ಗ್ಲಿಸೆರಿನ್ ಬಳಸಿ 5 ಬಗೆಯ ಫೇಸ್ ಮಾಸ್ಕ್

Skin Care

oi-Reena

By Hema S

Updated: Friday, August 17, 2012, 10:56 [IST]

ತ್ವಚೆ ಸೌಂದರ್ಯ ಹೆಚ್ಚಿಸಿಕೊಳ್ಳಲು ಮಾತ್ರವಲ್ಲ ತ್ವಚೆ ಸಮಸ್ಯೆ ನಿವಾರಿಸಲು ಗ್ಲಿಸೆರಿನ್ ಬಳಸಬಹುದು. ಗ್ಲಿಸೆರಿನ್ ನ ಮುಖ್ಯ ಗುಣವೆಂದರೆ ತ್ವಚೆ ಆರೈಕೆ ಮಾಡುತ್ತದೆ ಮತ್ತು ಯಾವುದೇ ಅಡ್ಡ ಪರಿಣಾಮ ಉಂಟಾಗುವುದಿಲ್ಲ. ಗ್ಲಿಸೆರಿನ್ ಹಚ್ಚಿದರೆ ಒಣ ತ್ವಚೆ ಸಮಸ್ಯೆ ಇರುವುದಿಲ್ಲ ಅಲ್ಲದೆ ಮುಖದ ಕಾಂತಿ ಕೂಡ ಹೆಚ್ಚಾಗುವುದು. ಗ್ಲಿಸೆರಿನ್ ಹಾಗೇ ಹಚ್ಚುವುದಕ್ಕಿಂತ ಫೇಸ್ ಮಾಸ್ಕ್ ಮಾಡಿದರೆ ನಿರ್ಜೀವ ತ್ವಚೆ ಹೋಗಲಾಡಿಸಿ ತ್ವಚೆಯ ಅಂದ ಹೆಚ್ಚಿಸಿಕೊಳ್ಳಬಹುದು.

ಮುಖದ ಅಂದ ಹೆಚ್ಚಿಸುವ ಗ್ಲಿಸೆರಿನ್ ಫೇಸ್ ಮಾಸ್ಕ್:

ಗ್ಲಿಸೆರಿನ್ ಮತ್ತು ಜೇನು: ಒಂದು ಚಮಚ ಜೇನು ಮತ್ತು ಒಂದು ಚಮಚ ಗ್ಲಿಸೆರಿನ್ ತೆಗೆದುಕೊಂಡು ಮಿಶ್ರಣ ಮಾಡಬೇಕು. ನಂತರ ಮುಖಕ್ಕೆ ಹಚ್ಚಿ ಅರ್ಧ ಗಂಟೆ ಬಿಟ್ಟು ಮುಖ ತೊಳೆಯಬೇಕು. ಈ ರೀತಿ ಮಾಡಿದರೆ ತ್ವಚೆ ಒಣಗುವುದಿಲ್ಲ, ಮುಖದಲ್ಲಿ ಹೊಳಪು ಹೆಚ್ಚಾಗುವುದು.

ಗ್ಲಿಸೆರಿನ್ ಮತ್ತು ಬಾಳೆಹಣ್ಣು: ಒಂದು ಚಮಚ ಗ್ಲಿಸೆರಿನ್ ಗೆ ಪೇಸ್ಟ್ ರೀತಿ ಮಾಡಿದ್ದ ಬಾಳೆಹಣ್ಣನ್ನು 3 ಚಮಚ ಹಾಕಿ ಮಿಶ್ರಣ ಮಾಡಬೇಕು. ಈ ಮಿಶ್ರಣವನ್ನು ಮುಖಕ್ಕೆ ಹಚ್ಚಿ 30 ನಿಮಿಷದ ಬಳಿಕ ಮುಖ ತೊಳೆಯಬೇಕು. ಈ ರೀತಿ ವಾರದಲ್ಲಿ ಎರಡು ಬಾರಿ ಮಾಡುತ್ತಾ ಬಂದರೆ ಮುಖದಲ್ಲಿರುವ ಕಲೆಗಳು ಕ್ರಮೇಣ ಕಡಿಮೆಯಾಗುವುದು.

ಗ್ಲಿಸೆರಿನ್ ಮತ್ತು ಓಟ್ಸ್: 3 ಚಮಚ ಓಟ್ಸ್ ಮೀಲ್ಸ್ ಪುಡಿಗೆ 2 ಚಮಚ ಗ್ಲಿಸೆರಿನ್ ಹಾಕಿ ಮಿಶ್ರಣ ಮಾಡಿ, ಈ ಮಿಶ್ರಣದಿಂದ ಮುಖವನ್ನು ಸ್ಕ್ರಬ್ ಮಾಡಿ 15 ನಿಮಿಷ ಬಿಟ್ಟು ಮುಖ ತೊಳೆದರೆ ಬ್ಲ್ಯಾಕ್ ಹೆಡ್ಸ್ ಕಡಿಮೆಯಾಗುವುದು.

ಗ್ಲಿಸೆರಿನ್, ಮೊಟ್ಟೆ ಮತ್ತು ನಿಂಬೆರಸ: ಒಂದು ಪಾತ್ರೆಯಲ್ಲಿ ಒಂದು ಚಮಚ ಗ್ಲಿಸೆರಿನ್, ಮೊಟ್ಟೆಯ ಬಿಳಿ ಮತ್ತು ಅರ್ಧ ನಿಂಬೆ ರಸ ಹಾಕಿ ಮಿಶ್ರಣ ಮಾಡಿ ಇದನ್ನು ಮುಖಕ್ಕೆ ಹಚ್ಚಿ ಸ್ವಲ್ಪ ಹೊತ್ತು ಬಿಟ್ಟು ತೊಳೆದರೆ ಮುಖ ಸ್ವಚ್ಛವಾಗಿ ಕಾಣುತ್ತದೆ.

ಕಪ್ಪು ಮಣ್ಣು ಮತ್ತು ಗ್ಲಿಸೆರಿನ್: ತ್ವಚೆ ಆರೈಕೆಗೆ ಕಪ್ಪು ಮಣ್ಣು ತುಂಬಾ ಒಳ್ಳೆಯದು. 1 ಚಮಚ ಕಪ್ಪು ಮಣ್ಣಿಗೆ 2 ಚಮಚ ಗ್ಲಿಸೆರಿನ್ ಹಾಕಿ ಮಿಶ್ರಣ ಮಾಡಿ ಮುಖಕ್ಕೆ ಹಚ್ಚಿ 20 ನಿಮಿಷ ಬಿಟ್ಟು ತಣ್ಣೀರಿನಿಂದ ಮುಖ ತೊಳೆದರೆ ಅಕಾಲಿಕ ನೆರಿಗೆ ಬೀಳುವುದಿಲ್ಲ ಮತ್ತು ಮುಖದ ಅಂದ ವೃದ್ಧಿಸುವುದು.