ತೂಕ ಹೆಚ್ಚಿಸಿಕೊಳ್ಳುವ ಇರಾದೆಯೇ? ಇಲ್ಲಿದೆ ಸರಳ ಟಿಪ್ಸ್

ವ್ಯಾಯಾಮದ ಬಳಿಕವೇ ಊಟ ಮಾಡಿರಿ

ಉತ್ತಮ ದೇಹ ಹೊಂದಲು ದಿನದಲ್ಲಿ ಕನಿಷ್ಠ ಒಂದು ಗಂಟೆ ಕಾಲ ವ್ಯಾಯಾಮ ಅಗತ್ಯ. ಯಾವುದೇ ವ್ಯಾಯಾಮದ ನಿಯಮದಂತೆ ವ್ಯಾಯಾಮಕ್ಕೂ ಮೊದಲು ಊಟ ಮಾಡುವುದು ತರವಲ್ಲ. ವ್ಯಾಯಾಮದ ಬಳಿಕ ದೇಹದ ಎಲ್ಲಾ ಭಾಗಗಳಲ್ಲಿ ರಕ್ತಸಂಚಾರ ಹೆಚ್ಚಿ ದೇಹದ ಚಟುವಟಿಕೆಗಳು ಹೆಚ್ಚು ಕ್ರಿಯಾಶೀಲವಾಗಿರುತ್ತವೆ. ವ್ಯಾಯಾಮದ ಬಳಿಕ ಅಲ್ಪ ವಿಶ್ರಾಂತಿ ಪಡೆದು ಊಟ ಮಾಡುವ ಮೂಲಕ ದೇಹದ ಎಲ್ಲಾ ಚಟುವಟಿಕೆಗಳಿಗೆ ಹೆಚ್ಚಿನ ಪೋಷಕಾಂಶಗಳನ್ನು ದೊರಕಿಸಿಕೊಟ್ಟಂತಾಗುತ್ತದೆ. ಕ್ರಮೇಣ ದೇಹದಲ್ಲಿ ಗಮನಾರ್ಹ ಬದಲಾವಣೆ ಕಂಡುಬರುತ್ತದೆ.

ಸಾಮಾನ್ಯಕ್ಕಿಂತಲೂ ಹೆಚ್ಚು ಊಟ ಮಾಡಿರಿ

ಸಾಧಾರಣವಾಗಿ ಕೃಶಶರೀರಿಗಳ ಊಟ ಒಂದು ಪ್ರಮಾಣಕ್ಕೆ ನಿಗದಿಯಾಗಿರುತ್ತದೆ. ತನ್ನಿಂದ ಇಷ್ಟೇ ಅರಗಿಸಿಕೊಳ್ಳಲು ಸಾಧ್ಯ ಎಂಬ ನಂಬಿಕೆ ಅವರಲ್ಲಿ ಬೇರುಬಿಟ್ಟಿರುತ್ತದೆ. ಆದರೆ ನಿಯಮಿತವಾಗಿ ವ್ಯಾಯಾಮ ಮಾಡುವ ಕಾರಣ ದೇಹಕ್ಕೆ ಹೆಚ್ಚಿನ ಆಹಾರ ಅಗತ್ಯ ಎಂಬ ವಿಚಾರವನ್ನು ಮನದಟ್ಟು ಮಾಡಿಕೊಂಡು ನಿಗದಿತ ಪ್ರಮಾಣಕ್ಕೂ ಸ್ವಲ್ಪ ಹೆಚ್ಚು ಊಟ ಮಾಡುವುದರಿಂದ ಶೀಘ್ರವೇ ದೇಹದಲ್ಲಿ ಬದಲಾವಣೆ ಕಂಡುಬರುತ್ತದೆ.ಒಂದು ದಿನಕ್ಕೆ ಮೂರು ಹೊತ್ತು ಭರ್ಜರಿ ಊಟ ಹಾಗೂ ನಡುವೆ ಎರಡು ಬಾರಿ ಅಲ್ಪ ಆಹಾರವನ್ನು ಸೇವಿಸಿದವರಲ್ಲಿ ಅತ್ಯುತ್ತಮವಾದ ಪರಿಣಾಮ ಕಂಡುಬಂದಿದೆ.

ಸರಿಯಾಗಿ ಆಹಾರ ಸೇವಿಸಿರಿ

ದಿನದ ಮೂರು ಊಟದ ಸಹಿತ ನಡುನಡುವೆ ಚಿಕ್ಕಪ್ರಮಾಣದಲ್ಲಿ ಆರೋಗ್ಯಕರ ಆಹಾರಗಳನ್ನು ಸೇವಿಸುತ್ತಾ ಇರಿ. ಈ ಆಹಾರದಲ್ಲೂ ವೈವಿಧ್ಯತೆ ಇರಲಿ. ಹಣ್ಣಿನ ರಸ, ಹಾಲಿನಿಂದ ತಯಾರಿಸಿದ ವ್ಯಂಜನಗಳು, ಮಾಂಸಾಹಾರಿ ಪದಾರ್ಥಗಳು ಮೊದಲಾದವನ್ನು ಚಿಕ್ಕ ಪ್ರಮಾಣದಲ್ಲಿ ನಡುನಡುವೆ ಸೇವಿಸುತ್ತಿರುವುದರಿಂದ ಉತ್ತಮ ಪರಿಣಾಮ ಕಂಡುಬರುತ್ತದೆ.

ಊಟದಲ್ಲಿ ಮೊಸರು ಧಾರಾಳವಾಗಿರಲಿ

ದೇಹದಲ್ಲಿರುವ ಸ್ನಾಯುಗಳು ಕೊಬ್ಬಿಗಿಂತ ಹೆಚ್ಚು ಭಾರವಾಗಿರುತ್ತವೆ. ಆದುದರಿಂದ ಧೃಢವಾದ ಶರೀರಕ್ಕಾಗಿ ಮೊದಲು ಕೊಬ್ಬನ್ನು ಕಳೆದುಕೊಂಡು ಸ್ನಾಯುಗಳನ್ನು ಹೆಚ್ಚಿಸುವುದು ಅಗತ್ಯ. ಆದರೆ ಸ್ನಾಯುಗಳನ್ನು ಹೆಚ್ಚಿಸಲು ಕೊಬ್ಬು ಸಹಾ ಅಗತ್ಯ. ಆಹಾರದಲ್ಲಿ ಮೊಸರನ್ನು ಹೆಚ್ಚು ಸೇವಿಸುವುದರಿಂದ ದೇಹಕ್ಕೆ ಸುಲಭವಾಗಿ ಜೀರ್ಣವಾಗುವ ಆಹಾರ ಲಭಿಸಿ ಸ್ನಾಯುಗಳ ಬೆಳವಣಿಗೆಗೆ ಸಹಕಾರಿಯಾಗಿದೆ. ಜೊತೆಗೆ ಭಾರ ಎತ್ತುವಂತಹ ಕೆಲವು ಶ್ರಮಬೇಡುವ ವ್ಯಾಯಾಮಗಳಿಂದ ಹೆಚ್ಚಿನ ಕೊಬ್ಬನ್ನು ಕರಗಿಸಿ ಧೃಢಶರೀರ ಹೊಂದಲು ಸಾಧ್ಯವಾಗುತ್ತದೆ.

ಸಿದ್ಧ ಆಹಾರಗಳನ್ನು (Junk Food) ತ್ಯಜಿಸಿ

ಇಂದು ಒಂದು ಫೋನ್ ಮಾಡಿದರೆ ಮನೆಬಾಗಿಲಿಗೇ ಹಲವು ಸಿದ್ಧ ಆಹಾರಗಳು ಬಂದು ತಲುಪುತ್ತವೆ. ಆದರೆ ಈ ಆಹಾರಗಳನ್ನು ಹೆಚ್ಚು ಹೊತ್ತು ತಾಜಾತನದಲ್ಲಿರಿಸಲು ಕೆಲವು ಸಂರಕ್ಷಕ (preservative) ಗಳನ್ನು ಸೇರಿಸಬೇಕಾಗಿ ಬರುವುದರಿಂದ ಇವು ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತವೆ. ಇವುಗಳಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಉಪ್ಪು, ಕೆಟ್ಟ ಕೊಲೆಸ್ಟ್ರಾಲ್, ಹಾಗೂ ಕೊಬ್ಬು ಇರುತ್ತದೆ. ಈ ಆಹಾರ ಸೇವನೆಯಿಂದ ಅಷ್ಟೊಂದು ಕಷ್ಟಪಟ್ಟು ಕರಗಿಸಿದ್ದ ಕೊಬ್ಬು ಕ್ಷಣಮಾತ್ರದಲ್ಲಿ ಮತ್ತೆ ಪ್ರತ್ಯಕ್ಷವಾಗುತ್ತವೆ. ಇದರಿಂದ ದೇಹದ ಹೊಟ್ಟೆಯ ಭಾಗ ಬೆಳೆಯುತ್ತದೆಯೇ ವಿನಃ ದೇಹಕ್ಕೆ ಅಗತ್ಯವಾದ ಸ್ನಾಯುಗಳು ಬೆಳೆಯಲಾರವು.

ಬಾದಾಮಿ ಹಾಗೂ ಒಣಫಲಗಳನ್ನು ತಿನ್ನಿರಿ

ಬಾದಾಮಿ, ಶೇಂಗಾಬೀಜ, ಪಿಸ್ತಾ, ವಾಲ್ನಟ್ ಮೊದಲಾದವುಗಳಲ್ಲಿ ಸ್ನಾಯುಗಳ ಬೆಳವಣಿಗೆಗೆ ಅಗತ್ಯವಾದ ಪೋಷಕಾಂಶಗಳು ಹಾಗೂ ನಾರು ಹೇರಳವಾಗಿವೆ. ಇದರಿಂದ ಜೀರ್ಣಕ್ರಿಯೆ ಉತ್ತಮಗೊಂಡು ದೇಹದ ತೂಕ ಹೆಚ್ಚುತ್ತದೆ.