ಮಕ್ಕಳ ಬೆಳವಣಿಗಾಗಿ ಒಣ ಹಣ್ಣುಗಳ ಉಂಡೆ

Sweets

oi-Prasad

By * ನಿವೇದಿತಾ ಪ್ರಭಾಕರ್, ಬೆಂಗಳೂರು

Updated: Thursday, March 14, 2013, 15:55 [IST]

ಬೆಳೆಯುವ ಮಕ್ಕಳು ತಿಂಡಿ ತಿನಿಸು ತಿನ್ನುವ ಬಗ್ಗೆ ತಾಯಂದಿರಿಗೆ ಒಂದಿಲ್ಲೊಂದು ತಕರಾರು ಇದ್ದೇ ಇರುತ್ತದೆ. ಅದು ತಿನ್ನುವುದಿಲ್ಲ, ಇದು ತಿನ್ನುವುದಿಲ್ಲ, ಹೀಗಾದರೆ ಬೆಳವಣಿಗೆ ಹೇಗೆ ಸಾಧ್ಯ ಅಂತ ಕನವರಿಸುತ್ತಲೇ ಇರುತ್ತಾರೆ. ಆರೋಗ್ಯಕರ ತಿನಿಸುಗಳನ್ನು ಮಕ್ಕಳು ತಿನ್ನುವಂತೆ ಮಾಡುವುದು ಅಮ್ಮಂದಿರಿಗೆ ನಿಜಕ್ಕೂ ಸವಾಲಿನ ಕೆಲಸ.

ಸರ್ವತೋಮುಖ ಬೆಳವಣಿಗೆಗಾಗಿ ವೈದ್ಯರ ಬಳಿ ಹೋಗಿ ಟಾನಿಕ್ಕುಗಳನ್ನು ಕುಡಿಸುವ ಬದಲು, ಮಕ್ಕಳ ಮೂಳೆ, ಹಲ್ಲುಗಳು ಗಟ್ಟಿಯಾಗಲು ಒಣ ಹಣ್ಣುಗಳ ಉಂಡೆ ಮಾಡಿ ತಿನ್ನಲು ನೀಡಬಹುದು. ಡ್ರೈ ಫ್ರುಟ್ಸ್ ಗಳನ್ನು ಬಿಡಿಬಿಡಿಯಾಗಿ ಕೊಟ್ಟಾಗ ಕೆಲ ಮಕ್ಕಳು ತಕರಾರು ಮಾಡಬಹುದು. ಆದ್ದರಿಂದ, ಬೆಳೆಯುತ್ತಿರುವ ಮಕ್ಕಳಿಗೆ ರುಚಿರುಚಿ ಉಂಡೆ ಮಾಡಿ ತಿನ್ನಿಸಿದರೆ ಇಷ್ಟಪಟ್ಟು ತಿನ್ನುತ್ತಾರೆ.

ಬೇಕಾಗುವ ಪದಾರ್ಥಗಳು

ಗೋಡಂಬಿ 50 ಗ್ರಾಂ
ಉತ್ತತ್ತಿ 50 ಗ್ರಾಂ
ಒಣದ್ರಾಕ್ಷಿ 50 ಗ್ರಾಂ
ಬಾದಾಮಿ 50 ಗ್ರಾಂ
ಪಿಸ್ತಾ 50 ಗ್ರಾಂ
ಏಲಕ್ಕಿ 4
ಗಸಗಸೆ 3 ಚಮಚ
ಉಂಡೆ ಬೆಲ್ಲ 250 ಗ್ರಾಂ
ಒಣ ಕೊಬ್ಬರಿ ಕಾಲು ಬಟ್ಟಲು

ತಯಾರಿಸುವ ವಿಧಾನ

ಡ್ರೈ ಫ್ರುಟ್ಸ್(ಒಣ ಹಣ್ಣು)ಗಳನ್ನು ಅಡಕತ್ತರಿಯಲ್ಲಿ ಸಣ್ಣದಾಗಿ ಕತ್ತರಿಸಿಕೊಳ್ಳಿ. ಒಣ ಕೊಬ್ಬರಿಯನ್ನು ಐದಾರು ಚಮಚ ಆಗುವಷ್ಟು ತುರಿದುಕೊಂಡು ಒಣ ಹಣ್ಣುಗಳೊಂದಿಗೆ ಸೇರಿಸಿಟ್ಟುಕೊಳ್ಳಿ. ಇನ್ನೊಂದೆಡೆ ಗಸಗಸೆಯನ್ನು ಹುರಿದಿಟ್ಟುಕೊಳ್ಳಿ.

ಉಂಡೆ ಬೆಲ್ಲವನ್ನು ಆಲೂಗಡ್ಡೆ ಚಿಪ್ಸ್ ನಂತೆ ತುರಿದುಕೊಂಡು ಅಥವಾ ಬೇಕಿದ್ದರೆ ಜಜ್ಜಿಕೊಂಡು ಅರ್ಧ ಲೋಟ ನೀರಿನಲ್ಲಿ ಕುದಿಯಲು ಬಿಡಿ. ಕುದಿ ಬಂದು ನೀರಿನಲ್ಲಿ ಬೆಲ್ಲ ಕೂಡಿಕೊಳ್ಳುತ್ತಿದ್ದಂತೆ ಹುರಿದಿಟ್ಟ ಗಸಗಸೆ ಸೇರಿಸಿ ಚೆನ್ನಾಗಿ ಕೈಯಾಡಿಸಿ ಕೆಳಗಿಳಿಸಿಕೊಳ್ಳಿ. ಬೆಲ್ಲದ ಪಾಕ ತೀರಾ ಗಟ್ಟಿಯಾಗುವುದೂ ಬೇಡ, ಅಳ್ಳಕಾಗುವುದೂ ಬೇಡ.

ಬೆಲ್ಲ ತುಸು ಆರಿದ ನಂತರ ಒಣ ಹಣ್ಣುಗಳ ಮಿಶ್ರಣದಲ್ಲಿ ಸೇರಿಸಿ ಉಂಡೆಗಳಾಗಿ ಕಟ್ಟಿಡಿ. ಒಣ ಆಗಿರುವ ಡಬ್ಬಿಯಲ್ಲಿ ತುಂಬಿಟ್ಟು ಮಕ್ಕಳು ಬೇಕೆಂದಾಗೆಲ್ಲ ತಿನ್ನಲು ನೀಡಿರಿ.

ಎಚ್ಚರಿಕೆ : ಒಣ ಹಣ್ಣುಗಳು ಬಲು ದುಬಾರಿ. ಡ್ರೈ ಫ್ರುಟ್ಸ್ ಉಂಡೆ ತಯಾರಿಸುವುದು ಬಿಡುವುದು ಅವರವರಿಗೆ ಬಿಟ್ಟ ವಿಚಾರ.