ನಿಮ್ಮ ಹೊಟ್ಟೆಯ ಆರೋಗ್ಯಕ್ಕಾಗಿ 10 ಅತ್ಯುತ್ತಮ ಆಹಾರಗಳು

ಮೊಸರು

ಕೀಟಗಳಂತೆಯೇ ಬ್ಯಾಕ್ಟೀರಿಯಾಗಳಲ್ಲೂ ಎರಡು ವಿಧಗಳಿವೆ. ಒಳ್ಳೆಯ ಮತ್ತು ಕೆಟ್ಟ ಬ್ಯಾಕ್ಟೀರಿಯಾ. ಮೊಸರಿನ ಪ್ರತಿ ಬಿಂದುವಿನಲ್ಲಿಯೂ ಲಕ್ಷಾಂತರ ಒಳ್ಳೆಯ ಬ್ಯಾಕ್ಟೀರಿಯಾಗಳಿದ್ದು ನಮ್ಮ ಹೊಟ್ಟೆ ಮಾಡುವ ಅರ್ಧಕ್ಕಿಂತಲೂ ಹೆಚ್ಚು ಕೆಲಸವನ್ನು ಅವು ಈಗಾಗಲೇ ಮಾಡಿರುವುದರಿಂದ ಹೊಟ್ಟೆಯ ಕೆಲಸ ಸುಲಭವಾಗುತ್ತದೆ. ಪರಿಣಾಮವಾಗಿ ಮೊಸಲು ಅತಿ ಸುಲಭವಾಗಿ ಜೀರ್ಣವಾಗುತ್ತದೆ ಹಾಗೂ ಆರೋಗ್ಯ ವೃದ್ಧಿಸುತ್ತದೆ.

ಕೊಬ್ಬುರಹಿತ ಮಾಂಸ

ನಮ್ಮ ಕರುಳುಗಳ ಉದ್ದ ಅತ್ತ ಸಸ್ಯಾಹಾರಿಗಳಷ್ಟು ಉದ್ದವಾಗಿಯೂ ಇಲ್ಲ, ಇತ್ತ ಮಾಂಸಾಹಾರಿ ಪ್ರಾಣಿಗಳಷ್ಟು ಚಿಕ್ಕದಾಗಿಯೂ ಇಲ್ಲ. ಹಾಗಾಗಿ ನಾವು ಹಸಿಹುಲ್ಲನ್ನು ತಿನ್ನಲಾರೆವು, ಮಾಂಸವನ್ನು ಹಸಿಯಾಗಿಯೂ ಸೇವಿಸಲಾರೆವು. ಇದೇ ಕಾರಣದಿಂದಾಗಿ ನಮಗೆ ಆಹಾರವನ್ನು ಬೇಯಿಸಿ ತಿನ್ನಬೇಕಾಗುತ್ತದೆ. ಸಾಧಾರಣವಾಗಿ ಮಾಂಸದ ಜೊತೆ ಚರ್ಬಿ ಅಥವಾ ಕೊಬ್ಬು ಜೊತೆಯಲ್ಲಿಯೇ ಬರುವುದರಿಂದ ಬೇಯಿಸಿದಾಗ ಈ ಕೊಬ್ಬು ಕರಗಿ ಹೊಟ್ಟೆ ಸೇರುತ್ತದೆ. ಕೆಟ್ಟ ಕೊಲೆಸ್ಟರಾಲ್ ಆದ ಈ ಕೊಬ್ಬು ಬಳಿಕ ರಕ್ತ ಸೇರಿ ಆರೋಗ್ಯಕ್ಕೆ ಮಾರಕವಾಗುತ್ತದೆ. ಬದಲಿಗೆ ಕೊಬ್ಬು ಇಲ್ಲದ ಮಾಂಸ ಆರೋಗ್ಯಕ್ಕೆ ಉತ್ತಮವಾಗಿದೆ. ಎಲ್ಲಾ ಸಾಗರದ ಮಾಂಸಾಹಾರ, ಚರ್ಮರಹಿತ ಕೋಳಿ ಮಾಂಸ ಉತ್ತಮ ಆದರೆ ಕೆಂಪು ಮಾಂಸಗಳಾದ ಕುರಿ, ದನ ಮೊದಲಾದ ಮಾಂಸಗಳು ಜೀರ್ಣಿಸಿಕೊಳ್ಳಲು ಸುಲಭವಾದರೂ ಅದರೊಂದಿಗೆ ಬರುವ ಚರ್ಬಿಯಲ್ಲಿ ಕೆಟ್ಟ ಕೊಲೆಸ್ಟ್ರಾಲ್ ಅಪಾರ ಪ್ರಮಾಣದಲ್ಲಿರುವುದರಿಂದ ಸೇವಿಸುವ ಪ್ರಮಾಣ ಮಾತ್ರ ಕಡಿಮೆ ಇರಬೇಕು. ಹಾಗೂ ಮೆದುಳಿನಲ್ಲಿ (ಭೇಜಾ ಫ್ರೈ) ಅತ್ಯಧಿಕ ಪ್ರಮಾಣದಲ್ಲಿ ಕೆಟ್ಟ ಕೊಲೆಸ್ಟ್ರಾಲ್ ಇರುವುದರಿಂದ ಇದರ ಸೇವನೆಯನ್ನು ವರ್ಜಿಸುವುದೇ ನಮ್ಮ ಹೃದಯಗಳಿಗೆ ಒಳ್ಳೆಯದು.

ಬಾಳೆಹಣ್ಣು

ವರ್ಷವಿಡೀ ಅಗ್ಗವಾಗಿ ಸಿಗುವ ಹಣ್ಣು ಎಂದರೆ ಬಾಳೆಹಣ್ಣು. ಒಂದು ಸೇಬು ವೈದ್ಯರನ್ನು ದೂರವಿರಿಸುವುದು ಎಂಬ ಮಾತಿಗೆ ಪೂರಕವಾಗಿ ದಿನಕ್ಕೆರಡು ಬಾಳೆಹಣ್ಣು ಸಹಾ ವೈದ್ಯರನ್ನು ದೂರವಿಡುವುದು ಎಂದರೂ ಸರಿ. ಏಕೆಂದರೆ ಬಾಳೆಹಣ್ಣಿನಲ್ಲಿ ಸುಲಭವಾಗಿ ಜೀರ್ಣವಾಗುವ ಹಲವು ಪೋಷಕಾಂಶಗಳಿದ್ದು ಆರೋಗ್ಯವನ್ನು ವರ್ಧಿಸುತ್ತವೆ. ಅಪಾರ ಪ್ರಮಾಣದಲ್ಲಿ ಕರಗುವ ನಾರು ಇದ್ದು ಮಲಬದ್ದತೆಯನ್ನು ತಡೆಯುತ್ತವೆ.

ಕಿತ್ತಳೆ ಹಣ್ಣು

ಕಿತ್ತಳೆಯಲ್ಲಿ ಅಪಾರ ಪ್ರಮಾಣದ ವಿಟಮಿನ್ ಸಿ ಜೊತೆಗೆ ಕರಗುವ ನಾರು ಇದೆ. ಇವೆರಡರ ಜೋಡಿ ಹೊಟ್ಟೆಗೆ ಅತ್ಯುತ್ತಮವಾಗಿದ್ದು ಜೀರ್ಣಕ್ರಿಯೆಯಲ್ಲಿ ಸಹಕರಿಸುತ್ತವೆ ಹಾಗೂ ಮಲಬದ್ದತೆಯನ್ನು ತಡೆಯುತ್ತವೆ. ವಿಟಮಿನ್ ಸಿ ದೇಹದ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಿ ಆರೋಗ್ಯವನ್ನು ರಕ್ಷಿಸುತ್ತದೆ.

ನವಣೆ (Quinoa)

ನವಣೆ ಅಥವಾ ಸಾವಕ್ಕಿ ಎಂದು ಕರೆಯಲಾಗುವ ಈ ಕಾಳುಗಳಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಅಮೈನೋ ಆಮ್ಲಗಳಿವೆ. ಈ ಆಮ್ಲಗಳು ಜಠರರಸದಲ್ಲಿ ಸುಲಭವಾಗಿ ಜೀರ್ಣಗೊಂಡು ದೇಹಕ್ಕೆ ಅಗತ್ಯವಾದ ಹಲವು ಪೋಷಕಾಂಶಗಳನ್ನು ನೀಡುತ್ತವೆ. ಇದುವರೆಗೆ ಕಡೆಗಣನೆಗೆ ಒಳಗಾಗಿದ್ದ ಈ ಅದ್ಭುತ ಕಾಳುಗಳನ್ನು ನಿಮ್ಮ ಪ್ರತಿದಿನದ ಆಹಾರಗಳಲ್ಲಿ ಅಳವಡಿಸುವ ಮೂಲಕ ಇನ್ನೂ ಹಲವು ಪ್ರಯೋಜನಗಳನ್ನು ಪಡೆಯಬಹುದು.

ಲಿಂಬೆ

ಲಿಂಬೆಹಣ್ಣಿನಲ್ಲಿರುವ ಸಿಟ್ರಸ್ ಆಮ್ಲ ಸಹಾ ಜಠರರಸದಲ್ಲಿ ಸುಲಭವಾಗಿ ಜೀರ್ಣವಾಗಿ ಇನ್ನುಳಿದ ಆಹಾರಗಳನ್ನು ಜೀರ್ಣಿಸಿಕೊಳ್ಳಲು ಸಹಕರಿಸುತ್ತದೆ. ಲಿಂಬೆರಸವನ್ನು ಸೇರಿಸಿದ ನೀರು ಜೀರ್ಣಾಂಗ ವ್ಯವಸ್ಥೆಯಲ್ಲಿನ ಕಲ್ಮಶಗಳನ್ನು ಹೊರಹಾಕಲು ಸಹಕರಿಸುತ್ತದೆ.

ಶುಂಠಿ

ಶುಂಠಿಯಲ್ಲಿ ಪ್ರಮುಖವಾಗಿ ನಿಯಾಸಿನ್ (Niacin (B3)) ಎಂಬ ಪೋಷಕಾಂಶವಿದೆ. ಇದೇ ಕಾರಣದಿಂದಾಗಿ ಶುಂಠಿ ಕೊಂಚ ಖಾರವಾಗಿರುತ್ತದೆ. ಈ ಪೋಷಕಾಂಶ ಕಡಿಮೆ ಪ್ರಮಾಣದಲ್ಲಿದ್ದರೆ ಜಠರರಸದೊಡಲು ಸುಲಲಿತವಾಗಿ ಮಿಳಿತಗೊಂಡು ಹೊಟ್ಟೆಯ ಹಲವು ತೊಂದರೆಗಳನ್ನು ನಿವಾರಿಸುತ್ತದೆ. ಆದರೆ ಈ ಪ್ರಮಾಣ ಹೆಚ್ಚಾದರೆ ಹೊಟ್ಟೆಗೆ ಮಾರಕವಾಗುವ ಕಾರಣ ಒಂದು ಚಮಚಕ್ಕಿಂತ ಹೆಚ್ಚಿನ ಪ್ರಮಾಣದ ಶುಂಠಿಯ ರಸವನ್ನು ಸೇವಿಸಬಾರದು. ಶುಂಠಿಯ ಉತ್ತಮ ಗುಣಗಳಿಂದಾಗಿ ಪ್ರಾಚೀನ ಕಾಲದಿಂದಲೂ ಹೊಟ್ಟೆಯ ತೊಂದರೆಗಳಿಗಾಗಿ ಎಲ್ಲಡೆ ಬಳಸಲ್ಪಡುತ್ತಿದೆ.

ದೊಣ್ಣೆಮೆಣಸು

ವಿವಿಧ ಬಣ್ಣಗಳಲ್ಲಿ ಲಭ್ಯವಿರುವ ದೊಣ್ಣೆಮೆಣಸಿನಲ್ಲಿ ಹಲವು ಆಂಟಿ ಆಕ್ಸಿಡೆಂಟುಗಳು ಹಾಗೂ ಫೈಟೋ ನ್ಯೂಟ್ರಿಯೆಂಟ್ ಗಳೆಂಬ ಪೋಷಕಾಂಶಗಳಿವೆ. ಈ ಕಾರಣದಿಂದಾಗಿ ತರಕಾರಿಯಂತೆ ಬಳಸಿದ ದೊಣ್ಣೆಮೆಣಸು ಹೊಟ್ಟೆಯ ಹಲವು ತೊಂದರೆಗಳನ್ನು ಹಾಗೂ ಸೋಂಕುಗಳನ್ನು ನಿವಾರಿಸಬಲ್ಲದು.

ಹಸಿರು ಸೊಪ್ಪುಗಳು

ಪಾಲಕ್, ಬಸಲೆ, ಕೇಲ್ (kale) ಮೊದಲಾದ ಹಸಿರುಸೊಪ್ಪುಗಳಲ್ಲಿ ಉತ್ತಮ ಪ್ರಮಾಣದ ಸತು, ವಿಟಮಿನ್ನುಗಳು ಹಾಗೂ ಆಂಟಿ ಆಕ್ಸಿಡೆಂಟುಗಳಿವೆ. ಅಲ್ಲದೇ ಉತ್ತಮ ಪ್ರಮಾಣದಲ್ಲಿ ಕರಗದ ನಾರು ಇದ್ದು ಮಲಬದ್ದತೆಯನ್ನು ತಡೆಯುತ್ತವೆ. ನಿಮ್ಮ ಆಹಾರದಲ್ಲಿ ಹಸಿಯಾಗಿ ತಿನ್ನಬಹುದಾದ ಯಾವುದೇ ಹಸಿರು ಸೊಪ್ಪುಗಳನ್ನು ಅಳವಡಿಸುವ ಮೂಲಕ ನಿಮ್ಮ ಜೀರ್ಣಶಕ್ತಿ ಉತ್ತಮಗೊಳ್ಳುವುದು ಮಾತ್ರವಲ್ಲ, ತೂಕ ಕಳೆದುಕೊಳ್ಳಲೂ ನೆರವಾಗುತ್ತದೆ.

ಇಡಿಯ ಗೋಧಿ

ಸಾಮಾನ್ಯವಾಗಿ ಹುಗ್ಗಿಯಂತಹ ಸಿಹಿ ಪದಾರ್ಥ ತಯಾರಿಸಲು ಬಿಟ್ಟರೆ ಇಡಿಯ ಗೋಧಿಯನ್ನು ನಾವು ಬಳಸುವುದೇ ಇಲ್ಲ. ಮಾರುಕಟ್ಟೆಯಲ್ಲಿ ದೊರಕುವ ಮೈದಾ ಮತ್ತು ಗೋಧಿಹಿಟ್ಟನ್ನು ಬಳಸುತ್ತೇವೆ. ಆರೋಗ್ಯದ ದೃಷ್ಟಿಯಿಂದ ಮೈದಾ ಸರ್ವಥಾ ಒಳ್ಳೆಯ ಆಹಾರವಲ್ಲ. ಏಕೆಂದರೆ ಗೋಧಿಯ ಹೊರಕವಚ ಮತ್ತು ಬೀಜಾಂಕುರವಾಗುವ ಮೊಳಕೆಯನ್ನೇ ಕಳಚಿ ಕೇವಲ ಒಳಭಾಗದ ಬಿಳಿಯ ಹಿಟ್ಟನ್ನು ಮಾತ್ರ ಪುಡಿಮಾಡಿ ಮೈದಾ ರೂಪದಲ್ಲಿ ನೀಡಲಾಗುತ್ತದೆ. ಇದರಲ್ಲಿ ನಾರು ಇಲ್ಲದೇ ಇರುವುದರಿಂದ ಕರುಳುಗಳಲ್ಲಿ ಮಲಬದ್ಧತೆ ಉಂಟಾಗುತ್ತದೆ. ಬದಲಿಗೆ ಗೋಧಿಹಿಟ್ಟನ್ನು ಬಳಸುವುದರಿಂದ ಜೀರ್ಣಕ್ರಿಯೆ ಉತ್ತಮಗೊಳ್ಳುತ್ತದೆ. ಇಡಿಯ ಗೋಧಿಯ ವ್ಯಂಜನಗಳನ್ನು ಆಗಾಗ ಸೇವಿಸುವುದರಿಂದ ದೇಹಕ್ಕೆ ಅಗತ್ಯವಾದ ಎಲ್ಲಾ ಪೋಷಕಾಂಶ ಹಾಗೂ ಕರಗದ ನಾರು ದೊರಕುವುದರಿಂದ ಇದು ಹೊಟ್ಟೆಗೆ ಅತ್ಯಂತ ಉತ್ತಮವಾದ ಆಹಾರವಾಗಿದೆ.