ಕಾಮಿಕ ಏಕಾದಶಿ 2023: ಆಷಾಢದ ಕೊನೆಯ ಏಕಾದಶಿ ವ್ರತದ ಮಹತ್ವವೇನು ಗೊತ್ತೇ?

ಜುಲೈ 12ಕ್ಕೆ ಕಾಮಿಕ ಏಕಾದಶಿ ಆಚರಿಸಲಾಗುವುದು. ಕಾಮಿಕ ಏಕಾದಶಿಯು ಆಷಾಢ ಮಾಸದ ಕೊನೆಯ ಏಕಾದಶಿಯಾಗಿದೆ, ಈ ಏಕಾದಶಿ ಬಳಿಕ ಶ್ರಾವಣ ಮಾಸ ಶುರುವಾಗುತ್ತದೆ. ಈ ವರ್ಷ ಕಾಮಿಕ ಏಕಾದಶಿಯನ್ನು ಜುಲೈ 12ರಂದು ಆಚರಿಸಲಾಗುತ್ತಿದೆ. ಜುಲೈ 17ಕ್ಕೆ ಆಷಾಢ ಮುಕ್ತಾಯವಾಗಲಿದೆ.

ಕಾಮಿಕ ಏಕಾದಶಿಯ ಮಹತ್ವವೇನು? ಕಾಮಿಕ ಏಕಾದಶಿಯ ಪೂಜಾ ವಿಧಿಗಳೇನು, ಪೂಜೆಗೆ ಶುಭ ಮುಹೂರ್ತ ಯಾವಾಗ ಎಂದು ನೋಡೋಣ ಬನ್ನಿ:

ಕಾಮಿಕ ಏಕಾದಶಿಯ ಮಹತ್ವ
ಯಾವುದಾದರೂ ಕೆಲಸಗಳು ಅರ್ಧಕ್ಕೆ ನಿಂತಿದ್ದರೆ, ನಿಮ್ಮ ಆ ಕೆಲಸ ಪೂರ್ಣಗೊಳ್ಳಲು ತುಂಬಾ ಅಡೆತಡೆ ಉಂಟಾಗಿದ್ದರೆ ಈ ಏಕಾದಶಿಯನ್ನು ಮಾಡಿದರೆ ಅಪೂರ್ಣವಾಗಿರುವ ಕೆಲಸಗಳು ಪೂರ್ಣಗೊಳ್ಳುವುದು. ಈ ಏಕಾದಶಿ ವ್ರತವನ್ನು ಉಪವಾಸವಿದ್ದು ಆಚರಿಸುವುದರಿಂದ ಸಂಕಷ್ಟಗಳು ದೂರಾಗಲಿದೆ.

ಈ ಏಕಾದಶಿಯನ್ನು ಮಾಡುವುದರಿಂದ ಅಶ್ವಮೇಧ ಯಾಗದ ಫಲ ದೊರೆಯಲಿದೆ. ಈ ದಿನ ತುಳಸಿಗೆ ಪೂಜೆ ಸಲ್ಲಿಸಬೇಕು.

ಪೂರ್ವಜನ್ಮದ ಪಾಪದಿಂದ ಮುಕ್ತಿ ದೊರೆಯುತ್ತದೆ
ಕಾಮಿಕ ಏಕಾದಶಿಯನ್ನು ಆಚರಿಸುವುದರಿಂದ ಪೂರ್ವಜನ್ಮದ ಪಾಪದಿಂದ ಮುಕ್ತಿ ಪಡೆಯಬಹುದು. ಅಷ್ಟು ಮಾತ್ರವಲ್ಲ ನಮಗೆ ತಿಳಿಯದೆ ಆದ ಪಾಪ ಕರ್ಮಗಳಿಂದ ವಿಮೋಚನೆ ಸಿಗಲಿದೆ. ತಮ್ಮ ತಪ್ಪಿಗೆ ಪ್ರಾಯಶ್ಚಿತ್ತ ಮಾಡಲು ಈ ಏಕಾದಶಿ ವ್ರತ ಮಾಡುವುದು ಒಳ್ಳೆಯದು.

ಪಿತೃದೋಷ ಕೂಡ ನಿವಾರಣೆಯಾಗುವುದು
ಕಾಮಿಕ ಏಕಾದಶಿಯಂದು ಪಿತೃದೋಷ ನಿವಾರಣೆಯಾಗಲಿದೆ, ಪಿತೃಗಳ ಆಶೀರ್ವಾದ ಸಿಗಲಿದೆ, ಶ್ರೀವಿಷ್ಣುವಿನ ಆಶೀರ್ವಾದ ಮಾತ್ರವಲ್ಲ ದೇವಾನು, ದೇವತೆಗಳ ಆಶೀರ್ವಾದ ಸಿಗಲಿದೆ.

ಬ್ರಹ್ಮ ದೋಷದಿಂದ ಮುಕ್ತರಾಗುತ್ತಾರೆ
ಕಾಮಿ ಏಕಾದಶಿಯನ್ನು ಆಚರಿಸುವುದರಿಂದ ಬ್ರಹ್ಮ ದೋಷದಿಂದ ಕೂಡ ಮುಕ್ತರಾಗುತ್ತಾರೆ. ಈ ಏಕಾದಶಿಯನ್ನು ಆಚರಣೆ ಮಾಡುವುದರಿಂದ ಅಕಾಲಿಕ ಮರಣ ಭಯ ದೂರಾಗಲಿದೆ.

ಕಾಮಿಕ ಏಕಾದಶಿ ಪೂಜಾ ಸಮಯ ಹಾಗೂ ಪಾರಣ ಸಮಯ
ಕಾಮಿಕ ಏಕಾದಶಿ ಜುಲೈ 12 ಸಂಜೆ 5:59ಕ್ಕೆ ಪ್ರಾರಂಭ
ಏಕಾದಶಿ ತಿಥಿ ಮುಕ್ತಾಯ ಜುಲೈ 13 ಸಂಜೆ 06:24ರವರೆಗೆ
ಏಕಾದಶಿ ಉಪವಾಸವನ್ನು ಜುಲೈ 13ರಂದು ಆಚರಿಸಲಾಗುವುದು.
ಪೂಜೆಗೆ ಶುಭ ಮುಹೂರ್ತ ಜುಲೈ 13 ಬೆಳಗ್ಗೆ 5:32ರಿಂದ 07:16ರವರೆಗೆ
ಮತ್ತೊಂದು ಶುಭ ಮುಹೂರ್ತ ಬೆಳಗ್ಗೆ 10:43ರಿಂದ ಮಧ್ಯಾಹ್ನ 03:45ರವರೆಗೆ
ಪಾರಣ ಸಮಯ: ಜುಲೈ 14 ಬೆಳಗ್ಗೆ 05:32ರಿಂದ 08:18ರವರೆಗೆ