ಪುನೀತ್‌ ರಾಜ್‌ಕುಮಾರ್‌ ಹುಟ್ಟುಹಬ್ಬ: ಅಪ್ಪು 'ದಿ ಗ್ರೇಟ್‌' ಅನಿಸಿಕೊಳ್ಳಲು ಈ ಗುಣಗಳೇ ಕಾರಣ

ಸರಳತೆ:

ದೊಡ್ಮನೆ ಕುಟುಂಬದಲ್ಲಿ ಜನಿಸಿದ ಕುಡಿ. ಹುಟ್ಟುವಾಗಲೇ ಸಂಪತ್ತು, ಸ್ಟಾರ್‌ಪಟ್ಟ ಎಲ್ಲಾ ನೋಡಿಕೊಂಡು ಬೆಳೆದವರು. ಆದರೆ ಅವರಲ್ಲಿ ಅಹಂ ಎಂಬುವುದು ಒಂದಿಷ್ಟೂ ಇರಲಿಲ್ಲ. ತುಂಬಿದ ಕೊಡ ತುಳುಕಲ್ಲ ಎಂಬುವುದ ಇಂಥವರನ್ನು ನೋಡಿಯೇ ಹೇಳಿರುವುದು. ಯಾವತ್ತಿಗೂ ಎಲ್ಲಿಯೂ ಅಹಂಕಾರ ತೋರಿಸಿದವರಲ್ಲ. ಅವರ ಕೊನೆಯ ಚಿತ್ರ ಗಂಧದ ಗುಡಿ ಶೂಟಿಂಗ್ ವೇಳೆ ಅವರ ಜನರ ಜೊತೆ ಬೆರೆಯುತ್ತಿದ್ದ ರೀತಿ ನೋಡಿ ಒಬ್ಬ ಸ್ಟಾರ್‌ ನಟ ಇಷ್ಟೊಂದು ಸರಳವಾಗಿರಲು ಹೇಗೆ ಸಾಧ್ಯ ಎಂದು ಅಚ್ಚರಿಪಟ್ಟಿದ್ದರು.

ಎಷ್ಟೇ ದುಡ್ಡಿರಲಿ, ಸೆಲೆಬ್ರಿಟಿ ಪಟ್ಟವಿರಲಿ, ಎಷ್ಟೇ ದೊಡ್ಡ ಹುದ್ದೆಯಲ್ಲಿರಲಿ ನಮ್ಮ ಬದುಕಿನಲ್ಲಿ ನಾವು ಸರಳತೆಯಿಂದ ವರ್ತಿಸಿದರೆ ಈ ಗುಣ ನಮ್ಮನ್ನು ಮತ್ತಷ್ಟು ದೊಡ್ಡ ವ್ಯಕ್ತಿಯನ್ನಾಗಿಸುತ್ತದೆ.

ದಾನ:

ಪುನೀತ್‌ ರಾಜ್‌ಕುಮಾರ್‌ ಈ ಸಮಾಜಕ್ಕೆ ನೀಡಿರುವ ಕೊಡುಗೆಅಷ್ಟಿಷ್ಟಲ್ಲ, ಆದರೆ ಇವೆಲ್ಲಾ ಬೆಳಕಿಗೆ ಬಂದದ್ದು ಅವರ ಮರಣವೊಂದಿದ ಬಳಿಕ. ಇವರ ಕಾರ್ಯಗಳನ್ನು ತಿಳಿದಿ ಅಪ್ಪು ಅಭಿಮಾನಿಗಳು ನಮ್ಮ ದೇವರಂತೆ ನಾವು ಕೂಡ ಸಮಾಜಮುಖಿ ಕಾರ್ಯಗಳಲ್ಲಿ ತೊಡಗಿಸಿಕೊಳ್ಳಬೇಕು, ಬಡಡಮಕ್ಕಳಿಗೆ ಓದಲು ನೆರವಾಗಬೇಕು ಎಂದು ಮುಂದಾಗಿದ್ದಾರೆ. ಪುನೀತ್‌ ರಾಜ್ ಮಾಡಿರುವ ಒಳ್ಳೆಯ ಕಾರ್ಯಗಳಿಂದ ಸ್ಪೂರ್ತಿ ಪಡೆದ ಎಷ್ಟೋ ಹಣವಂತರು ಕೂಡ ತಮ್ಮಲ್ಲಿರುವ ಹಣದಲ್ಲಿ ಸ್ವಲ್ಪವಾದರೂ ಈ ಸಮಾಜಕ್ಕಾಗಿ ನೀಡಬೇಕು ಎಂದು ಅಪ್ಪುವನ್ನು ನೋಡಿ ಸ್ಪೂರ್ತಿ ಪಡೆದಿದ್ದಾರೆ ಎಂದರೆ ತಪ್ಪಾಗಲಾರದು.

ಫಿಟ್ನೆಸ್‌:

ಅಪ್ಪು ಫಿಟ್ನೆಸ್‌ ಕಡೆಗೆ ತುಂಬಾನೇ ಗಮನ ಕೊಡುತ್ತಿದ್ದರು. ಅವರ ಫಿಟ್ನೆಸ್‌ಗೆ ಮಾರು ಹೋಗದವರೇ ಇಲ್ಲ, ಅಷ್ಟೊಂದು ಕಟ್ಟು ಮಸ್ತಾದ ಮೈಕಟ್ಟು ಹೊಂದಿದ್ದರು. ತಾವು ಫಿಟ್‌ ಆಗಿರುವ ಮೂಲಕ ಇತರರಿಗೂ ಫಿಟ್ನೆಸ್‌ ಮಹತ್ವದ ಬಗ್ಗೆ ಹೇಳಿದ್ದರು. ಫಿಟ್ನೆಸ್‌ ವಿಷಯದಲ್ಲೂ ಇವರು ಯುವ ಜನತೆಗೆ ಆದರ್ಶ.

ಫ್ಯಾಷನ್:

ಇನ್ನು ಪುನೀತ್‌ ರಾಜ್‌ಕುಮರ್‌ ಫ್ಯಾಷನ್ ಬಗ್ಗೆ ಹೇಳಿದರೆ ನೀವೆಲ್ಲಾ ಅಚ್ಚರಿಯಾಗುವುದು ಗ್ಯಾರಂಟಿ. ಏಕೆಂದರೆ ಇವರು ದೊಡ್ಡ ಸ್ಟಾರ್, ಬ್ರ್ಯಾಂಡೆಡ್ ಬಟ್ಟೆಗಳನ್ನೇ ಧರಿಸುತ್ತಾರೆ ಎಂದು ನೀವು ಅಂದುಕೊಂಡಿದ್ದರೆ ಅದು ತಮ್ಮ. ಅವರು ನಾರ್ಮಲ್‌ ಬಟ್ಟೆಗಳನ್ನು ಧರಿಸುತ್ತಿದ್ದರು. ಅವರೇ ಹೇಳಿದಂತೆ ನಮ್ಮನ್ನು ಇತರರು ಫಾಲೋ ಮಾಡ್ತಾರೆ, ಈ ಕಾರಣಕ್ಕೆ ಬ್ರ್ಯಾಂಡೆಡ್ ಬಟ್ಟೆ ಬಿಟ್ಟು ಸಾಧಾರಣ ಬಟ್ಟೆ ಧರಿಸಲಾರಂಭಿಸಿದೆ ಎಂದು ಹೇಳಿದ್ದಾರೆ. ಈ ಮೂಲಕ ಸಿಂಪ್ಲಿಸಿಟಿಗೂ ಉದಾಹರಣೆಯಾಗಿದ್ದರು.

ಎಲ್ಲಾ ಇದ್ದರೂ ಎಲ್ಲಾ ಆಡಂಬರಗಳಿಂದ ದೂರವಿದ್ದ ಅಪ್ಪು ನಮಗೆಲ್ಲರಿಗೂ ಹಲವಾರು ವಿಷಯಗಳಲ್ಲಿ ಆದರ್ಶ ವ್ಯಕ್ತಿ. ಹೇಗೆ ಬದುಕಬೇಕು, ಬದುಕನ್ನು ಸಾರ್ಥವಾಗಿಸುವುದು ಹೇಗೆ ಎಂಬುವುದನ್ನು ಅಪ್ಪು ನೋಡಿ ಕಲಿಯಬೇಕಾಗಿದೆ.

ಮಿಸ್‌ ಯೂ ಅಪ್ಪು

ಅಜರಾಮರ ಅಪ್ಪು.... ಹುಟ್ಟು ಹಬ್ಬದ ಶುಭಾಶಯಗಳು... ಮತ್ತೊಮ್ಮೆ ಈ ನಾಡಿನಲ್ಲಿ ಹುಟ್ಟಿ ಬನ್ನಿ...