ಅಚ್ಚರಿಯಾದರೂ ನಿಜ-ತೂಕ ಇಳಿಸಲು 'ಬಾಳೆಹಣ್ಣಿನ ಡಯಟ್'!

ಬಾಳೆಹಣ್ಣನ್ನು ಬೆಳಗಿನ ಉಪಹಾರವಾಗಿ ಬಳಸಿ

ಬೆಳಗಿನ ಲಘು ಉಪಹಾರ ಆ ದಿನದ ಬಹು ಮುಖ್ಯ ಆಹಾರವಾಗಿರುವುದರಿಂದ, ಗುಣಮಟ್ಟ ಹಾಗೂ ಪೌಷ್ಟಿಕಾಂಶದಿಂದ ಕೂಡಿರುವ ಆಹಾರವನ್ನು ಬೆಳಗಿನ ಸಮಯದಲ್ಲಿ ಸೇವಿಸುವುದು ಸೂಕ್ತ. ಕೇವಲ 2 ಬಾಳೆಹಣ್ಣು ಸೇವನೆಯಿಂದ ನಿಮ್ಮ ದಿನವನ್ನು ಪ್ರಾರಂಭಿಸಿ. ನಂತರವೂ ನಿಮಗೆ ಹಸಿವಾದಲ್ಲಿ ಮತ್ತೊಂದು ಬಾಳೆಹಣ್ಣು ಮತ್ತು ಸಿಹಿ ಮುಕ್ತವಾದ ಓಟ್ಸ್ ಅನ್ನು ಸೇವಿಸಬಹುದು. ಇದಾದ ನಂತರ ಜೀರ್ಣಕ್ರಿಯೆ ಹೆಚ್ಚಾಗಲು ಅಗತ್ಯದಷ್ಟು ನೀರನ್ನು ಕುಡಿಯಲೇಬೇಕು. ದೇಹದ ತೂಕವನ್ನು ಇಳಿಸಿಲು ಇದು ಸರಳ ಹಾಗೂ ಸುಲಭದ ವಿಧಾನ.

ಮಧ್ಯಾಹ್ನದ ಭೋಜನಕ್ಕೆ ಬಾಳೆಹಣ್ಣು

ಮಧ್ಯಾಹ್ನದ ಊಟದಲ್ಲಿ ಬಾಳೆಹಣ್ಣಿನ ಸತ್ವವಿರುವ ಆಹಾರವನ್ನು ಹೆಚ್ಚು ಸೇವಿಸಲು ಪ್ರಯತ್ನಿಸಿ. ಅವಶ್ಯವಿದ್ದಲ್ಲಿ ಬಾಳೆಹಣ್ಣಿನ ರಸಾಯನ ಅಥವಾ ಪಾನೀಯವನ್ನು ಬಳಸಬಹುದು. ನಿಮ್ಮ ಮಧ್ಯಾಹ್ನದ ಊಟದ ಜೊತೆಗೆ ಕನಿಷ್ಠ 4 ರಿಂದ 5 ಬಾಳೆಹಣ್ಣಾದರೂ ಇರುವಂತೆ ನೋಡಿಕೊಳ್ಳಿ. ಅದರಲ್ಲೂ ಪುಟ್ಟ ಬಾಳೆಹಣ್ಣನ್ನು ಹೆಚ್ಚು ಸೇವಿಸುವುದು ಉತ್ತಮ ಏಕೆಂದರೆ ಅದರಲ್ಲಿ ಕ್ಯಾಲೊರೀಸ್ ಕಡಿಮೆ ಇದ್ದು, ನಿಮ್ಮ ದೇಹದ ತೂಕವನ್ನು ಕಡಿಮೆ ಮಾಡಲು ನೆರವಾಗುತ್ತದೆ.

ರಾತ್ರಿ ಊಟಕ್ಕೆ ಬಾಳೆಹಣ್ಣು ಸೇವಿಸುವಿಕೆ

ರಾತ್ರಿ ಊಟವನ್ನು ಸಮಯ 7.3೦ ರೊಳಗೆ ಸೇವಿಸುವುದು ಅತೀ ಮುಖ್ಯ. ನಿಮ್ಮ ರಾತ್ರಿ ಊಟವು ಎರಡು ರೋಟಿ ಅಥವಾ ಒಂದು ಕಪ್ ಸಬ್ಬಕ್ಕಿಯ ಅನ್ನವಿದ್ದರೆ ಸಾಕು. ಹಳೆಯ ಶೈಲಿಯ ಕಾಳಿನ ಗೊಜ್ಜನ್ನು ಪಕ್ಕಕ್ಕಿರಿಸಿ ಮಾಗಿದ ಬಾಳೆಹಣ್ಣನ್ನು ರೋಟಿಯೊಂದಿಗೆ ಸೇವಿಸಲು ಪ್ರಾರಂಭಿಸಿ. ಅನ್ನಕ್ಕೆ ಒಂದು ಚಮಚ ಮೊಸರನ್ನು ಬೆರೆಸಿ ಅದಕ್ಕೆ ಬಾಳೆಹಣ್ಣಿನ ಹೋಳುಗಳನ್ನು ಸೇರಿಸಿ ಸೇವಿಸಿ. ಕೊನೆಯಲ್ಲಿ ಅವಶ್ಯಕ್ಕೆ ತಕ್ಕಷ್ಟು ನೀರನ್ನು ಕುಡಿಯಲು ಮರೆಯದಿರಿ.

ನೀರಿನ ಅಂಶದ ಬಳಕೆ

ಈ ಬಾಳೆಹಣ್ಣಿನ ಆಹಾರ ಪದ್ಧತಿಯಲ್ಲಿ ನೀರು ಅತಿ ಮುಖ್ಯ ಸತ್ವವಾಗಿದೆ. ಬಾಳೆಹಣ್ಣನ್ನು ಹೊರತುಪಡಿಸಿ ನೀರನ್ನು ಮಾತ್ರ ಹೆಚ್ಚು ಸೇವಿಸಬೇಕು. ಕುಡಿಯುವ ನೀರು ಸಾಮಾನ್ಯ ತಾಪಮಾನದಲ್ಲಿ ಇರುವಂತೆ ನೋಡಿಕೊಳ್ಳಬೇಕು. ಒಂದು ಮುಖ್ಯವಾದ ಸಂಗತಿಯೆಂದರೆ ನೀರನ್ನು ರಭಸವಾಗಿ ಕುಡಿಯದೆ ನಿಧಾನವಾಗಿ ಕುಡಿಯುವ ಅಭ್ಯಾಸವನ್ನು ರೂಢಿಸಿಕೊಳ್ಳಿ.

ಲಘು ಆಹಾರ ಬಳಕೆ

ದಿನದ ಮಧ್ಯೆ ನಿಮಗೆ ಹಸಿವಾದಲ್ಲಿ, ಆರೋಗ್ಯಯುತ ಕಡಿಮೆ ಕ್ಯಾಲೋರಿ ಹೊಂದಿರುವ ಪೌಷ್ಠಿಕಾಂಶಯುಕ್ತ ಲಘು ಆಹಾರವನ್ನು ಆಯ್ದುಕೊಳ್ಳಿ. ತಾಜಾ ಹಣ್ಣುಗಳು ಮತ್ತು ಬೇಯಿಸಿದ ತರಕಾರಿಗಳು ಉತ್ತಮ ಆಯ್ಕೆ. ಈ ಬಾಳೆಹಣ್ಣಿನ ಆಹಾರ ಪದ್ಧತಿಯನ್ನು ಅನುಸರಿಸುವವರು, ಉಪ್ಪುರಹಿತ ಹುರಿದ ಜೋಳವನ್ನು ಸೇವಿಸುವುದರಿಂದ ಹೆಚ್ಚು ಪರಿಣಾಮಕಾರಿಯಾಗುತ್ತದೆ.

ಮಲಗುವ ವೇಳೆಯ ನಿಯಮಗಳು

ದಿನಕ್ಕೆ ಕನಿಷ್ಠ 8 ಗಂಟೆಗಳ ಕಾಲ ನಿದ್ರಿಸುವುದನ್ನು ಮರೆಯದಿರಿ. ನಿಮ್ಮ ಉತ್ತಮ ಆರೋಗ್ಯಕ್ಕೆ ಹಾಗೂ ದೇಹದ ತೂಕ ಕಡಿಮೆಗೊಳಿಸಲು ಅವಶ್ಯಕವಿದ್ದಷ್ಟು ನಿದ್ರಿಸುವುದು ತುಂಬಾ ಮುಖ್ಯವಾದ ಅಂಶ. ನಿಮ್ಮ ರಾತ್ರಿ ಊಟದ ಸಮಯಕ್ಕೂ ಹಾಗೂ ಮಲಗುವ ಸಮಯಕ್ಕೂ ಕನಿಷ್ಠ 4 ಗಂಟೆಗಳ ಅಂತರವಿದ್ದರೆ ಒಳ್ಳೆಯದು.

ವ್ಯಾಯಮ ನಿಮಗೆ ಅಗತ್ಯವೇ?

ಈ ಆಹಾರ ಪದ್ಧತಿಯಲ್ಲಿ ಹೆಚ್ಚಿನ ವ್ಯಾಯಮದ ಅಗತ್ಯವಿಲ್ಲ. ನಿಮ್ಮ ದೇಹದ ಸಾಮರ್ಥ್ಯವನ್ನು ಆಧರಿಸಿ ವ್ಯಾಯಮ ಮಾಡುವ ಬಗ್ಗೆ ನೀವು ನಿರ್ಧರಿಸಬಹುದು ಅಥವಾ ವ್ಯಾಯಮ ಮಾಡದೆಯೇ ಇರಬಹುದು.