ರಸಗುಲ್ಲದಷ್ಟು ರುಚಿ ಮತ್ತು ಸಿಹಿಯಾದ ಸಮೋಸ

Sweets

oi-Reena

By Hema S

Published: Friday, March 2, 2012, 16:32 [IST]

ಸಮೋಸ ಅಂದರೆ ನಮ್ಮ ಕಣ್ಣ ಮುಂದೆ ಬರುವುದು ತರಕಾರಿಗಳನ್ನು ಹಾಕಿ ಸ್ವಲ್ಪ ಖಾರವಾಗಿರುವ ತಿಂಡಿ. ಆದರೆ ಉತ್ತರ ಭಾರತದ ಕಡೆ ಸ್ಪೆಷಲ್ ಅಡುಗೆ ಆಗಿ ಸ್ವೀಟ್ ಸಮೋಸ ಮಾಡುತ್ತಾರೆ. ಬೇಕರಿಯಲ್ಲಿ ದೊರೆಯುವ ಇತರ ಸಿಹಿತಿಂಡಿಗಳಂತೆ ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ. ಇದನ್ನು ಮಾಡುವ ವಿಧಾನ ನೋಡಿ ಇಲ್ಲಿದೆ:

ಬೇಕಾಗುವ ಸಾನಮಾಗ್ರಿಗಳು:
1. ಗಟ್ಟಿಯಾದ ಹಾಲು 2 ಕಪ್
2. ಬೆಲ್ಲ 1 ಕಪ್
3. ಮೈದಾ 2 ಕಪ್
4. ಕುದಿಸಿದ ನೀರು 4 ಕಪ್
5. ಅರ್ಧ ಕಪ್ ಸಕ್ಕರೆ
6. ಚಿಟಿಕೆಯಷ್ಟು ಕೇಸರಿ
7. ಏಲಕ್ಕಿ 1/2 ಚಮಚ
8. ಎಣ್ಣೆ

ಮಾಡುವ ವಿಧಾನ:

1. ಹಾಲು ಮತ್ತು ಪುಡಿ ಮಾಡಿದ ಬೆಲ್ಲವನ್ನು ಹಾಕಿ ಚೆನ್ನಾಗಿ ಕುದಿಸಬೇಕು. ನಂತರ ಈ ಗಟ್ಟಿಯಾದ ಮಿಶ್ರಣಕ್ಕೆ ಚಿಟಿಕೆಯಷ್ಟು ಕೇಸರಿಯನ್ನು ಹಾಕಿ, ಮಿಶ್ರಣವನ್ನು ಚೆನ್ನಾಗಿ ತಿರುಗಿಸಿ ಉರಿಯಿಂದ (ಬೆಂಕಿ) ತೆಗೆಯಬೇಕು.

2. ನೀರಿಗೆ ಸಕ್ಕರೆ ಮತ್ತು ಏಲಕ್ಕಿ ಹಾಕಿ ಸಕ್ಕರೆ ಪಾನಕ ತಯಾರಿಸಬೇಕು.

3. ಮೈದಾಕ್ಕೆ ಚಿಟಿಕೆಯಷ್ಟು ಉಪ್ಪು ಹಾಕಿ ಚೆನ್ನಾಗಿ ಕಲೆಸಿ ಅದನ್ನು ಚಿಕ್ಕ ಉಂಡೆಗಳಾಗಿ ಮಾಡಿ ಅದನ್ನು ಅಗಲವಾಗಿ ತಟ್ಟಬೇಕು. ಅದಕ್ಕೆ ಬೆಲ್ಲದ ಗಟ್ಟಿ ಮಿಶ್ರಣವನ್ನು ಹಾಕಿ ಮಡಚಿ ತ್ರಿಕೋನಾ ಆಕಾರದಲ್ಲಿ ಕತ್ತರಿಸಬೇಕು.

4. ನಂತರ ಅದನ್ನು ಎಣ್ಣೆಯಲ್ಲಿ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು.

ನಂತರ ಈ ತಿಂಡಿಯನ್ನು ಸಕ್ಕರೆ ಪಾನಕದಲ್ಲಿ ಅರ್ಧ ಗಂಟೆ ಹಾಕಿಡಬೇಕು. ಹೀಗೆ ಮಾಡಿದರೆ ಸಿಹಿಯಾದ ಸಮೋಸ ತಿನ್ನಲು ರೆಡಿ.