ಪ್ರಾಸ್ಟೇಟ್ ಕ್ಯಾನ್ಸರ್ ಅಪಾಯವನ್ನು ಕಡಿಮೆ ಮಾಡುವ ಆಹಾರಗಳು

ಬ್ರೋಕೋಲಿ

ಪ್ರಾಸ್ಟೇಟ್ ಕ್ಯಾನ್ಸರ್ ಸಾಧ್ಯತೆಯನ್ನು ಕಡಿಮೆಗೊಳಿಸಲು ಬ್ರೋಕೋಲಿ ಎಂಬ ಹಸಿರು ಹೂಕೋಸಿನಂತಹ ತರಕಾರಿ ಅತ್ಯುತ್ತಮ ಆಯ್ಕೆಯಾಗಿದೆ. ಇದರಲ್ಲಿ ಕಾರ್ಬೋಹೈಡ್ರೇಟುಗಳು ಕಡಿಮೆ ಪ್ರಮಾಣದಲಿದ್ದು ಆಂಟಿ ಆಕ್ಸಿಡೆಂಟ್ ಹಾಗೂ ಫೈಟೋಕೆಮಿಕಲ್ಸ್ ಎಂಬ ಪೋಷಕಾಂಶಗಳು ಹೆಚ್ಚಿನ ಪರಿಮಾಣದಲ್ಲಿರುವ ಕಾರಣ ಇದು ಜೀವಕೋಶಗಳ ಮೇಲೆ ಆಗುವ ಹಾನಿಯನ್ನು ತಡೆದು ತನ್ಮೂಲಕ ಕ್ಯಾನ್ಸರ್ ನ ಸಾಧ್ಯತೆಯನ್ನು ಕಡಿಮೆ ಮಾಡುತ್ತದೆ.

ದಾಳಿಂಬೆ ರಸ

ದಾಳಿಂಬೆಯಲ್ಲಿ ಹೆಚ್ಚಿನ ಪ್ರಮಾಣದ ಆಂಟಿ ಆಕ್ಸಿಡೆಂಟುಗಳಿವೆ. ನಿಯಮಿತವಾಗಿ ದಾಳಿಂಬೆ ರಸವನ್ನು ಸೇವಿಸುತ್ತಾ ಬರುವ ಮೂಲಕ ಕ್ಯಾನ್ಸರ್ ಪೀಡಿತ ಜೀವಕೋಶಗಳ ಚಲನೆ ನಿಯಂತ್ರಿಸಬಹುದು ಹಾಗೂ ಈ ಜೀವಕೋಶಗಳನ್ನು ಆಕರ್ಷಿಸುವ ಒಂದು ಬಗೆಯ ರಾಸಾಯನಿಕ ಸಂಕೇತವನ್ನು ಇಲ್ಲವಾಗಿಸುವ ಮೂಲಕ ಪ್ರಾಸ್ಟ್ರೇಟ್ ನ ಸ್ಥಾನಾಂತರ (metastasis of prostate) ದ ಮೂಲಕ ಮೂಳೆಗಳಿಗೆ ಕ್ಯಾನ್ಸರ್ ಹರಡದಂತೆ ತಡೆಯುತ್ತದೆ.

ಸೋಯಾ ಅವರೆ

ಕೆಲವು ಸಂಶೋಧನೆಗಳಲ್ಲಿ ಕಂಡುಕೊಂಡಂತೆ ಸೋಯಾ ಅವರೆ ಸಹಾ ಪ್ರಾಸ್ಟೇಟ್ ಕ್ಯಾನ್ಸರ್ ಆವರಿಸುವುದರಿಂದ ತಡೆಯುತ್ತದೆ. ಇದರಲ್ಲಿರುವ ಐಸೋಫ್ಲೇವೋನ್ ಗಳು ಪ್ರಾಸ್ಟೇಟ್ ಗ್ರಂಥಿಯ ಜೀವಕೋಶಗಳು ಉರಿಯೂತಕ್ಕೆ ಒಳಗಾಗುವುದನ್ನು ತಡೆಯುತ್ತದೆ ಹಾಗೂ ತನ್ಮೂಲಕ ಈ ಜೀವಕೋಶಗಳ ಬೆಳವಣಿಗೆ ಹಾಗೂ ಕ್ಯಾನ್ಸರ್ ಹರಡುವುದನ್ನು ತಡೆಯುತ್ತದೆ. ಇದೇ ಕಾರಣದಿಂದ ಸೋಯಾ ಅವರೆಯನ್ನು ನಿತ್ಯವೂ ಆಹಾರದಲ್ಲಿ ಅಳವಡಿಸಿಕೊಳ್ಳುವುದು ಉತ್ತಮ.

ಕ್ಯಾರೆಟ್

ಕ್ಯಾರೆಟ್ (ಕನ್ನಡದಲ್ಲಿ ಗಜ್ಜರಿ) ಸಹಾ ಇನ್ನೊಂದು ಉತ್ತಮವಾದ ತರಕಾರಿಯಾಗಿದ್ದು ಪ್ರಾಸ್ಟೇಟ್ ಗ್ರಂಥಿಯ ಆರೋಗ್ಯವನ್ನು ಕಾಪಾಡಲು ನೆರವಾಗುತ್ತದೆ. ಕ್ಯಾರೆಟ್ಟುಗಳಲ್ಲಿ ಉತ್ತಮ ಪ್ರಮಾಣದ ಬೀಟ್ಯಾ ಕ್ಯಾರೋಟೀನ್ ಎಂಬ ಕ್ಯಾರೋಟಿನಾಯ್ಡು ಇದ್ದು ಇದು ಜೀರ್ಣಕ್ರಿಯೆಯಲ್ಲಿ ವಿಟಮಿನ್ ಎ ಆಗಿ ಪರಿವರ್ತಿತವಾಗುತ್ತದೆ. ಇದರೊಂದಿಗೇ ಕ್ಯಾರೆಟ್ಟುಗಳಲ್ಲಿರುವ ಆಂಟಿ ಆಕ್ಸಿಡೆಂಟುಗಳು ಆರೋಗ್ಯವನ್ನು ವೃದ್ದಿಸಿ ಕಾಪಾಡುವುದಲ್ಲದೇ ಪ್ರಾಸ್ಟೇಟ್ ಕ್ಯಾನ್ಸರ್ ಆವರಿಸುವ ಸಾಧ್ಯತೆಯನ್ನೂ ಕಡಿಮೆಗೊಳಿಸುತ್ತದೆ. ನಿಮ್ಮ ನಿತ್ಯದ ಆಹಾರದಲ್ಲಿ ಸಾಲಾಡ್ ನೊಂದಿಗೆ ಹಸಿಯಾಗಿ ಕ್ಯಾರೆಟ್ ಅನ್ನು ತಿನ್ನುವುದು ಎಲ್ಲಾ ರೀತಿಯಿಂದಲೂ ಆರೋಗ್ಯಕರವಾಗಿದೆ.

ಅಕ್ರೋಟು

ಪ್ರಾಸ್ಟೇಟ್ ಗ್ರಂಥಿಯ ಕ್ಯಾನ್ಸರ್ ತಡೆಗಟ್ಟುವ ಗುಣವಿರುವ ಆಹಾರಗಳ ಪಟ್ಟಿಯಲ್ಲಿ ಆಕ್ರೋಟು ಅಗ್ರಸ್ಥಾನ ಪಡೆಯುತ್ತದೆ. ಇದರಲ್ಲಿ ಅತಿ ಕಡಿಮೆ ಕಾರ್ಬೋಹೈಡ್ರೇಟುಗಳಿವೆ ಹಾಗೂ ಹೆಚ್ಚಿನ ಪ್ರಮಾಣದಲ್ಲಿ ಒಮೆಗಾ-3 ಕೊಬ್ಬಿನ ಆಮ್ಲಗಳಿವೆ. ಈ ಗುಣಗಳಿಂದ ಅಕ್ರೋಟನ್ನು ನಿಯಮಿತವಾಗಿ ಸೇವಿಸುತ್ತ ಬಂದ ವ್ಯಕ್ತಿಗಳ ದೇಹದಲ್ಲಿ IGF-1 ಎಂಬ ಹೆಸರಿನ ರಸದೂತದ ಪ್ರಮಾಣ ಕಡಿಮೆ ಇರುತ್ತದೆ. ಈ ರಸದೂತ ಪ್ರಾಸ್ಟೇಟ್ ಕ್ಯಾನ್ಸರ್ ಆವರಿಸುವ ಸಾಧ್ಯತೆ ಹೆಚ್ಚಿಸುವ ಮುಖ್ಯ ಕೊಂಡಿಯಾಗಿದೆ. ನಿತ್ಯವೂ ನಾಲ್ಕಾರು ಅಕ್ರೋಟುಗಳನ್ನು ತಿನ್ನುತ್ತಾ ಬರುವ ಮೂಲಕ ಈ ಸಾಧ್ಯತೆಯನ್ನು ಕನಿಷ್ಠವಾಗಿಸಬಹುದು.