ಬದನೆಕಾಯಿ ಕಹಿ ತೆಗೆಯೋದು ಹೇಗೆ? ಈ ಸಿಂಪಲ್ ಟ್ರಿಕ್ ಬಳಸಿ.. ಬಲು ರುಚಿ! ಕಹಿ ಅನ್ನೋದೇ ಇರಲ್ಲ

ಬದನೆಯಕಾಯಿ ಕಹಿ ಆಗ್ತಿದೆಯಾ? ಈ ಸಿಂಪಲ್ ಟ್ರಿಕ್ ಬಳಸಿ ನೋಡಿ! ಬಲು ರುಚಿ.. ಕಹಿ ದೂರ ದೂರ. ಹೌದು, ಬದನೆಕಾಯಿಯ (Brinjal) ರುಚಿಗೆ ಹೆಚ್ಚಿನವರು ಮಾರುಹೋಗುತ್ತಾರೆ. ಎಣ್ಣೆಗಾಯಿ, ಭರ್ತಾ, ಸಾಂಬಾರ್, ಪಲ್ಯ ಇತ್ಯಾದಿ ಹಲವು ಬಗೆಯ ಖಾದ್ಯಗಳನ್ನು ಇದರಿಂದ ತಯಾರಿಸಬಹುದು. ಆದರೆ, ಕೆಲವೊಮ್ಮೆ ಕಹಿಯಾದ ಬದನೆಯಕಾಯಿ ಅಡುಗೆಯ ಸಂಪೂರ್ಣ ರುಚಿಯನ್ನೇ ಹಾಳುಮಾಡುತ್ತದೆ. ಈ ಸಾಮಾನ್ಯ ಸಮಸ್ಯೆಗೆ ಪರಿಹಾರವನ್ನು ಈ ಲೇಖನದಲ್ಲಿ ತಿಳಿಸಲಾಗಿದೆ.

ಬದನೆಕಾಯಿ ಬಹುಮುಖಿ ತರಕಾರಿಯಾದರೂ, ಅದರ ಕಹಿ ಗುಣ ಹಲವರಿಗೆ ತಲೆನೋವನ್ನುಂಟು ಮಾಡುತ್ತದೆ. ಬೀಜಗಳ ಸಂಖ್ಯೆ ಅಥವಾ ಬೆಳೆದ ಪರಿಸ್ಥಿತಿಗಳಿಂದ ಬದನೆಕಾಯಿಯಲ್ಲಿ ಕಹಿ ಅಂಶ ಹೆಚ್ಚಬಹುದು. ಅಡುಗೆ ಮಾಡಿದ ನಂತರವಷ್ಟೇ ಈ ಕಹಿ ತಿಳಿಯುವುದರಿಂದ ಶ್ರಮ ವ್ಯರ್ಥವಾಗುವ ಸಾಧ್ಯತೆ ಹೆಚ್ಚು. ಈ ಕಾರಣಕ್ಕಾಗಿ, ಅನೇಕರು ಬದನೆಕಾಯಿ ಬಳಸಲು ಹಿಂಜರಿಯುತ್ತಾರೆ. ಆದರೆ, ಈಗ ಈ ಬಗ್ಗೆ ಚಿಂತಿಸುವ ಅಗತ್ಯವಿಲ್ಲ.

Photo Credit: ಸಂಗ್ರಹ ಚಿತ್ರ: ಇಂಟರ್ನೆಟ್

ಬದನೆಕಾಯಿಯ ಕಹಿಯನ್ನು ಹೋಗಲಾಡಿಸಲು ಒಂದು ಸರಳ, ಆದರೆ ಮಾಂತ್ರಿಕ ಪರಿಹಾರವನ್ನು ಸೂಚಿಸಲಾಗಿದೆ. ಅದುವೇ 'ಉಪ್ಪು'. ಕೇವಲ ಒಂದು ಸಾಮಗ್ರಿಯನ್ನು ಬಳಸಿ ಕಹಿಯಿಲ್ಲದ ಬದನೆಯಕಾಯಿ ಖಾದ್ಯವನ್ನು ಸವಿಯಲು ಸರಿಯಾದ ಕ್ರಮಗಳನ್ನು (How to remove bitterness from brinjal) ಇಲ್ಲಿ ವಿವರಿಸಲಾಗಿದೆ.

- ಮೊದಲಿಗೆ, ಬದನೆಕಾಯಿಯನ್ನು ನಿಮಗೆ ಬೇಕಾದ ಆಕಾರ ಮತ್ತು ಗಾತ್ರದಲ್ಲಿ (ಉದ್ದಕ್ಕೆ ಅಥವಾ ಚಿಕ್ಕದಾಗಿ) ಕತ್ತರಿಸಿಕೊಳ್ಳಿ.

- ಕತ್ತರಿಸಿದ ಬದನೆಕಾಯಿ ತುಂಡುಗಳಿಗೆ ಸಮ ಪ್ರಮಾಣದಲ್ಲಿ ಉಪ್ಪನ್ನು ಉದುರಿಸಿ, ಎಲ್ಲ ಕಡೆ ಹರಡುವಂತೆ ಚೆನ್ನಾಗಿ ಕಲಸಿ. ಉಪ್ಪು ಬದನೆಯಕಾಯಿಯ ಕಹಿ ರಸವನ್ನು ಹೊರಕ್ಕೆ ತರಲು ಸಹಕರಿಸುತ್ತದೆ.

- ಉಪ್ಪು ಹಚ್ಚಿದ ನಂತರ, ಕನಿಷ್ಠ ಐದು ನಿಮಿಷಗಳ ಕಾಲ ಹಾಗೆಯೇ ಬಿಡಿ. ಸ್ವಲ್ಪ ಸಮಯದ ಬಳಿಕ, ಬದನೆಕಾಯಿಯಿಂದ ನೀರು ಹೊರಬರುವುದನ್ನು ನೀವು ಗಮನಿಸಬಹುದು. ಈ ನೀರಿನೊಡನೆ ಕಹಿ ಅಂಶವೂ ಹೊರಬರುತ್ತದೆ.

- ನಂತರ, ಕತ್ತರಿಸಿದ ಬದನೆಕಾಯಿ ತುಂಡುಗಳನ್ನು ಶುದ್ಧವಾದ ನೀರಿನಲ್ಲಿ ಚೆನ್ನಾಗಿ ತೊಳೆಯಬೇಕು. ಹೀಗೆ ಮಾಡುವುದರಿಂದ ಕಹಿ ರಸ ಮತ್ತು ಹೆಚ್ಚುವರಿ ಉಪ್ಪು ಸಂಪೂರ್ಣವಾಗಿ ನಿವಾರಣೆಯಾಗುತ್ತದೆ.

- ತೊಳೆದ ಬದನೆಕಾಯಿಯನ್ನು ಸ್ವಚ್ಛ ಬಟ್ಟೆ ಅಥವಾ ಟಿಶ್ಯೂ ಪೇಪರ್ ಬಳಸಿ ಒಣಗಿಸಿಕೊಳ್ಳಿ. ಈ ಹಂತದ ನಂತರ, ಬದನೆಯಕಾಯಿಯನ್ನು ಯಾವುದೇ ಅಡುಗೆಗೆ ಬಳಸಿದರೂ ಅದು ಕಹಿ ಇರುವುದಿಲ್ಲ, ಬದಲಿಗೆ ಖಾದ್ಯದ ರುಚಿಯನ್ನು ಇನ್ನಷ್ಟು ಹೆಚ್ಚಿಸುತ್ತದೆ.

ಬದನೆಕಾಯಿ ಆಯ್ಕೆ ಮಾಡುವಾಗ ನೆನಪಿರಲಿ

ಕಹಿಯಿಲ್ಲದ ಬದನೆಕಾಯಿಯನ್ನು ಗುರುತಿಸಲು ಕೆಲವು ಸರಳ ಮಾರ್ಗಗಳು ಇಲ್ಲಿವೆ

* ಗಾತ್ರಕ್ಕೆ ಹೋಲಿಸಿದರೆ ಬದನೆಕಾಯಿ ಹಗುರವಾಗಿರಬೇಕು. ತೂಕ ಹೆಚ್ಚಿದ್ದರೆ, ಅದರಲ್ಲಿ ಬೀಜಗಳು ಹೆಚ್ಚಿ ಕಹಿಯಾಗುವ ಸಾಧ್ಯತೆಗಳಿರುತ್ತವೆ.

* ಸಿಪ್ಪೆ ನಯವಾಗಿ ಮತ್ತು ಹೊಳೆಯುವಂತಿರಬೇಕು. ಸಿಪ್ಪೆ ಸುಕ್ಕುಗಟ್ಟಿದ್ದರೆ, ಅದು ಹಳೆಯದಾಗಿದೆ ಎಂದು ಅರ್ಥ.

* ಗಾಢ ನೇರಳೆ ಬಣ್ಣದ ಬದನೆಕಾಯಿಗಳು ಸಾಮಾನ್ಯವಾಗಿ ತಾಜಾ ಮತ್ತು ರುಚಿಕರವಾಗಿರುತ್ತವೆ.

ಬದನೆಯಕಾಯಿ ಕಪ್ಪಾಗದಂತೆ ತಡೆಯುವ ಟಿಪ್ಸ್‌

- ಒಂದು ಪಾತ್ರೆಯಲ್ಲಿ ನೀರು ತೆಗೆದುಕೊಂಡು, ಅದಕ್ಕೆ ಒಂದು ಚಮಚ ಉಪ್ಪು ಸೇರಿಸಿ.

- ತಕ್ಷಣವೇ ಕತ್ತರಿಸಿದ ಬದನೆಕಾಯಿಯನ್ನು ಇದರಲ್ಲಿ ಹಾಕಿಡಿ.

- ಬದನೆಯಕಾಯಿ ತನ್ನ ನೈಸರ್ಗಿಕ ಬಿಳಿ ಬಣ್ಣವನ್ನು ಕಾಯ್ದುಕೊಳ್ಳಲು, ಕತ್ತರಿಸಿದ ತುಂಡುಗಳನ್ನು ಒಂದು ಚಮಚ ಮಜ್ಜಿಗೆ ಅಥವಾ ಹಾಲು ಸೇರಿಸಿದ ನೀರಿನಲ್ಲಿ ಇಡಿ.

- ನೀರಿನಲ್ಲಿ ಹಾಕಲು ಸಾಧ್ಯವಾಗದಿದ್ದರೆ ಕತ್ತರಿಸಿದ ಬದನೆಯಕಾಯಿಯ ಮೇಲೆ ಸ್ವಲ್ಪ ಲಿಂಬೆ ರಸವನ್ನು ಸವರಬಹುದು. ಇದು ಆಕ್ಸಿಡೀಕರಣ ಪ್ರಕ್ರಿಯೆಯನ್ನು ತಡೆಯುತ್ತದೆ.

- ನೀರಿಗೆ ಕೆಲವು ಹನಿ ವಿನೆಗರ್ ಹಾಕಿ, ಬದನೆಕಾಯಿ ತುಂಡುಗಳನ್ನು ಅದರಲ್ಲಿ ಇಟ್ಟರೆ ಬಣ್ಣ ಬದಲಾಗುವುದಿಲ್ಲ. ಅಡುಗೆಗೆ ಮಸಾಲೆ ಅಥವಾ ಒಗ್ಗರಣೆ ಸಿದ್ಧವಾದ ಬಳಿಕವೇ ಬದನೆಕಾಯಿಯನ್ನು ಕತ್ತರಿಸುವುದು ಉತ್ತಮ. ಬಹಳ ಹೊತ್ತು ಮುಂಚೆ ಕತ್ತರಿಸಿ ಗಾಳಿಗೆ ಒಡ್ಡಬೇಡಿ.