ನಿಮ್ಮ ದಾಹವನ್ನು ತಣಿಸಲು 10 ಸರಳ ವಿಧಾನಗಳು

ನೀರು

ಇದು ಬಾಯಾರಿಕೆಯನ್ನು ತಣಿಸಲು ಇರುವ ಅತ್ಯಂತ ಸುಲಭವಾದ ಮಾರ್ಗ. ಮನೆಯಲ್ಲಿ ಅಥವಾ ಅಂಗಡಿಯಲ್ಲಿ ದೊರೆಯುವ ಎಲ್ಲಾ ಲಘು ಪಾನೀಯಗಳಿಗೆ ಪ್ರಧಾನವಾಗಿ ನೀರನ್ನೆ ಬಳಸುತ್ತಾರೆ. ಯಾವಾಗಲು ಒಳ್ಳೆಯ ನೀರನ್ನು, ಸರಿಯಾದ ಪ್ರಮಾಣದಲ್ಲಿ ಕುಡಿಯುವ ಕ್ರಮವನ್ನು ರೂಢಿಸಿಕೊಳ್ಳಿ. ಆಗ ನೋಡಿ ನಿಮ್ಮ ದೇಹದಲ್ಲಿ ಉಂಟಾಗುವ ಬದಲಾವಣೆಗಳನ್ನು, ಅದು ಅಂತರಿಕವಾಗಿ ಮತ್ತು ಬಾಹ್ಯವಾಗಿ ನಿಮಗೆ ಕಂಡು ಬರುತ್ತದೆ.

ನಿಂಬೆಹಣ್ಣಿನ ಪಾನಕ

ನೀರಿನ ಜೊತೆಗೆ ಸಕ್ಕರೆ, ನಿಂಬೆಹಣ್ಣಿನ ರಸ ಮತ್ತು ಚಿಟಿಕೆ ಉಪ್ಪನ್ನು ಸೇರಿಸಿ ಮಾಡುವ ನಿಂಬೆಹಣ್ಣಿನ ಪಾನಕ ಅಥವಾ ಜ್ಯೂಸ್, ಬಾಯಾರಿದವರಿಗೆ ಅಮೃತದಂತೆ ಕಾಣುತ್ತದೆ. ಇದು ಕೇವಲ ನಿಮ್ಮ ದಾಹವನ್ನು ಮಾತ್ರ ತೀರಿಸುವುದಿಲ್ಲ. ಜೊತೆಗೆ ನಿಮ್ಮ ದೇಹವು ಬೆವರುವಿಕೆಯಿಂದಾಗಿ ಕಳೆದುಕೊಂಡ ಉಪ್ಪನ್ನು ಸಹ ಮರಳಿ ಪಡೆಯಲು ನೆರವಾಗುತ್ತದೆ. ನಿಂಬೆಹಣ್ಣಿನ ಪಾನಕದಂತೆಯೇ, ಕಿತ್ತಳೆ ರಸವು ಸಹ ನಿಮ್ಮ ದಾಹವನ್ನು ತಣಿಸುವ ಮತ್ತೊಂದು ಪಾನೀಯವಾಗಿದೆ.

ಐಸ್ ಟೀ

ತಣ್ಣಗೆ ಕೊರೆಯುವ ಐಸ್ ಟೀಯನ್ನು, ಐಸ್ ಕ್ಯೂಬ್‍ಗಳ ಮೇಲೆ ಸುರಿದು ನೀಡಿದರೆ ಆಹಾ! ಬಾಯಾರಿದ ಬಾಯಿಯು ಮತ್ತೊಂದು ಬೇಕು ಎಂದು ಕೇಳುತ್ತದೆ. ಇದಕ್ಕೆ ನಿಂಬೆ, ಪುದಿನಾದ ರುಚಿಗಳನ್ನು ಬೆರೆಸಿದರೆ ರುಚಿ ಮತ್ತಷ್ಟು ಇಮ್ಮಡಿಗೊಳ್ಳುತ್ತದೆ. ಬೇಸಿಗೆಯ ಧಗೆಯನ್ನು ತಣಿಸಲು ಇಂತಹ ತಣ್ಣಗಿನ ಪಾನೀಯಗಳನ್ನು ಸೇವಿಸುವುದು ಮುದ ನೀಡುತ್ತದೆ.

ಶುಂಠಿಯ ಪಾನೀಯ

ಶುಂಠಿಯ ಕಟುವಾದ ರುಚಿಯು ಬಹುತೇಕ ಜನರಿಗೆ ಹಿಡಿಸದೆ ಇರಬಹುದು. ಆದರೆ ಇದನ್ನು ಇಷ್ಟಪಡುವವರು ಮಾತ್ರ ಶುಂಠಿಯನ್ನು ತಮ್ಮ ದೈನಂದಿನ ಆಹಾರ ಪದಾರ್ಥಗಳಲ್ಲಿ ತಪ್ಪದೆ ಬಳಸುತ್ತಾರೆ. ಭಾರತೀಯರು, ಅರಬ್ಬರು ಮತ್ತು ಚೀನಿಯರು ಇದನ್ನು ತಮ್ಮ ಆಹಾರ ಪದಾರ್ಥಗಳಲ್ಲಿ ನಿಯಮಿತವಾಗಿ ಬಳಸುತ್ತಾರೆ. ಇದರ ವಿವಿಧ ಪ್ರಯೋಜನಗಳು ನಮ್ಮ ದೇಹವು ರೋಗರುಜಿನಗಳ ಮೇಲೆ ಹೋರಾಡಲು ಅಗತ್ಯವಾದ ಪೋಷಕಾಂಶಗಳನ್ನು ಹೊಂದಿದೆ. ಇನ್ನು ನಿಮಗೆ ಬಾಯಾರಿದಾಗ ಇದರಿಂದ ತಯಾರಿಸುವ ಪಾನೀಯವು ನಿಮ್ಮ ದಾಹವನ್ನು ತಣಿಸುತ್ತದೆ. ಈಗ ಇದು ಕ್ಯಾನ್‍ಗಳಲ್ಲೂ ಸಹ ಲಭ್ಯವಿದೆ.

ಎಳೆನೀರು

ಬಾಯಾರಿದಾಗ, ಸುಡುವ ಬಿಸಿಲು ಇದ್ದಾಗ ಯಾವ ಪಾನೀಯ ಕುಡಿಯುವುದು ಎಂಬ ಪ್ರಶ್ನೆ ಏಕೆ? ಹೋಗಿ ಒಂದು ಎಳೆ ನೀರನ್ನು ಕುಡಿಯಿರಿ. ಇದು ನಿಮ್ಮ ದಾಹವನ್ನು ಮಾತ್ರ ತಣಿಸುವುದಿಲ್ಲ, ಜೊತೆಗೆ ನಿಮ್ಮ ಜೀರ್ಣಾಂಗ ವ್ಯೂಹದ ಕಾರ್ಯ ವೈಖರಿಯನ್ನು ಸುಗಮಗೊಳಿಸುತ್ತದೆ ಮತ್ತು ತ್ವಚೆಗೆ ಕಾಂತಿಯನ್ನು ಸಹ ನೀಡುತ್ತದೆ.

ಕಬ್ಬಿನ ಹಾಲು

ತಂಪಾದ, ಶಕ್ತಿದಾಯಕವಾದ ಮತ್ತು ಚೇತೋಹಾರಿಯಾದ ಕಬ್ಬಿನ ಹಾಲು ದಾಹಕ್ಕೆ ಹೇಳಿ ಮಾಡಿಸಿದ ಪಾನೀಯ. ಇದಕ್ಕೆ ಸ್ವಲ್ಪ ಶುಂಠಿಯನ್ನು ಹಾಕಿ, ಇದರಿಂದ ಕಬ್ಬಿನ ಹಾಲಿನ ರುಚಿಗೆ ಸ್ವಲ್ಪ ಕಟುವಾದ ಸ್ವಾದ ಬರುತ್ತದೆ. ಈ ರಸದಲ್ಲಿರುವ ಸ್ವಾಭಾವಿಕ ಸಕ್ಕರೆಯು ಬೇಸಿಗೆಯ ದಿನಗಳಲ್ಲಿ ನಿಮಗೆ ಅಗತ್ಯವಾದ ಶಕ್ತಿಯನ್ನು ಒದಗಿಸುತ್ತದೆ.

ಸೌತೆಕಾಯಿ

ಇದು ಬೇಸಿಗೆಯ ಧಗೆಗೆ ರಾಮಬಾಣ. ನಿಮ್ಮ ದಾಹವನ್ನು ತೀರಿಸಲು ಸೌತೆಕಾಯಿಗಿಂತ ಒಳ್ಳೆಯ ಕಾಯಿ ಮತ್ತೊಂದಿಲ್ಲ. ಸಿಪ್ಪೆ ಮತ್ತು ಕಹಿಯನ್ನು ತೆಗೆದು ಕತ್ತರಿಸಿ, ಅದಕ್ಕೆ ಸ್ವಲ್ಪ ಉಪ್ಪು ಹಾಕಿ ತಿನ್ನಿ ಸಾಕು. ಎಂತಹ ಬಾಯಾರಿಕೆಯು ತಣ್ಣಗಾಗಿ ಬಿಡುತ್ತದೆ. ಕುತೂಹಲಕಾರಿ ವಿಚಾರವೆಂದರೆ ಇದು ತರಕಾರಿಯಲ್ಲ, ಹಣ್ಣು. ಇದರಲ್ಲಿ ನೀರಿನಂಶವಿರುವುದರಿಂದ ಪ್ರತಿ ಬಾರಿ ಇದನ್ನು ಕಚ್ಚಿದಾಗಲು, ನಿಮ್ಮ ಬಾಯಾರಿಕೆಯು ದೂರ ಸರಿಯುತ್ತದೆ.

ಕಲ್ಲಂಗಡಿ

ಇದು ಸಹ ಮತ್ತೊಂದು ಬೇಸಿಗೆ ಹಣ್ಣು. ಕೆಂಪಗೆ ಇರುವ ಈ ಹಣ್ಣಿನಲ್ಲಿ ಸಕ್ಕರೆ ಮತ್ತು ನೀರಿನ ಪ್ರಮಾಣವು ಅಧಿಕವಾಗಿರುತ್ತದೆ. ಪ್ರತಿ ಬಾರಿ ಸೇವಿಸುವಾಗ ಇದರಲ್ಲಿ ಸ್ವಾದ ಮತ್ತು ಶಕ್ತಿಯನ್ನು ನೀವು ಪಡೆಯಬಹುದು. ಇದನ್ನು ಹಾಗೆಯೇ ಸೇವಿಸಬಹುದು ಅಥವಾ ರಸವಾಗಿ ಸಹ ಸೇವಿಸಬಹುದು. ಆದರೆ ಹೇಗೆ ಸೇವಿಸಿದರು ಸ್ವಾದ ಮಾತ್ರ ಹಾಗೆಯೇ ಇರುತ್ತದೆ.

ಮಜ್ಜಿಗೆ

ಹುದುಗು ಬಂದ ಅಥವಾ ಹೆಪ್ಪುಗಟ್ಟಿದ ಹಾಲು ನಿಮ್ಮ ಜೀರ್ಣಕ್ರಿಯೆಗೆ ಒಳ್ಳೆಯದು ಎಂದು ಪರಿಗಣಿಸಲಾಗಿದೆ. ಇದರಲ್ಲಿರುವ ಪೋಷಕಾಂಶಗಳು ದೇಹಕ್ಕೆ ಉಪಯೋಗಕಾರಿಯಾದ ಬ್ಯಾಕ್ಟೀರಿಯಾಗಳನ್ನು ಉತ್ಪತ್ತಿ ಮಾಡುತ್ತದೆ. ಮಜ್ಜಿಗೆಯನ್ನು ನಿಮ್ಮ ಇಚ್ಛೆಗೆ ತಕ್ಕಂತೆ ಹಾಗೆಯೇ ಅಥವಾ ಉಪ್ಪು ಹಾಕಿಕೊಂಡು ಅಥವಾ ಸಿಹಿಯಾಗಿ ಮಾಡಿಕೊಂಡು ಸಹ ಸೇವಿಸಬಹುದು. ಇದರ ಮತ್ತೊಂದು ವಿಶೇಷವೆಂದರೆ ಇದನ್ನು ಊಟದ ಜೊತೆಗೆ ಸಹ ಬೆರೆಸಿಕೊಂಡು ತಿನ್ನಬಹುದು. ಇದರಿಂದ ಜೀರ್ಣ ಕ್ರಿಯೆ ಹೆಚ್ಚಾಗುತ್ತದೆ.

ಸಲಾಡ್‍ಗಳು

ತಿನ್ನಲು ರುಚಿ ರುಚಿಯಾದ, ತಾಜಾ ಸಲಾಡ್‍ಗಳು ಬಾಯಾರಿಕೆಯನ್ನು ಹೋಗಲಾಡಿಸುವಲ್ಲಿ ಮಹತ್ವದ ಪಾತ್ರವನ್ನು ನಿರ್ವಹಿಸುತ್ತವೆ. ಅದು ಲೆಟ್ಯೂಸ್, ಸೌತೆಕಾಯಿ, ಜುಚ್ಚಿನಿ, ದಪ್ಪ ಮೆಣಸಿನ ಕಾಯಿ, ಕ್ಯಾರಟ್, ಬೀಟ್‍ರೂಟ್, ಬ್ರೊಕೊಲಿ ಅಥವಾ ಇನ್ನಿತರ ಯಾವುದೇ ಹಣ್ಣು-ತರಕಾರಿಯ ಸಮ್ಮಿಶ್ರಣವಾದರು ಸರಿ, ಅದರ ಮೇಲೆ ಒಣ ಹಣ್ಣು ಮತ್ತು ವಿನಿಗರ ಬೆರೆಸಿ ತಿಂದರೆ ಬಾಯಾರಿಕೆಯು ತಣಿಯುತ್ತದೆ. ಆರೋಗ್ಯವು ವೃದ್ಧಿಯಾಗುತ್ತದೆ. ಈ ಸಲಾಡ್‍ಗಳ ಒಂದು ಚಮಚವು ನಿಮ್ಮ ಬಾಯಿಯಲ್ಲಿ ನೀರೂರಿಸುವುದರ ಜೊತೆಗೆ ಹೊಟ್ಟೆಯಲ್ಲೂ ಸಹ ನೀರನ್ನು ಬಿಡುಗಡೆ ಮಾಡುತ್ತವೆ. ಇನ್ನು ಇದರ ರುಚಿಯು ನಿಮ್ಮ ರುಚಿಗ್ರಂಥಿಗಳಿಗೆ ಹಬ್ಬವನ್ನುಂಟು ಮಾಡುತ್ತವೆ.