ಮಧು ಖರ್ಜೂರ

ನೋಡಿದರೇನೇ ಬಾಯಲ್ಲಿ ನೀರೂರಿಸುವ ಈ ಹೊಸರುಚಿಯ ಹೆಸರು 'ಹನಿ ಡೇಟ್ ' ಅರ್ಥಾತ್ ಮಧು ಖರ್ಜೂರ ಎಂದು. ಕ್ರಿಸ್ಮಸ್‌ಗಾಗಿ ವಿಶೇಷ ಖಾದ್ಯ. ಈ ಬಾರಿಯ ಕ್ರಿಸ್ಮಸ್ ಅಡುಗೆ ಪಟ್ಟಿಯಲ್ಲಿ ಹನಿಡೇಟನ್ನೂ ಸೇರಿಸಿಕೊಳ್ಳಿ. ಇದನ್ನು ತಯಾರಿಸುವುದು ತುಂಬಾ ಸುಲಭ. ಬೇಕಾಗುವ ಪದಾರ್ಥಗಳೂ ಕಡಿಮೆ. ಪ್ರಯತ್ನಿಸಿ ನೋಡಿ.

ಬೇಕಾದ ಪದಾರ್ಥಗಳು :

ಮೈದಾಹಿಟ್ಟು : 250 ಗ್ರಾಂ
ಖರ್ಜೂರ : 250 ಗ್ರಾಂ
ಜೇನುತುಪ್ಪ : 100 ಗ್ರಾಂ
ಎಣ್ಣೆ : ಕರಿಯಲು ಬೇಕಾದಷ್ಟು

ಮಾಡುವ ವಿಧಾನ :

ಮೈದಾಹಿಟ್ಟನ್ನು ಚಪಾತಿ ಹಿಟ್ಟಿನ ತರಹ ಕಲಸಿ ಸ್ವಲ್ಪ ಸಮಯ ನೆನೆಯಲು ಬಿಡಬೇಕು. ಖರ್ಜೂರದಲ್ಲಿನ ಬೀಜಗಳನ್ನು ತೆಗೆದು ಮಿಕ್ಸಿಯಲ್ಲಿ ನುಣ್ಣಗೆ ಅರೆದು ಪೇಸ್ಟ್‌ನ ರೀತಿ ಮಾಡಿಕೊಳ್ಳಬೇಕು.

ಈಗ ಬಾಣಲೆಯಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಿ. ಕಲಸಿದ ಮೈದಾಹಿಟ್ಟನ್ನು ಹಪ್ಪಳಕ್ಕಿಂತಲೂ ಸಣ್ಣ ಅಳತೆಯಲ್ಲಿ ಮಾಡಿ(ಆದರೆ ಅದು ತುಂಬಾ ದಪ್ಪ ಇರಬೇಕು). ಖರ್ಜೂರದ ಪೇಸ್ಟನ್ನು ಒಳಗಡೆಯಿಟ್ಟು ಕಡುಬಿನ ರೀತಿ ಮುಚ್ಚಿರಿ. ಇದೇ ರೀತಿ ಮತ್ತಷ್ಟನ್ನು ತಯಾರಿಸಿ. ಹತ್ತು ನಿಮಿಷದ ನಂತರ, ಮಧ್ಯಕ್ಕೆ ಹೋಳುಗಳಾಗುವಂತೆ ಕತ್ತರಿಸಿ. ಆಮೇಲೆ ಎಣ್ಣೆಯಲ್ಲಿ ಹಾಕಿ ಕರಿಯಿರಿ. ಕರಿದ ಹೋಳುಗಳನ್ನು ಜೇನುತುಪ್ಪದಲ್ಲಿ ಅದ್ದಬೇಕು. ಸಿಹಿಯನ್ನು ಅಷ್ಟು ಇಷ್ಟಪಡದವರು ಜೇನುತುಪ್ಪವನ್ನು ಸ್ವಲ್ಪ ಸವರಬೇಕು. ಅಲ್ಲಿಗೆ ಮಧು ಖರ್ಜೂರ ರೆಡಿ.

(ದಟ್ಸ್‌ಕನ್ನಡ ಪಾಕಶಾಲೆ)