ಪ್ರಕೃತಿಯ ನಂಟಿನಲ್ಲಿದೆ ಸೌಂದರ್ಯದ ಗುಟ್ಟು!

Updated: Saturday, August 4, 2012, 12:50 [IST]

ನಾನು ಸುಂದರವಾಗಿ ಕಾಣಬೇಕು, ಅದಕ್ಕೆ ಯಾವ ರೀತಿಯ ಕ್ರೀಮ್ ಅಥವಾ ಪೌಡರ್ ಹಚ್ಚಿದರೆ ಒಳ್ಳೆಯದು ಎಂದು ಎಷ್ಟೋ ಬಾರಿ ಯೋಚನೆ ಮಾಡುತ್ತಿರುತ್ತೇವೆ. ಅದಕ್ಕಾಗಿ ಯಾರಾದರೂ ಏನಾದರೂ ಸಜೆಸ್ಟ್ ಮಾಡಿದರೆ ಸಾಕು ಅದನ್ನು ಕೊಂಡು ತಂದು ನಮ್ಮ ಡ್ರೆಸ್ಸಿಂಗ್ ಟೇಬಲ್ ಮುಂದೆ ಬ್ಯೂಟಿಪ್ರಾಡಕ್ಟ್ (ಸೌಂದರ್ಯವರ್ಧಗಳ) ರಾಶಿಯನ್ನೇ ಕೂಡಿ ಇಟ್ಟಿರುತ್ತೇವೆ. ಆದರೆ ಹೆಚ್ಚು ಖರ್ಚು ಮಾಡದೆ ಈ ಕೆಳಗಿನ ನೈಸರ್ಗಿಕ ವಿಧಾನಗಳನ್ನು ಬಳಸಿ ಸೌಂದರ್ಯವನ್ನು ಹೆಚ್ಚಿಸಿಕೊಳ್ಳಬಹುದಾಗಿದೆ.

ಜೊಜೊಬಾ ಎಣ್ಣೆ: ಜೊಜೊಬಾ ಎಣ್ಣೆಗೆ ಬಣ್ಣವಿಲ್ಲ, ವಾಸನೆಯಿಲ್ಲ ಆದರೆ ಇದು ತ್ವಚೆ ಹೊಳಪನ್ನು ಹೆಚ್ಚಿಸುವಲ್ಲಿ ತುಂಬಾ ಪರಿಣಾಮಕಾರಿಯಾದ ಎಣ್ಣೆಯಾಗಿದೆ. ಈ ಎಣ್ಣೆಯನ್ನು ಎಲ್ಲಾ ರೀತಿಯ ತ್ವಚೆಯವರು ಬಳಸಬಹುದು.

* ಇದನ್ನು ತಲೆಗೆ ಹಚ್ಚಿದರೆ ತಲೆ ಕೂದಲು ಹೊಳಪನ್ನು ಪಡೆಯುವುದರ ಜೊತೆಗೆ ತುಂಬಾ ನಯವಾದ ಕೂದಲು ನಿಮ್ಮದಾಗುವುದು.
* ಐ ಲೈನರ್ ಅನ್ನು ಕಣ್ಣಿನಿಂದ ತೆಗೆಯಲು ಇದನ್ನು ಬಳಸಿ , ಸ್ವಲ್ಪ ಹತ್ತಿಗೆ ಹಾಕಿ ಅದರಿಂದ ಕಣ್ಣನ್ನು ಉಜ್ಜಿದರೆ ಮಸ್ಕರಾವನ್ನು ಸುಲಭವಾಗಿ ತೆಗೆಯಬಹುದು.
* ಸ್ನಾನದ ನಂತರ ಮೈಯನ್ನು ಇದರಿಂದ ಮಾಯಿಶ್ಚರೈಸರ್ ಮಾಡಿಕೊಳ್ಳಲು ಸೂಕ್ತವಾದ ಎಣ್ಣೆಯಾಗಿದೆ.
* ಆಡಿನ ಹಾಲು ಆರೋಗ್ಯಕ್ಕೆ ಒಳ್ಳೆಯದು ಎಂದು ಹೇಳಲಾಗುತ್ತದೆ. ಈ ಹಾಲು ತ್ವಚೆ ಸೌಂದರ್ಯವನ್ನು ಹೆಚ್ಚಿಸಲು ಕೂಡ ಸಹಕಾರಿಯಾಗಿದೆ. ಜೊಜೊಬಾ ಎಣ್ಣೆಯನ್ನು ಮೈಗೆ ಹಚ್ಚಿ ನಂತರ ಆಡಿನ ಹಾಲನ್ನು 2-3 ಹನಿ ಸ್ನಾನದ ಟಬ್ ನಲ್ಲಿರುವ ಬಿಸಿ ನೀರಿಗೆ ಹಾಕಿ ಅದರಲ್ಲಿ 10 ನಿಮಿಷ ಕುಳಿತು ಸ್ನಾನ ಮಾಡುವುದರಿಂದ ತ್ವಚೆ ಮೃದುವಾಗುವುದು ಮತ್ತು ಮೈ ಕಾಂತಿ ಹೆಚ್ಚುವುದು.

ಟೀ ಗಿಡದ ಎಣ್ಣೆ (tea tree oil): ಇದನ್ನು ಬಳಸಿ ಮೊಡವೆ ಹೋಗಲಾಡಿಸಬಹುದು, ಬಾಯಿ ಶುಚಿಗೊಳಿಸಲು ಮೌತ್ ವಾಶ್ ಆಗಿ ಅಷ್ಟೇ ಏಕೆ ದೇಹಕ್ಕೆ ಹಚ್ಚುವ ಸುಗಂಧದ್ರವ್ಯವಾಗಿ ಕೂಡ ಬಳಸಬಹುದು.

ಗ್ರೀನ್ ಟೀ ಬ್ಯಾಗ್: ಗ್ರೀನ್ ಟೀ ಬ್ಯಾಗ್ ಅನ್ನು ಬಿಸಿ ನೀರಿನಲ್ಲಿ ಹಾಕಿ ಟೀ ತಯಾರಿಸಿದ ಬಳಿಕ ಬಳಿಕ ಆ ಬ್ಯಾಗ್ ಬಿಸಾಡದೆ ಅದನ್ನು ಕಣ್ಣಿನ ಮೇಲೆ ಇಡಿ. ಈ ರೀತಿ ಮಾಡಿದರೆ ಕಣ್ಣಿನ ಸುತ್ತ ಇರುವ ಕಪ್ಪುಕಲೆಗಳು ಕಡಿಮೆಯಾಗಿ ತ್ವಚೆ ಕಾಂತಿ ಹೆಚ್ಚುವುದು.

ಜೇನು: ಜೇನನ್ನು ಮೈಗೆ ಹಚ್ಚಿದರೆ ತ್ವಚೆ ಕಾಂತಿ ಹೆಚ್ಚುವುದು. ತುಟಿಗೆ ಹಚ್ಚಿದರೆ ತುಟಿ ಮೃದುವಾಗುವುದು. ಜೇನು ಕೂದಲಿಗೂ ಒಳ್ಳೆಯದು.
ವಿಟಮಿನ್ ಇ ಮಾತ್ರೆ: ಇದನ್ನು ಪೇಸ್ಟ್ ಮಾಡಿ ಕೂದಲಿಗೆ ಹಚ್ಚುವ ಎಣ್ಣೆ ಜೊತೆ ಮಿಶ್ರ ಮಾಡಿ ಹಚ್ಚಿದರೆ ಕೂದಲು ಸೊಂಪಾಗಿ ಬೆಳೆಯುವುದು. ಕಣ್ಣಿನ ಸುತ್ತ ಕಪ್ಪು ಕಲೆ ಇರುವವರು ಇದನ್ನು ಪೇಸ್ಟ್ ಮಾಡಿ ಕಣ್ಣಿನ ಸುತ್ತ ಹಚ್ಚಿದರೆ ಕೆಲವೇ ದಿನದಲ್ಲಿ ಇದರ ಫಲಿತಾಂಶ ತಿಳಿಯುತ್ತದೆ.

ಇದಲ್ಲದೆ ಮೊಟ್ಟೆ, ನಿಂಬೆ ಹಣ್ಣು ಇವುಗಳು ಕೂಡ ಸೌಂದರ್ಯ ಹೆಚ್ಚಿಸುವ ಗುಣ ಹೊಂದಿದೆ.