ಎವರೆಸ್ಟ್ ಜೀರಿಗೆ ಪುಡಿ ಬಳಸುತ್ತಿದ್ದೀರಾ? ತಕ್ಷಣ ಈ ಬ್ಯಾಚ್ ನಂಬರ್ ಚೆಕ್ ಮಾಡಿ, ಇಲ್ಲದಿದ್ದರೆ ಅಪಾಯ!

ನಿಮ್ಮ ಮನೆಯಲ್ಲೂ 'ಎವರೆಸ್ಟ್' ಕಂಪನಿಯ ಜೀರಿಗೆ ಪೌಡರ್ ಇದೆಯಾ? ಹಾಗಿದ್ದರೆ ತಕ್ಷಣವೇ ಪ್ಯಾಕೆಟ್ ಚೆಕ್ ಮಾಡಿ! ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಎವರೆಸ್ಟ್ ಜೀರಿಗೆ ಪುಡಿಯ ನಿರ್ದಿಷ್ಟ ಬ್ಯಾಚ್ ಒಂದನ್ನು ಬಳಸಲು ಸುರಕ್ಷಿತವಲ್ಲ ಎಂದು ಘೋಷಿಸಿದ್ದು, ಮಾರುಕಟ್ಟೆಯಿಂದ ಹಿಂಪಡೆಯಲು ಆದೇಶಿಸಿದೆ. 2026 ರ ಅಕ್ಟೋಬರ್ 4 ರಂದು ಈ ಜಾಗೃತಿ ಆದೇಶ ಹೊರಬಿದ್ದಿದ್ದು, 'E080668761' ಬ್ಯಾಚ್ ಸಂಖ್ಯೆಯ ಜೀರಿಗೆ ಪುಡಿಯಲ್ಲಿ ಅಜೋಕ್ಸಿಸ್ಟ್ರೋಬಿನ್ ಮತ್ತು ಥಯಾಮೆಥೋಕ್ಸಮ್ ಎಂಬ ಕೀಟನಾಶಕಗಳ ಪ್ರಮಾಣ ಮಿತಿಮೀರಿರುವುದು ಪರೀಕ್ಷೆಯಲ್ಲಿ ತಿಳಿದುಬಂದಿದೆ. ನಿಮ್ಮ ಬಳಿ ಇರುವ ಪ್ಯಾಕೆಟ್‌ನ ಬ್ಯಾಚ್ ಕೋಡ್ ಇದೇ ಆಗಿದ್ದರೆ, ತಕ್ಷಣವೇ ಅದನ್ನು ಬಳಸುವುದನ್ನು ನಿಲ್ಲಿಸಿ. ಈ ಆದೇಶ ದೇಶಾದ್ಯಂತ ಜಾರಿಯಲ್ಲಿದೆ.

ಗೋವಾದ ರೆಸಾರ್ಟ್ ಒಂದರ ಅಡುಗೆಮನೆಯಿಂದ FSSAI ಅಧಿಕಾರಿಗಳು ಸಂಗ್ರಹಿಸಿದ್ದ ಜೀರಿಗೆ ಪುಡಿಯ ಸ್ಯಾಂಪಲ್ ಫುಡ್ ಅನಾಲಿಷ್ಟ್ ಹಾಗೂ ರೆಫರಲ್ ಲ್ಯಾಬ್ ನಡೆಸಿದ ಪರೀಕ್ಷೆಯಲ್ಲಿ ವಿಫಲವಾಗಿದೆ. "ಪರೀಕ್ಷೆಯಲ್ಲಿ ಈ ಮಾದರಿಯು 'ಅಸುರಕ್ಷಿತ' ಎಂದು ತಿಳಿದುಬಂದ ತಕ್ಷಣವೇ, ಮೆಸರ್ಸ್ ಎವರೆಸ್ಟ್ ಫುಡ್ ಪ್ರಾಡಕ್ಟ್ಸ್ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಗೆ ತನ್ನ 'ಪ್ರಿ-ಪ್ಯಾಕ್ಡ್ ಜೀರಿಗೆ ಪುಡಿ'ಯನ್ನು ಮಾರುಕಟ್ಟೆಯಿಂದ ತಕ್ಷಣವೇ ಹಿಂಪಡೆಯಲು ಸೂಚಿಸಲಾಗಿದೆ" ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಈ ಹಿಂಪಡೆಯುವಿಕೆ ಆದೇಶವು ಕಂಪನಿಯ ಇಡೀ ಬ್ರ್ಯಾಂಡ್‌ಗೆ ಅನ್ವಯಿಸುವುದಿಲ್ಲ, ಬದಲಿಗೆ ನಿರ್ದಿಷ್ಟ ಒಂದು ಬ್ಯಾಚ್‌ಗೆ ಮಾತ್ರ ಅನ್ವಯಿಸುತ್ತದೆ.

Everest Cumin Recall: ನಿಮ್ಮ ಪ್ಯಾಕೆಟ್ ಸುರಕ್ಷಿತವೇ? ಬ್ಯಾಚ್ ನಂಬರ್ ಚೆಕ್ ಮಾಡುವುದು ಹೇಗೆ?

ಪ್ಯಾಕೆಟ್‌ನ ಹಿಂಭಾಗದಲ್ಲಿರುವ ಎಂಆರ್‌ಪಿ (MRP) ಮತ್ತು ತಯಾರಿಕಾ ದಿನಾಂಕದ ಪಕ್ಕದಲ್ಲಿ ಬ್ಯಾಚ್ ಅಥವಾ ಲಾಟ್ ನಂಬರ್ ಇರುತ್ತದೆ. ಅಲ್ಲಿ 'Batch No' ಸಾಲಿನಲ್ಲಿ E080668761 ಎಂದು ನಮೂದಾಗಿದ್ದರೆ, ಆ ಪೌಡರ್ ಬಳಕೆಯನ್ನು ತಕ್ಷಣವೇ ನಿಲ್ಲಿಸಿ, ಪ್ಯಾಕೆಟ್ ಅನ್ನು ಸೀಲ್ ಮಾಡಿ ಎತ್ತಿಡಿ. ಕೀಟನಾಶಕಗಳ ಪ್ರಮಾಣ ನಿಗದಿತ ಮಿತಿಗಿಂತ ಹೆಚ್ಚಿದೆ ಎಂದರೆ ತಕ್ಷಣವೇ ವಿಷಪೂರಿತ ಎಂದರ್ಥವಲ್ಲ, ಆದರೂ ಹಿಂಪಡೆಯುವ ಪ್ರಕ್ರಿಯೆ ನಡೆಯುತ್ತಿರುವಾಗ ಮುನ್ನೆಚ್ಚರಿಕೆ ವಹಿಸುವುದು ಸೂಕ್ತ ಎಂದು ನಿಯಂತ್ರಕರು ಹೇಳಿದ್ದಾರೆ.

Everest Cumin Recall: ಹಣ ವಾಪಸ್ ಪಡೆಯುವುದು ಹೇಗೆ? ದೂರು ನೀಡುವುದು ಮತ್ತು ಸುರಕ್ಷಿತ ಪರ್ಯಾಯ ಮಾರ್ಗಗಳು

ನಿಮ್ಮ ಬಳಿ ಇರುವ ಪ್ಯಾಕೆಟ್‌ನ ಲೇಬಲ್ ಹಾಗೂ ಬಿಲ್‌ನ ಫೋಟೋ ತೆಗೆದುಕೊಂಡು, ಅದನ್ನು ಖರೀದಿಸಿದ ಚಿಲ್ಲರೆ ವ್ಯಾಪಾರಿಯಿಂದ ರಿಫಂಡ್ (ಹಣ ವಾಪಸ್) ಕೇಳಬಹುದು. ಒಂದು ವೇಳೆ ವ್ಯಾಪಾರಿ ಹಣ ನೀಡಲು ನಿರಾಕರಿಸಿದರೆ, FSSAI ನ 'ಫುಡ್ ಸೇಫ್ಟಿ ಕನೆಕ್ಟ್' ಪೋರ್ಟಲ್ ಅಥವಾ ಆ್ಯಪ್‌ನಲ್ಲಿ ದೂರು ನೀಡಬಹುದು ಅಥವಾ 1800-11-2100 ಉಚಿತ ಕರೆ ಸಂಖ್ಯೆಗೆ ಸಂಪರ್ಕಿಸಬಹುದು. ವಿಶೇಷವಾಗಿ ಮಕ್ಕಳು, ಗರ್ಭಿಣಿಯರು ಮತ್ತು ದೀರ್ಘಕಾಲದ ಮೂತ್ರಪಿಂಡ (ಕಿಡ್ನಿ) ಸಮಸ್ಯೆಯಿಂದ ಬಳಲುತ್ತಿರುವವರು ಈ ಜೀರಿಗೆ ಪುಡಿಯ ಬಳಕೆಯಿಂದ ದೂರವಿರಬೇಕು. ಯಾವುದೇ ಆರೋಗ್ಯ ಸಮಸ್ಯೆ ಅಥವಾ ಆತಂಕವಿದ್ದರೆ ವೈದ್ಯರ ಸಲಹೆ ಪಡೆಯಿರಿ.

ಅಡುಗೆಗೆ ತಕ್ಷಣದ ಸುರಕ್ಷಿತ ಪರ್ಯಾಯ ಬೇಕಾದರೆ, ಇಡೀ ಜೀರಿಗೆ ತಂದು ಸಣ್ಣ ಉರಿಯಲ್ಲಿ ಹುರಿದು, ಮನೆಯಲ್ಲೇ ತಾಜಾ ಜೀರಿಗೆ ಪುಡಿ ಮಾಡಿಕೊಳ್ಳಿ. ಮಸಾಲೆ ಪದಾರ್ಥಗಳನ್ನು ಗಾಳಿಯಾಡದ (Airtight) ಡಬ್ಬಿಗಳಲ್ಲಿ ಬಿಸಿಲು ಮತ್ತು ಕಾವು ತಾಗದಂತೆ ಶೇಖರಿಸಿಡಿ. ಬೇಗ ಖಾಲಿಯಾಗುವಂತಹ ಸಣ್ಣ ಸಣ್ಣ ಪ್ಯಾಕೆಟ್‌ಗಳನ್ನು ಖರೀದಿಸುವುದು ಒಳಿತು. ಸಿದ್ಧ ಮಸಾಲೆ ಪುಡಿಗಳಲ್ಲಿ ಕಲಬೆರಕೆ ಸಾಹಸ ಸುಲಭವಾಗಿರುವುದರಿಂದ, ಹೊಸದಾಗಿ ಖರೀದಿಸುವ ಮುನ್ನ ಅಧಿಕೃತ ಸೂಚನೆಗಳನ್ನು ಗಮನಿಸಿ. ಈ ಕುರಿತು ಎವರೆಸ್ಟ್ ಕಂಪನಿಯ ಪ್ರತಿಕ್ರಿಯೆಯನ್ನು ಕೋರಲಾಗಿದ್ದು, ಮಾಹಿತಿ ಸಿಕ್ಕ ತಕ್ಷಣ ಅಪ್‌ಡೇಟ್ ಮಾಡಲಾಗುವುದು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.