ಮಧುಮೇಹಿಗಳು ಸೇವಿಸಬಹುದಾದ 7 ಸಿಹಿ ಹಣ್ಣುಗಳು

ಸೇಬು

ಮಧ್ಯಮ ಗಾತ್ರದ ಸೇಬು ಮಧುಮೇಹಿಗಳಿಗೆ ತುಂಬಾ ಒಳ್ಳೆಯದು. ಯಾಕೆಂದರೆ ಇದರಲ್ಲಿ ಕಡಿಮೆ ಕ್ಯಾಲರಿ, ಜಿಐ ಇದೆ ಮತ್ತು ನಾರಿನಾಂಶ ಅಧಿಕವಾಗಿದೆ. ಕೆಂಪು ಸೇಬಿಗಿಂತ ಹಸಿರು ಸೇಬು ಮಧುಮೇಹಿಗಳಿಗೆ ಒಳ್ಳೆಯದು.

ಕಿತ್ತಳೆ ಹಣ್ಣು

ಕಿತ್ತಳೆಯಲ್ಲಿ ವಿಟಮಿನ್ ಸಿ ಮತ್ತು ನಾರಿನಾಂಶವು ಹೇರಳವಾಗಿದೆ. ಇದು ರಕ್ತದ ಗ್ಲೂಕೋಸ್ ಮಟ್ಟವನ್ನು ಕಡಿಮೆ ಮಾಡಿ ಇನ್ಸುಲಿನ್ ಕ್ರಿಯೆಯನ್ನು ಸುಧಾರಿಸುತ್ತದೆ. ಇದರಲ್ಲಿ ಹೆಸ್ಪೆರೆಟಿನ್ ಎನ್ನುವ ಅಂಶವಿದೆ. ಇದು ಬೊಜ್ಜನ್ನು ಕಡಿಮೆ ಮಾಡಿ ತೂಕ ಕಳೆದುಕೊಳ್ಳಲು ನೆರವಾಗುತ್ತದೆ. ಒಂದು ಸಣ್ಣ ಗಾತ್ರದ ಕಿತ್ತಳೆ ಅಥವಾ ಕಿತ್ತಳೆಯ 5-6 ಭಾಗಗಳನ್ನು ತಿನ್ನಬಹುದು.

ಜಾಮೂನು

ರಕ್ತದ ಸಕ್ಕರೆ ಪ್ರಮಾಣವನ್ನು ನಿಯಂತ್ರಣದಲ್ಲಿ ಇಡಲು ದಿನದಲ್ಲಿ 5-6 ಜಾಮೂನುಗಳನ್ನು ತಿನ್ನಿ. ಜಾಮೂನಿನಲ್ಲಿ ಜಿಐ ಕಡಿಮೆ ಇರುವುದು ಮಾತ್ರವಲ್ಲದೆ ಗ್ಲುಕೋಸೈಡ್ ಕೂಡ ಒಳಗೊಂಡಿದೆ. ಇದು ರಕ್ತದಲ್ಲಿ ಗ್ಲೂಕೋಸ್ ಅನ್ನು ನಿಯಂತ್ರಣದಲ್ಲಿಡುತ್ತದೆ.

ಪಪ್ಪಾಯಿ

ಪಪ್ಪಾಯಿ ಸಿಹಿ ಮತ್ತು ರಕ್ತದಲ್ಲಿನ ಗ್ಲೂಕೋಸ್ ಮಟ್ಟವನ್ನು ಹೆಚ್ಚಿಸುವ ಕಾರಣದಿಂದ ಹೆಚ್ಚಿನ ಮಧುಮೇಹಿಗಳು ಇದನ್ನು ಕಡೆಗಣಿಸುತ್ತಾರೆ. ಆದರೆ ಒಂದು ತುಂಡು ಪಪ್ಪಾಯಿ ಅಥವಾ ಸಣ್ಣ ಪಿಂಗಾಣಿಯಲ್ಲಿ ಪಪ್ಪಾಯಿ ತುಂಡುಗಳನ್ನು ತಿಂದರೆ ಪೋಷಕಾಂಶಗಳು ಸಿಗುವುದು.

ಸೀಬೆಹಣ್ಣು

ವಿಟಮಿನ್ ಸಿ ಯಿಂದ ಸಮೃದ್ಧವಾಗಿರುವ ಸೀಬೆಹಣ್ಣಿನಲ್ಲಿ ಆ್ಯಂಟಿಆಕ್ಸಿಡೆಂಟ್ ಗಳು ತುಂಬಿ ಹೋಗಿವೆ. ಇದು ರಕ್ತದಲ್ಲಿ ಗ್ಲೂಕೋಸ್ ಮಟ್ಟವನ್ನು ನಿಯಂತ್ರಣದಲ್ಲಿ ಇಡುತ್ತದೆ. ನಾರಿನಾಂಶ ಅಧಿಕವಾಗಿರುವ ಮತ್ತು ಗ್ಲೈಸೆಮಿಕ್ ಕಡಿಮೆ ಇರುವ ಹಣ್ಣಾಗಿರುವ ಇದು ಮಧುಮೇಹಿಗಳಿಗೆ ತುಂಬಾ ಒಳ್ಳೆಯದು.

ಬಾಳೆಹಣ್ಣು

ಮಧ್ಯಮ ಗಾತ್ರದ ಬಾಳೆಹಣ್ಣು ಇದ್ದರೆ ಕೇವಲ ಅರ್ಧ ಮಾತ್ರ ತಿಂದರೆ ರಕ್ತದಲ್ಲಿನ ಗ್ಲೂಕೋಸ್ ಮಟ್ಟವು ನಿಯಂತ್ರಣದಲ್ಲಿರುತ್ತದೆ. ಮಧುಮೇಹವು ನಿಯಂತ್ರಣದಲ್ಲಿ ಇರದಿದ್ದರೆ ಮತ್ತು ಕಳೆದ ಮೂರು ತಿಂಗಳಿಂದ ರಕ್ತದಲ್ಲಿನ ಸಕ್ಕರೆ ಅಂಶವು ಸ್ಥಿರವಾಗಿಲ್ಲವೆಂದಾದರೆ ಬಾಳೆಹಣ್ಣು ತಿನ್ನುವುದನ್ನು ಬಿಡಿ.

ಸ್ಟ್ರಾಬೆರಿ

ಒಂದು ಕಪ್ ಅಥವಾ ಒಂದು ಪಿಂಗಾಣಿ(180 ಗ್ರಾಂ) ಸ್ಟ್ರಾಬೆರಿ ಸೇವಿಸಬಹುದು. ಸ್ಟ್ರಾಬೆರಿಯಲ್ಲಿ ವಿಟಮಿನ್ ಸಿ, ನಾರಿನಾಂಶ ಮತ್ತು ಆ್ಯಂಟಿಆಕ್ಸಿಡೆಂಟ್ ಇದೆ. ಇದು ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಸುಧಾರಿಸುತ್ತದೆ.