್ಮ ಮಗುವನ್ನು ಬೋರಲು ಮಲಗಿಸಿ ಸ್ವಲ್ಪ ಹೊತ್ತಿನ ಬಳಿಕ ಮತ್ತೆ ಅದೇ ತರ ಮಾಡಿ .

ಮಗುವಿನ ಹೊಟ್ಟೆಗೆ ಮೆತ್ತಗೆ ಮಸಾಜ್ ಮಾಡಿ

ಮಗುವಿನ ಹೊಟ್ಟೆಗೆ ನೀವು ಮಾಡುವ ಮಸಾಜ್ ಅದರೊಳಗಿನ ಗ್ಯಾಸ್ ಅನ್ನು ಹೊರಹಾಕುವ ಒಂದು ಸುಲಭ ಮತ್ತು ಯಶಸ್ವಿ ವಿಧಾನವಾಗಿದೆ . ನೀವು ಯಾವುದಾದರೂ ಒಂದು " ಬೇಬಿ ಆಯಿಲ್ " ಅಥವಾ " ಬೇಬಿ ಕ್ರೀಮ್ " ಅನ್ನು ಬಳಸಿ ಮಗುವಿನ ಹೊಟ್ಟೆಯ ಮೇಲೆ ವೃತ್ತಾಕಾರವಾಗಿ ಮಸಾಜ್ ಮಾಡಿದರೆ ಗಾಳಿಯು ಮಗುವಿನ ಕರುಳಿಗೆ ಸುಲಭವಾಗಿ ಹೋಗುತ್ತದೆ ಮತ್ತು ಮಗುವು ಹೊಟ್ಟೆಯ ಗ್ಯಾಸ್ಟ್ರಿಕ್ ನಿಂದ ಬಳಲುವುದು ತಪ್ಪುತ್ತದೆ .

" ಗ್ರೈಪ್ ವಾಟರ್ " ಅನ್ನು ಮಗುವಿಗೆ ಕೊಡುವುದು

ಗ್ರೈಪ್ ವಾಟರ್ ಅನ್ನು ಬಹಳ ಹಿಂದಿನಿಂದಲೂ ತಂದೆ ತಾಯಂದಿರು ಮಗುವಿನ ಆರೋಗ್ಯವನ್ನು ಕಾಪಾಡಲು ಬಳಸುತ್ತಾ ಬಂದಿದ್ದಾರೆ . ಇದು ಕೇವಲ ಐದು ನಿಮಿಷಗಳಲ್ಲಿ ಕೆಲಸ ಮಾಡುತ್ತದೆ . ಇದರಲ್ಲಿ ನೀರಿನ ಜೊತೆ ಸೋಡಿಯಂ ಬೈಕಾರ್ಬೋನೇಟ್ ಮತ್ತು ಇನ್ನೂ ಅನೇಕ ಗಿಡಮೂಲಿಕೆಗಳಿದ್ದು ನಿಮ್ಮ ಮಗುವಿನ ಹೊಟ್ಟೆಗೆ ಸಂಬಂಧಿಸಿದ ಎಲ್ಲ ಸಮಸ್ಯೆಗಳಿಗೆ ರಾಮಬಾಣವಾಗಿ ಕೆಲಸ ಮಾಡುತ್ತದೆ . ಮಗುವಿನ ಗ್ಯಾಸ್ಟ್ರಿಕ್ ಪರಿಹಾರಕ್ಕೆ ಇದಕ್ಕಿಂತ ಸುಲಭ ಮಾರ್ಗ ಇನ್ನೊಂದಿಲ್ಲ.

ನಿಮ್ಮ ಮಗುವಿಗೆ ಕೊಡುವ ಆಹಾರಗಳ ಮೇಲೆ ಗಮನವಿಡಿ

ನಿಮ್ಮ ಮುದ್ದಾದ ಮಗುವನ್ನು ಬೇರೆಲ್ಲಾ ವಿಷಯದಲ್ಲಿ ಹೇಗೆ ನೋಡಿಕೊಳ್ಳುತ್ತೀರೋ ಅದರ ಆಹಾರದ ವಿಷಯದಲ್ಲೂ ಅಷ್ಟೇ ಬಹಳ ಜಾಗರೂಕರಾಗಿ ನೋಡಿಕೊಳ್ಳುವುದು ನಿಮ್ಮ ಕರ್ತವ್ಯ . ಮಗುವಿಗೆ ನಿಮ್ಮ ಎದೆ ಹಾಲನ್ನು ಬಿಟ್ಟು ಬೇರೆ ಏನನ್ನೇ ಕೊಡುವುದಕ್ಕೂ ಮುಂಚೆ ಮಕ್ಕಳ ತಜ್ಞರನ್ನು ಭೇಟಿಯಾಗುವುದು ಒಳ್ಳೆಯದು . ಒಂದು ವೇಳೆ ಮಗುವಿಗೆ ಜ್ಯೂಸು ಕೊಡಲು ಬಯಸಿದರೆ ಅದು ಕಾರ್ಬೊನೇಟೆಡ್ ಅಲ್ಲದ ನೈಸರ್ಗಿಕವಾದ ತಾಜಾ ಹಣ್ಣಿನ ಜ್ಯೂಸು ಆಗಿರಬೇಕು . ಅದೂ ಸಹ ಎಷ್ಟು ಪ್ರಮಾಣದಲ್ಲಿ ನೀಡಿದರೆ ಉತ್ತಮ ಎಂಬುದನ್ನು ವೈದ್ಯರ ಬಳಿ ಖಾತ್ರಿ ಪಡಿಸಿಕೊಳ್ಳಿ . ನಿಮ್ಮ ಮಗುವಿಗೆ ಟಿವಿ ಯಲ್ಲಿ ನೋಡಿದ ಅಥವಾ ಜಾಹಿರಾತಿನಲ್ಲಿ ಕಂಡು ಬಂದ ಸಿಕ್ಕ ಸಿಕ್ಕ ಔಷಧಗಳನ್ನು ಕೊಡಲೇ ಬೇಡಿ . ಔಷಧಗಳನ್ನು ಕೊಡುವ ವಿಚಾರದಲ್ಲಂತೂ ನೀವು ಎಷ್ಟೇ ಹುಷಾರಾಗಿದ್ದರೂ ಸಾಲದು . ಏಕೆಂದರೆ ಒಂದೊಂದು ಮಗುವಿನ ದೇಹದ ಆರೋಗ್ಯ ಶೈಲಿ ಒಂದೊಂದು ತರಹ ಇರುತ್ತದೆ . ಅಡ್ಡ ಪರಿಣಾಮ ಹೊಂದುವ ಸಾಧ್ಯತೆ ಬಹಳ ಇದ್ದು ಮಗುವಿನ ಪ್ರಾಣಕ್ಕೇ ಆಪತ್ತಾಗುವ ಸಂಭವ ಹೆಚ್ಚಿರುತ್ತದೆ. ಆದ್ದರಿಂದ ಔಷಧಗಳನ್ನು ಕೊಡುವ ಮುಂಚೆ ಮಕ್ಕಳ ತಜ್ಞರ ಬಳಿ ಸಲಹೆ ಕೇಳುವುದು ಬಹಳ ಒಳ್ಳೆಯದು .

ನೀವು ನಿಮ್ಮ ಮಗುವಿನ ವಿಷಯದಲ್ಲಿ ಗಮನಿಸಬೇಕಾದ ಬಹಳ ಮುಖ್ಯ ಅಂಶ

ನಿಮ್ಮ ಮಗು ಸದಾ ನಿರಂತರವಾಗಿ ಅಳುತ್ತಲೇ ಇದ್ದರೆ ಮತ್ತು ಅದರಲ್ಲಿ ಅಸ್ವಸ್ಥತೆ ಏನಾದರೂ ಕಂಡು ಬಂದರೆ ಯಾವುದೇ ಕಾರಣಕ್ಕೂ ನಿರ್ಲಕ್ಷ್ಯ ಮಾಡದೆ ತಕ್ಷಣ ವೈದ್ಯರನ್ನು ಸಂಪರ್ಕಿಸಿ .