ಕೊರೊನಾ ನೆಗೆಟಿವ್ ವರದಿ ಬಂದರೂ ಈ ಲಕ್ಷಣಗಳಿವೆಯೇ? ನಿರ್ಲಕ್ಷ್ಯ ಮಾಡಲೇಬಾರದು

RT-PCR ಪರೀಕ್ಷೆಯಲ್ಲಿ ತಪ್ಪು ವರದಿಯೂ ಬರಬಹುದು?

ಹೌದು ಕೋವಿಡ್ 19 ಪರೀಕ್ಷೆಯಾದ RT-PCRನಲ್ಲಿ ಕೆಲವೊಮ್ಮೆ ತಪ್ಪು ವರದಿ ಬರುವ ಸಾಧ್ಯತೆ ಇದೆ. ಕೋವಿಡ್‌ 19ನ ಎಲ್ಲಾ ಲಕ್ಷಣಗಳಿದ್ದರೂ ಪರೀಕ್ಷೆಯ ವರದಿಯಲ್ಲಿ ನೆಗೆಟಿವ್ ಎಂದು ಬಂದಿರುತ್ತದೆ. ಈ ರೀತಿ ತಪ್ಪಾದ ವರದಿ ಬರಲು ಅನೇಕ ಕಾರಣಗಳಿವೆ.

ಕೋವಿಡ್ 19 ಲಕ್ಷಣಗಳಿದ್ದರೂ ಈ ರೀತಿ ತಪ್ಪಾದ ವರದಿ ಬರಲು ಕಾರಣಗಳು

ಈಗ ಬಂದಿರುವ ಕೊರೊನಾ ಎರಡನೇ ಅಲೆಯು ರೂಪಾಂತರ ಕೊರೊನಾ ವೈರಸ್‌ನಿಂದಾಗಿ ಉಂಟಾಗಿದೆ. ಕೆಲವೊಮ್ಮೆ RT-PCR ಪರೀಕ್ಷೆಯಲ್ಲಿ ಈ ರೂಪಾಂತರ ತಳಿ ಪತ್ತೆಯಾಗುವುದಿಲ್ಲ. ಈ ಕಾರಣದಿಂದಾಗಿ ವರದಿಯು ನೆಗೆಟಿವ್ ಬರುತ್ತದೆ.

ಇದಲ್ಲದೆ ದೇಹದಲ್ಲಿ ವೈರಸ್ ಪ್ರಮಾಣ ತುಂಬಾ ಕಡಿಮೆಯಿದ್ದರೂ ಪರೀಕ್ಷೆಯಲ್ಲಿ ಪತ್ತೆಯಾಗದಿರುವ ಸಾಧ್ಯತೆ ಇದೆ. ಕೆಲವೊಮ್ಮೆ ಸ್ವ್ಯಾಬ್ ಸ್ಟಿಕ್ ಮೂಗಿನ ಒಳಗಡೆ ಹಾಕಿದ್ದು ಸರಿಯಿಲ್ಲದಿದ್ದರೆ ಕೂಡ ನೆಗೆಟಿವ್ ವರದಿ ಬರಬಹುದು.

ವರದಿ ನೆಗೆಟಿವ್‌ ಬಂದರೂ ಈ ಲಕ್ಷಣಗಳಿವೆಯೇ ಗಮನಿಸಿ

ಕೋವಿಡ್ 19 ಪರೀಕ್ಷೆಯಲ್ಲಿ ನೆಗೆಟಿವ್‌ ವರದಿ ಬಂದರೂ ನಿಮ್ಮಲ್ಲಿ ಕೊರೊನಾ ಲಕ್ಷಣಗಳಿದ್ದರೆ ಹೊರಗಡೆ ತಿರುಗಾಡುವುದು, ಮನೆಯವರೊಂದಿಗೆ ಬೆರೆಯುವುದು ಮಾಡಬಾರದು, ಪ್ರತ್ಯೇಕ ಒಂದು ರೂಮ್‌ನಲ್ಲಿರಿ. ಅಲ್ಲದೆ ಈ ಲಕ್ಷಣಗಳು ಕಂಡು ಬಂದರೆ ವರದಿ ನೆಗೆಟಿವ್ ಆದರೂ ಕೊರೊನಾ ಸೋಂಕು ತಗುಲಿರುತ್ತದೆ. ಸಿಟಿ ಸ್ಕ್ಯಾನ್ ಮಾಡಿಸಿದರೆ ಖಚಿತವಾದ ವರದಿ ಸಿಗುವುದು.

ಬಾಯಿಗೆ ಏನೂ ರುಚಿ ಗೊತ್ತಾಗುತ್ತಿಲ್ಲವೇ?

ಕೊರೊನಾ ಸೋಂಕು ತಗುಲಿದಾಗ ಕಂಡು ಬರುವ ಪ್ರಮುಖ ಲಕ್ಷಣಗಳಲ್ಲಿ ಒಂದು ಬಾಯಿಗೆ ರುಚಿ ಇಲ್ಲವಾಗುವುದು, ಯಾವುದೇ ಆಹಾರ ತಿಂದರೂ ಅದರ ರುಚಿ ಗೊತ್ತಾಗುವುದಿಲ್ಲ. ಖಾರದ ಹಸಿ ಮೆಣಸು ಕಚ್ಚಿದರೂ ಏನೂ ಅನಿಸುವುದೇ. ಇನ್ನು ಕೆಲವರಿಗೆ ಮೂಗಿಗೆ ವಾಸನೆ ಕೂಡ ಬಡಿಯುವುದಿಲ್ಲ. ಈ ರೀತಿಯ ಲಕ್ಷಣಗಳು ಜ್ವರ ಬರುವ ಮೊದಲೇ ಕಂಡು ಬರಬಹುದು. ಅಲ್ಲದೆ ಈ ಲಕ್ಷಣ ರೋಗದಿಂದ ಗುಣಮುಖರಾದ ಮೇಲೂ ಕೆಲವು ದಿನಗಳವರೆಗೆ ಇರಬಹುದು.

ಚಳಿ-ಜ್ವರ

ಚಳಿ-ಜ್ವರ ಕೂಡ ಕೋವಿಡ್‌ 19 ಲಕ್ಷಣವಾಗಿದೆ. ಚಳಿ-ಜ್ವರಕ್ಕೆ ಔಷಧಿ ತೆಗೆದುಕೊಂಡ ಮೇಲೂ ಜ್ವರ ಬಿಡದೆ ಹಾಗೇ ಇದ್ದು ಮೈ ತುಂಬಾ ಚಳಿಯಾಗುತ್ತಿದ್ದರೆ ಅದು ಕೊರೊನಾ ಸೋಂಕಿನ ಲಕ್ಷಣವಾಗಿದೆ.

ತಲೆಸುತ್ತು

ಕೋವಿಡ್ 19 ಸೋಂಕಿತರು ತಲೆಸುತ್ತು, ಸುಸ್ತು ಎಂದು ಹೇಳ್ತಾ ಇರುತ್ತಾರೆ. ಕೊರೊನಾ ಸೋಂಕು ತಗುಲಿದವರಿಗೆ ಎದ್ದು ನಡೆದಾಡಲೂ ಕಷ್ಟವಾಗಬಹುದು, ಈ ಸುಸ್ತು ದೇಹವನ್ನು ತುಂಬಾ ಬಲಹೀನವಾಗಿಸುತ್ತದೆ.

ಗಂಟಲು ಕೆರೆತ

ಅನೇಕರಿಗೆ ಗಂಟಲು ಕೆರೆತ, ಕೆಮ್ಮು ಕಂಡು ಬಂದಾಗ ಇದು ಸಾಮನ್ಯ ಕೆಮ್ಮು ಆಗಿರಬಹುದೇ ಅಥವಾ ಕೋವಿಡ್ 19 ಇರಬಹುದೇ ಎಂದು ಹೇಳಲು ಸಾಧ್ಯವಾಗುವುದಿಲ್ಲ. ಗಂಟಲು ಕೆರೆತ ಜೊತೆಗೆ ನಿರಂತರ ಕೆಮ್ಮು ಹಾಗೂ ಜ್ವರವಿದ್ದರೆ ಅದು ಕೋವಿಡ್ 19ನ ಲಕ್ಷಣವಾಗಿರಬಹುದು.

ಹೊಟ್ಟೆ ಹಾಳಾಗುವುದು

ಕೊರೊನಾ ಸೋಂಕು ತಗುಲಿದಾಗ ಇನ್ನು ಕೆಲವರಿಗೆ ಬೇಧಿ, ವಾತಿ ಕಂಡು ಬರುತ್ತದೆ. ಇದರಿಂದ ತೀವ್ರ ಕಿಬ್ಬೊಟ್ಟೆಯ ಸೆಳೆತ ಉಂಟಾಗಬಹುದು.

ಪರೀಕ್ಷೆಯಲ್ಲಿ ನೆಗೆಟಿವ್ ಬಂದು ಕೋವಿಡ್ 19 ಲಕ್ಷಣಗಳಿದ್ದರೆ ಏನು ಮಾಡಬೇಕು?

ಕೊರೊನಾ ಪರೀಕ್ಷೆಯಲ್ಲಿ ನೆಗೆಟಿವ್ ಬಂದು ಕೊರೊನಾ ಲಕ್ಷಣಗಳಿದ್ದರೆ ಮೊದಲಿಗೆ ನೀವು ಮಾಡಬೇಕಾಗಿರುವುದು ಯಾರ ಸಂಪರ್ಕಕ್ಕೆ ಬಾರದೆ ಪ್ರತ್ಯೇಕವಾಗಿ ಇರುವುದು. ಜ್ವರ, ಕೆಮ್ಮು ಸುಸ್ತು ಕಡಿಮೆಯಾಗಲು ಔಷಧಿ ತೆಗೆದುಕೊಳ್ತಾ ಇರಿ ಹಾಗೂ ನಿಮ್ಮ ದೇಹದಲ್ಲಿ ಆಮ್ಲಜಕ ಪ್ರಮಾಣ ಎಷ್ಟಿದೆ ಎಂದು ಪರೀಕ್ಷಿಸುತ್ತಾ ಇರಿ. ಅಮ್ಲಜನಕ ಕಡಿಮೆಯಾದರೆ ಕೂಡಲೇ ವೈದ್ಯರಿಗೆ ಕರೆ ಮಾಡಿ ಆಸ್ಪತ್ರೆಗೆ ದಾಖಲಾಗಿ, ಇಲ್ಲಾಂದರೆ 2 ದಿನಗಳ ಬಳಿಕ ಮತ್ತೊಮ್ಮೆ RT PCR ಪರೀಕ್ಷೆ ಮಾಡಿಸಿ, ಆಗಲೂ ನೆಗೆಟಿವ್ ಬಂದರೆ CT ಸ್ಕ್ಯಾನ್ ಮಾಡಿಸಿ.