ಪ್ರೀತಿ ಕುರುಡಾದರೆ ಬಾಳು ಕುರುಡಾಗುವುದು!

Relationship

oi-Reena

By Hema S

Published: Wednesday, March 14, 2012, 16:34 [IST]

'ಪ್ರೀತಿ ಕುರುಡು' ಇದು ಪ್ರೀತಿ ಬಗ್ಗೆ ಇರುವ ವ್ಯಾಖ್ಯಾನ. ಆದರೆ ಜೀವನ ಕುರುಡಲ್ಲ. ಇವತ್ತು ಕೋರ್ಟಿನಲ್ಲಿ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸುತ್ತಿರುವರಲ್ಲಿ ಪ್ರೀತಿಸಿ ಮದುವೆಯಾದವರ ಸಂಖ್ಯೆ ಅರೇಂಜ್ ಮದುವೆಯಾದವರಿಗಿಂತ ಅಧಿಕವಾಗಿದೆ. ಕಾರಣವಿಷ್ಟೆ ಕುರುಡು ಪ್ರೀತಿಯಲ್ಲಿ ಕಾಣದ ಕುಂದು ಕೊರತೆಗಳು ಮದುವೆಯ ನಂತರ ಕಾಣತೊಡಗಿದವು.

ಹದಿಹರೆಯದ ವಯಸ್ಸಿನಲ್ಲಿ ಪ್ರೀತಿ-ಪ್ರಮದ ಗುಂಗು ಇದ್ದೇ ಇರುತ್ತದೆ. ಆದರೆ ಪ್ರೀತಿಸುವ ಮೊದಲು ಸ್ವಲ್ಪ ಸ್ವಲ್ಪ ಆಲೋಚನೆ ಮಾಡಿದರೆ ಮುಂದೆ ಸುಖಕರವಾದ ಜೀವನ ಸಿಗುವುದು.

1. ನಡತೆ: ಪ್ರೀತಿಸುವ ಮೊದಲು ಪ್ರೀತಿಸ ಹೊರಟಿರುವ ವ್ಯಕ್ತಿಯ ನಡತೆ ಬಗ್ಗೆ ತಿಳಿದುಕೊಳ್ಳುವುದು ಅವಶ್ಯಕ. ಸಿನಿಮಾದಲ್ಲಿ ತೋರಿಸುವ ರೀತಿ ಒಂದು ಸಲ ವ್ಯಕ್ತಿಯನ್ನು ಕಂಡ ತಕ್ಷಣ ಪ್ರೀತಿಸಿದರೆ ಮುಂದೆ ಬದುಕು ಕೂಡ ದುರಂತ ಸಿನಿಮಾ ಕತೆಯಾಗುವ ಸಾಧ್ಯತೆ ಹೆಚ್ಚು. ಆದ್ದರಿಂದ ಪ್ರೀತಿಸುವ ಮೊದಲು ವ್ಯಕ್ತಿಯ ನಡತೆ ತಿಳಿದುಕೊಳ್ಳಬೇಕು.

2. ಮನೆತನದ ಬಗ್ಗೆ ತಿಳಿದುಕೊಳ್ಳಬೇಕು: ಮದುವೆಯಾಗುವಾಗ ಮುಖ್ಯವಾಗಿ ಗಮನಿಸಬೇಕಾದ ವಿಷಯ ಅಂದರೆ ಹುಡುಗನ ಮನೆತನ. ಆದ್ದರಿಂದಲೆ ಹಿರಿಯರು ಮಾಡುವ ಮದುವೆಯಲ್ಲಿ ಹುಡುಗನಿಗಿಂತ ಅವನ ಮನೆತನಕ್ಕೆ ಹೆಚ್ಚಿನ ಪ್ರಾಮುಖ್ಯತೆ ಕೊಡುತ್ತಾರೆ. ಒಳ್ಳೆಯ ಮನೆತನದಲ್ಲಿ ಬೆಳೆದಿರುವವರೆಗೆ ಮಾತ್ರ ಸಂಬಂಧಗಳ ಬೆಲೆ ಅರ್ಥವಾಗುವುದು.

3. ಆರ್ಥಿಕ ಸ್ಥಿತಿ: ಪ್ರೀತಿಸುವಾಗ ಇದೊಂದು ದೊಡ್ಡ ವಿಷಯವಲ್ಲ ಅಂತ ಅನಿಸಿದರೂ ಮದುವೆ ನಂತರ ಹಣವಿಲ್ಲದೆ ಜೀವನ ನಡೆಸಲು ಸಾಧ್ಯವಿಲ್ಲ. ಹಣ ಇಲ್ಲದಿದ್ದರೆ ಸಮಸ್ಯೆಗಳು ನಿಧಾನಕ್ಕೆ ಪ್ರಾರಂಭವಾಗಿ ಸಂಬಂಧ ಮುರಿದು ಬೀಳುವ ಸಾಧ್ಯತೆ ಹೆಚ್ಚು.

4. ಶಿಕ್ಷಣ: ತುಂಬಾ ಓದಿದ ಹುಡುಗಿ ಏನೂ ಓದಿಲ್ಲದ ಹುಡುಗನ ಮದುವೆಯಾದರೆ ಅವನಿಗೆ ಕೀಳರಿಮೆ ಸಹಜ. ಶಿಕ್ಷಣವಿದ್ದರೆ ಮಾತ್ರ ಜೀವನ ಮಾಡಬಹುದು ಅಂತ ಹೇಳುತ್ತಿಲ್ಲ. ಹೆಚ್ಚು ಓದಿಲ್ಲದವರು ಒಳ್ಳೆಯ ಸ್ಥಾನಮಾನ ಗಳಿಸಿದ ನಿದರ್ಶನಗಳಿವೆ, ಆದರೆ ಸಂಖ್ಯೆ ಬೆರಳೆಣಿಕೆಯಷ್ಟೆ.

5. ರೂಪ: ಪ್ರೀತಿ ಮಾಡುವಾಗ ರೂಪ ನೋಡಿದರೂ ನಂತರ ರೂಪಕ್ಕಿಂತ ಗುಣ ಮುಖ್ಯವಾಗುತ್ತದೆ. ಆದ್ದರಿಂದ ಒಳ್ಳೆಯ ಗುಣವಿದ್ದರೆ ಅದರ ಮುಂದೆ ರೂಪ ದೊಡ್ಡ ವಿಷಯವಾಗುವುದಿಲ್ಲ.