ತುಳಸಿ ಗಿಡದ ಆರೈಕೆಗೆ ಟಿಪ್ಸ್

ಭಾರತದಲ್ಲಿ ತುಳಸಿಯನ್ನು ಪೂಜನೀಯ ಗಿಡವೆಂದು ಪರಿಗಣಿಸಲಾಗಿದೆ. ಕನ್ನಡಿಗರ ಮನೆ ಮುಂದೆ ಅಂತೂ ತುಳಸಿ ಕಟ್ಟೆ ಇದ್ದೇ ಇರುತ್ತದೆ. ದಿನನಿತ್ಯ ತುಳಸಿಗೆ ಪೂಜೆ ಮಾಡಿದರೆ ಶುಭ ಉಂಟಾಗುತ್ತದೆ ಎಂಬ ನಂಬಿಕೆ ನಮ್ಮಲ್ಲಿದೆ.

ಇನ್ನು ತುಳಸಿಯಲ್ಲಿ ಅನೇಕ ಔಷಧೀಯ ಗುಣಗಳಿವೆ ಅನ್ನುವುದು ಪ್ರತಿಯೊಬ್ಬರಿಗೂ ಗೊತ್ತು. ಈ ಗಿಡವನ್ನು ಚಿಕ್ಕ ಹೂವಿನ ಕುಂಡದಲ್ಲಿ ಕೂಡ ಬೆಳೆಸಬಹುದು. ಆದರೆ ಅದರ ಆರೈಕೆಯನ್ನು ಈ ಕೆಳಗಿನಂತೆ ಮಾಡಿದರೆ ಮಾತ್ರ ಗಿಡ ಸೊಂಪಾಗಿ ಇರುತ್ತದೆ.

ಸ್ವಲ್ಪ ಬಿಸಿಲಿರುವ ಕಡೆ ಇಡಬೇಕು
ನೇರವಾಗಿ ಸೂರ್ಯನ ಕಿರಣಗಳು ಬೀಳುವ ಕಡೆ ತುಳಸಿ ಗಿಡವನ್ನು ಇಡಬೇಡಿ. ತುಳಸಿ ಗಿಡವಿರುವ ಸ್ಥಳ ತುಂಬಾ ತಂಪಾಗಿಯೂ ಇರಬಾರದು. ಸ್ವಲ್ಪ ಬಿಸಿಲಿರುವ ಕಡೆ ತುಳಸಿ ಗಿಡವನ್ನು ನೆಡುವುದು ಒಳ್ಳೆಯದು. ಮನೆಯ ಮುಂದೆ ತುಳಸಿ ಕಟ್ಟೆ ಮಾಡುವುದಾದರೆ ಮನೆಯ ನೆರಳು ಕಟ್ಟೆಯ ಮೇಲೆ ಬೀಳುವಂತಿದ್ದರೆ ಗಿಡ ಸೊಂಪಾಗಿ ಬೆಳೆಯುತ್ತದೆ.

ನೀರು
ತುಳಸಿ ಗಿಡಕ್ಕೆ ಪ್ರತಿದಿನವೂ ನೀರು ಹಾಕಬೇಕು. ಎರಡು ದಿನ ನೀರು ಹಾಕದಿದ್ದರೆ ಸಾಕು ಗಿಡ ಒಣಗುವುದು.

ಮಣ್ಣು
ತುಳಸಿ ಗಿಡಕ್ಕೆ ಸ್ವಲ್ಪ ತೇವಾಂಶವಿರುವ ಮಣ್ಣು ಒಳ್ಳೆಯದು.

ಗೊಬ್ಬರ
ಇದಕ್ಕೆ ಯಾವುದೇ ಗೊಬ್ಬರದ ಅವಶ್ಯಕತೆಯಿಲ್ಲ. ಬೇಕಿದ್ದರೆ ಸೆಗಣಿ ಗೊಬ್ಬರ ಹಾಕಬಹುದು.

ತುಳಸಿ ಹೂ
ತುಳಸಿ ಗಿಡ ಹೂ ಬಿಟ್ಟಾಗ ಸುಂದರವಾಗಿ ಕಾಣುತ್ತಿದೆ ಎಂದು ಬಿಡಬೇಡಿ. ಈ ಹೂವನ್ನು ಚಿವುಟದೆ ಗಿಡದಲ್ಲಿ ಹಾಗೆಯೇ ಬಿಟ್ಟರೆ ಗಿಡ ಒಣಗುವುದು.

ಕೀಟನಾಶಕಗಳು
ತುಳಸಿ ಗಿಡಕ್ಕೆ ಯಾವುದೇ ಕೀಟ ನಾಶಕಗಳನ್ನು ಬಳಸುವ ಅಗತ್ಯವಿಲ್ಲ. ಈ ಗಿಡಕ್ಕೆ ಸೋಂಕು ನಿವಾರಕ ಗುಣವಿದೆ.