ಡೆಂಗ್ಯೂ ಆತಂಕ: ಮಧುಮೇಹಿಗಳು ಆರೋಗ್ಯ ಕಾಪಾಡಿಕೊಳ್ಳಲು ಇಲ್ಲಿದೆ ವಿಶೇಷ ಆಹಾರ ಪ್ಲಾನ್

ದೆಹಲಿ ಮತ್ತು ಪಶ್ಚಿಮ ಬಂಗಾಳದಲ್ಲಿ ಡೆಂಗ್ಯೂ ಪ್ರಕರಣಗಳು ಹೆಚ್ಚಾದ ಬೆನ್ನಲ್ಲೇ, ಇಂದು (ಸೆಪ್ಟೆಂಬರ್ 16) ದೇಶಾದ್ಯಂತ ಡೆಂಗ್ಯೂ ಆತಂಕ ಮತ್ತೆ ಮುನ್ನೆಲೆಗೆ ಬಂದಿದೆ. ಅದರಲ್ಲೂ ಮಧುಮೇಹ (ಡಯಾಬಿಟೀಸ್) ಇರುವವರು ಡೆಂಗ್ಯೂ ಪೀಡಿತರಾದಾಗ ರಕ್ತದಲ್ಲಿ ಸಕ್ಕರೆ ಪ್ರಮಾಣ ಹೆಚ್ಚಾಗದಂತೆ ದೇಹವನ್ನು ಹೈಡ್ರೇಟ್ ಆಗಿಟ್ಟುಕೊಳ್ಳುವುದು ಬಹುದೊಡ್ಡ ಸವಾಲು. ವೈದ್ಯಕೀಯ ಮಾರ್ಗದರ್ಶನ ಹಾಗೂ ನಮ್ಮ ಭಾರತೀಯ ಅಡುಗೆಮನೆಗೆ ಹೊಂದುವಂತಹ ಅತ್ಯುತ್ತಮ ಆಹಾರದ ಪ್ಲಾನ್ ಇಲ್ಲಿದೆ.

ದೆಹಲಿ ಪಾಲಿಕೆ ವ್ಯಾಪ್ತಿಯಲ್ಲಿ ಸೆಪ್ಟೆಂಬರ್ 12ರ ವೇಳೆಗೆ ಬರೋಬ್ಬರಿ 121 ಡೆಂಗ್ಯೂ ಪ್ರಕರಣಗಳು ದಾಖಲಾಗಿದ್ದು, ಇದು ಈ ತಿಂಗಳಲ್ಲೇ ಗರಿಷ್ಠ ಮಟ್ಟದ್ದಾಗಿದೆ. ಇತ್ತ ಪಶ್ಚಿಮ ಬಂಗಾಳದಲ್ಲಿ ಸೆಪ್ಟೆಂಬರ್ 11ರ ವೇಳೆಗೆ ಪ್ರಕರಣಗಳ ಸಂಖ್ಯೆ 5,002 ದಾಟಿದ್ದು, ಕೋಲ್ಕತ್ತಾ ಮತ್ತು ಮುರ್ಷಿದಾಬಾದ್‌ಗಳಲ್ಲೇ ಅತಿ ಹೆಚ್ಚು ಕೇಸ್‌ಗಳು ಕಂಡುಬಂದಿವೆ. ಮಳೆ ಮುಂದುವರಿಯುತ್ತಿರುವುದರಿಂದ ಈ ವಾರ ಕೇಸ್‌ಗಳು ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ. ಹಾಗಾಗಿ ಶುದ್ಧ ಕುಡಿಯುವ ನೀರು ಮತ್ತು ಅಡುಗೆಮನೆಯ ನೈರ್ಮಲ್ಯಕ್ಕೆ ಹೆಚ್ಚಿನ ಆದ್ಯತೆ ನೀಡಿ.

ಡೆಂಗ್ಯೂ ಆತಂಕ: ಚೇತರಿಕೆಗೆ ಸೂಕ್ತ ಆಹಾರ ಮತ್ತು ಹೈಡ್ರೇಷನ್ ಸಲಹೆಗಳು

ಜ್ವರ ಇರುವಾಗ ಮತ್ತು ಗುಣಮುಖರಾಗುವ ಆರಂಭಿಕ ದಿನಗಳಲ್ಲಿ ಕುಡಿಯಲು ಶುದ್ಧ ನೀರನ್ನೇ ಬಳಸಿ, ಆಗಾಗ ಸ್ವಲ್ಪ ಸ್ವಲ್ಪವೇ ದ್ರವಾಹಾರ ಸೇವಿಸಿ. ಊಟ ಮಾಡಲು ಮನಸ್ಸಿಲ್ಲದಿದ್ದರೆ ಸಾಧಾರಣ ನೀರು ಮತ್ತು ORS ದ್ರಾವಣವನ್ನು ಆಲ್ಟರ್ನೇಟ್ ಆಗಿ ಕುಡಿಯಿರಿ. ದಿನಕ್ಕೆ ಎಷ್ಟು ನೀರು ಅಥವಾ ದ್ರವಾಹಾರ ಸೇವಿಸುತ್ತಿದ್ದೀರಾ ಮತ್ತು ಎಷ್ಟು ಬಾರಿ ಮೂತ್ರ ವಿಸರ್ಜನೆಯಾಗುತ್ತಿದೆ ಎಂಬುದನ್ನು ಗಮನಿಸಿ. ನೀರು ಕುಡಿಯಲು ಕಷ್ಟವಾದರೆ ಅಥವಾ ನಿರ್ಜಲೀಕರಣದ ಲಕ್ಷಣಗಳು ಕಂಡುಬಂದರೆ ತಕ್ಷಣ ವೈದ್ಯರನ್ನು ಸಂಪರ್ಕಿಸಿ. ಯಾವುದೇ ಕಾರಣಕ್ಕೂ ಸಕ್ಕರೆ ಪ್ರಮಾಣ ಹೆಚ್ಚಿರುವ ಕಾರ್ಬೊನೇಟೆಡ್ ಕೂಲ್ ಡ್ರಿಂಕ್ಸ್ ಕುಡಿಯಬೇಡಿ, ಇದು ಮಧುಮೇಹಿಗಳಲ್ಲಿ ಶುಗರ್ ಲೆವೆಲ್ ಅನ್ನು ತೀವ್ರವಾಗಿ ಹೆಚ್ಚಿಸಬಹುದು.

ಪ್ರತಿ ಬಾರಿ ಲಘು ಆಹಾರ ಸೇವಿಸುವಾಗಲೂ ಸುಲಭವಾಗಿ ಜೀರ್ಣವಾಗುವ ಪ್ರೋಟೀನ್ ಇರುವಂತೆ ನೋಡಿಕೊಳ್ಳಿ. ತೆಳುವಾದ ಹೆಸರುಬೇಳೆ ಸೂಪ್, ಚಿಕನ್ ಬ್ರಾಥ್ ಅಥವಾ ಮೆತ್ತಗಿನ ಕಿಚಡಿ ಸೇವಿಸುವುದು ಒಳಿತು. ಇದರ ಜೊತೆಗೆ ಬೇಯಿಸಿದ ಪಾಲಕ್ ಅಥವಾ ದಂಟಿನ ಸೊಪ್ಪು, ಮೊಸಂಬಿಯಂತಹ ಸಿಟ್ರಸ್ ಹಣ್ಣುಗಳು ಹಾಗೂ ಮ್ಯಾಶ್ ಮಾಡಿದ ಬೇಳೆಕಾಳುಗಳನ್ನು ಸೇವಿಸಿದರೆ ದೇಹಕ್ಕೆ ಫೋಲೇಟ್ ಮತ್ತು ಐರನ್ ಸಿಗುತ್ತದೆ. ಎಣ್ಣೆ ಮತ್ತು ಖಾರವನ್ನು ಆದಷ್ಟು ಕಡಿಮೆ ಮಾಡಿ. ವಾಕರಿಕೆ ಅಥವಾ ವಾಂತಿ ಬಂದಂತಾಗುವುದನ್ನು ತಡೆಯಲು ಪ್ರತಿ ಮೂರು ಗಂಟೆಗೊಮ್ಮೆ ಸಣ್ಣ ಪ್ರಮಾಣದಲ್ಲಿ ಆಹಾರ ಸೇವಿಸಿ.

ಡೆಂಗ್ಯೂ ಬಂದಾಗ ಮಧುಮೇಹಿಗಳ ಆಹಾರ ಹೀಗಿರಲಿ!

ಮಧುಮೇಹಿಗಳು 'ಡಯಾಬಿಟೀಸ್ ಪ್ಲೇಟ್' ಮಾದರಿಯನ್ನು ಅನುಸರಿಸಿ: ತಟ್ಟೆಯ ಅರ್ಧಭಾಗದಷ್ಟು ಪಿಷ್ಟವಿಲ್ಲದ ತರಕಾರಿಗಳು, ಕಾಲು ಭಾಗ ಪ್ರೋಟೀನ್ ಮತ್ತು ಉಳಿದ ಕಾಲು ಭಾಗ ಕಡಿಮೆ ಜಿಐ (low-GI) ಇರುವ ಧಾನ್ಯಗಳಿರಲಿ. ಕಾರ್ಬೋಹೈಡ್ರೇಟ್ ಸೇವನೆಯನ್ನು ಇಡೀ ದಿನಕ್ಕೆ ಭಾಗ ಮಾಡಿಕೊಳ್ಳಿ. ಸಿಜಿಎಂ (CGM) ಬಳಸುತ್ತಿದ್ದರೆ ಗ್ಲೂಕೋಸ್ ಮಟ್ಟವನ್ನು ಆಗಾಗ ಪರಿಶೀಲಿಸಿ. ಶುಗರ್ ಲೆವೆಲ್ ಹೆಚ್ಚಿದ್ದಾಗ ನೀರು, ಉಪ್ಪು ಹಾಕಿದ ಮಜ್ಜಿಗೆ ಮತ್ತು ವೆಜಿಟೇಬಲ್ ಸೂಪ್‌ಗೆ ಆದ್ಯತೆ ನೀಡಿ ಹಾಗೂ ORS ಅನ್ನು ಮಧ್ಯಂತರದಲ್ಲಿ ಕುಡಿಯಿರಿ. ಅನಾರೋಗ್ಯವಿದ್ದಾಗ ಕನಿಷ್ಠ ಪ್ರತಿ ನಾಲ್ಕು ಗಂಟೆಗೊಮ್ಮೆ ಶುಗರ್ ಚೆಕ್ ಮಾಡಿ, ವೈದ್ಯರು ನೀಡಿದ ಇನ್ಸುಲಿನ್ ಪಡೆಯುವುದನ್ನು ಯಾವುದೇ ಕಾರಣಕ್ಕೂ ನಿಲ್ಲಿಸಬೇಡಿ.

ಒಂದು ದಿನದ ಆಹಾರ ಪಥ್ಯ ಮತ್ತು ನೈರ್ಮಲ್ಯದ ಚೆಕ್‌ಲಿಸ್ಟ್

ತಿಂಡಿಗೆ ರಾಗಿ ಗಂಜಿಯೊಂದಿಗೆ ಮೊಳಕೆ ಹೆಸರುಕಾಳು ಅಥವಾ ಮೊಟ್ಟೆಯ ಬಿಳಿಭಾಗದ ಓಮ್ಲೆಟ್ ಸೇವಿಸಿ; ಬೆಳಗ್ಗಿನ ಸ್ನ್ಯಾಕ್ಸ್ ವೇಳೆಗೆ ನಿಂಬೆ-ಪುದೀನಾ ನೀರು ಕುಡಿಯಿರಿ. ಮಧ್ಯಾಹ್ನದ ಊಟಕ್ಕೆ ಮೆತ್ತಗಿನ ಹೆಸರುಬೇಳೆ-ಅನ್ನದ ಕಿಚಡಿ ಅಥವಾ ಬೇಯಿಸಿದ ಅನ್ನದೊಂದಿಗೆ ಕೋಳಿ ತಿಳಿಸಾರು ಉತ್ತಮ. ಸಂಜೆ ಉಪ್ಪು ಹಾಕಿದ ನಿಂಬೆ ಹಣ್ಣಿನ ನೀರು ಹಾಗೂ ರಾತ್ರಿ ಊಟಕ್ಕೆ ಟೊಮೆಟೊ-ಪಾಲಕ್ ಬೇಳೆ ಸೂಪ್ ಜೊತೆ ಸಿರಿಧಾನ್ಯದ ರೊಟ್ಟಿ ಸೇವಿಸಿ. ಇದರೊಂದಿಗೆ ಕೈ ತೊಳೆಯುವುದು, ಕುದಿಸಿ ಆರಿಸಿದ ನೀರು ಕುಡಿಯುವುದು ಮತ್ತು ಹಳೆಯ ಅಡುಗೆಯನ್ನು ಚೆನ್ನಾಗಿ ಬಿಸಿ ಮಾಡಿ ಸೇವಿಸುವುದನ್ನು ಮರೆಯದಿರಿ. ನಿರಂತರ ವಾಂತಿ, ತೀವ್ರ ಹೊಟ್ಟೆ ನೋವು, ರಕ್ತಸ್ರಾವ ಅಥವಾ ಮೂತ್ರದ ಪ್ರಮಾಣ ಕಡಿಮೆಯಾಗುವುದು ಕಂಡುಬಂದರೆ ತಕ್ಷಣವೇ ತುರ್ತು ವೈದ್ಯಕೀಯ ನೆರವು ಪಡೆಯಿರಿ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.