ಓಣಂಗೆ ಸ್ಪೆಷಲ್ ಹಾಲಿನ ಪಾಯಸದ ಸವಿಯಿರಲಿ

Sweets

oi-Staff

By Super

Published: Wednesday, January 18, 2012, 14:18 [IST]

ಓಣಂ ಎಂದ ಮೇಲೆ ಮನೆಯಲ್ಲಿ ಪಾಯಸದ ಸವಿ ಇರಲೇಬೇಕು. ಈ ಬಾರಿ ಓಣಂಗೆ ವಿಶೇಷ ಪಾಯಸಗಳಲ್ಲಿ ಒಂದಾಗಿರುವ ಹಾಲಿನ ಪಾಯಸವನ್ನು ತಯಾರಿಸಿ ಮನೆಮಂದಿಯ ಬಾಯನ್ನು ಸಿಹಿಗೊಳಿಸಿ. ಹಾಲಿನ ಪಾಯಸ ತಯಾರಿಸುವುದು ಹೇಗೆಂದು ನೋಡೋಣ.

ಹಾಲಿನ ಪಾಯಸಕ್ಕೆ ಬೇಕಾಗುವ ಪದಾರ್ಥಗಳು:
* 1 ಲೀಟರ್ ಹಾಲು
* 1 ಲೀಟರ್ ನೀರು
* 1 ಕಪ್ ಅಕ್ಕಿ
* 1 ಕಪ್ ಸಕ್ಕರೆ (ನಿಮ್ಮ ರುಚಿಗೆ ತಕ್ಕಂತೆ)
* 100-125 ಗ್ರಾಂ ಗೋಡಂಬಿ
* 75-100 ಗ್ರಾಂ ಒಣದ್ರಾಕ್ಷಿ
* ತುಪ್ಪ
* 1/2 ಚಮಚ ಏಲಕ್ಕಿ ಪುಡಿ

ಹಾಲಿನ ಪಾಯಸ ಮಾಡುವುದು ಹೀಗೆ:
ಅಕ್ಕಿಯನ್ನು ಚೆನ್ನಾಗಿ ತೊಳೆದು ಸೋಸಿ ನೀರು ತುಂಬಿ ಒಂದೆಡೆ ಇಡಬೇಕು. ನಂತರ ತಳ ಗಟ್ಟಿ ಇರುವ ಪಾತ್ರೆಗೆ ಸ್ವಲ್ಪ ತುಪ್ಪ ಹಾಕಿ ಕಾದ ನಂತರ ಹಾಲು ಮತ್ತು ನೀರನ್ನು ಬೆರೆಸಿ ಸಣ್ಣ ಉರಿಯಲ್ಲಿ ಇಡಬೇಕು. ಅದು ಕುದಿಯಲು ಆರಂಭಿಸಿ ಸ್ವಲ್ಪ ಗಟ್ಟಿಯಾದಂತೆ ಕಾಣುವಾಗ ತೊಳೆದಿಟ್ಟ ಅಕ್ಕಿಯನ್ನು ಬೆರೆಸಬೇಕು.

ಸಣ್ಣ ಉರಿಯಲ್ಲಿ ಅದನ್ನು ಕದಡುತ್ತಾ ತಳ ಹಿಡಿಯದಂತೆ ನೋಡಿಕೊಳ್ಳಬೇಕು. ಅನ್ನವನ್ನು ಹಿಸುಕಿ ನೋಡಿದಾಗ ಅದು ಚೆನ್ನಾಗಿ ಬೆಂದಿದ್ದರೆ ಮಾತ್ರ ಸಕ್ಕರೆ ಬೆರೆಸಬೇಕು. ಒಮ್ಮೆ ಸಕ್ಕರೆ ಬೆರೆಸಿದರೆ ಅನ್ನ ಬೇಯುವುದಿಲ್ಲ. ಆದ್ದರಿಂದ ಅನ್ನ ಬೆಂದ ಮೇಲಷ್ಟೆ ಸಕ್ಕರೆ ಬೆರೆಸಬೇಕು.

ಕುದಿಯುತ್ತಾ ಕುದಿಯುತ್ತಾ ಹಾಲು ಬಣ್ಣ ಬದಲಾಯಿಸಿದಂತೆ ಕಂಡಾಗ ಪಾಯಸವನ್ನು ಕೆಳಗಿಳಿಸಬೇಕು. ಈಗ ಚಿಕ್ಕದೊಂದು ಬಾಣಲೆಗೆ ಸ್ವಲ್ಪ ತುಪ್ಪ ಹಾಕಿ ಕಾಯಿಸಿ ಗೋಡಂಬಿ, ಒಣದ್ರಾಕ್ಷಿ ಯನ್ನು ಹುರಿದುಕೊಂಡು ಪಾಯಸಕ್ಕೆ ಬೆರೆಸಿ ಏಲಕ್ಕಿ ಪುಡಿ ಹಾಕಬೇಕು. ಓಣಂಗೆಂದು ವಿಶೇಷ ಹಾಲಿನ ಪಾಯಸ ತಯಾರಾಗಿದೆ.