ಮಳೆಯಲಿ ಜೊತೆಯಲಿ : ಕಡಲೆ ಬೇಳೆ ಅಂಬೊಡೆ

Snacks

oi-Reena

By Hema S

Published: Thursday, June 28, 2012, 12:00 [IST]

ಕಡಲೆ ಬೇಳೆ ವಡೆ ಅಥವಾ ಅಂಬೊಡೆಯನ್ನು ತಿಂಡಿಯಾಗಿ ತಿನ್ನಬಹುದು, ಅನ್ನದ ಜೊತೆಯೂ ತಿನ್ನಬಹುದು. ತಿನ್ನಲು ತುಂಬಾ ರುಚಿಕರವಾಗಿರುವ ಈ ತಿಂಡಿಯನ್ನು ತಯಾರಿಸಲು ಸ್ವಲ್ಪ ಅಡುಗೆ ಕೌಶಲ್ಯ ಬಳಸಿದರೆ ಸಾಕು. ಆ ಅಡುಗೆ ಕೌಶಲ್ಯ ಬಗ್ಗೆ ತಿಳಿಯಲು ಮುಂದೆ ಓದಿ.

ಬೇಕಾಗುವ ಸಾಮಗ್ರಿಗಳು:

* ಕಡಲೆಬೇಳೆ ಒಂದು ಕಪ್
* ಹಸಿಮೆಣಸಿನಕಾಯಿ 5-6
* ಒಂದು ಚಕ್ಕೆ ಮತ್ತು ಒಂದು ಲವಂಗ
* ಒಂದು ಇಂಚು ದೊಡ್ಡದಿರುವ ಶುಂಠಿ
* ಸ್ವಲ್ಪ ಕೊತ್ತಂಬರಿ ಸೊಪ್ಪು
* ಸಣ್ಣಗೆ ಹೆಚ್ಚಿದ ಈರುಳ್ಳಿ 2
* ಹೆಚ್ಚಿದ ಸಬ್ಬಸ್ಸಿಗೆ ಸೊಪ್ಪು
* ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:

1. ಕಡಲೆ ಬೇಳೆಯನ್ನು 3-4 ಗಂಟೆ ನೆನೆ ಹಾಕಬೇಕು.

2. ನಂತರ ಅದರ ನೀರು ಸೋಸಿಕೊಂಡು ಅದಕ್ಕೆ ಹಸಿಮೆಣಸಿನಕಾಯಿ, ಚೆಕ್ಕೆ, ಲವಂಗ, ಶುಂಠಿ, ಉಪ್ಪು ಮತ್ತು ಕೊತ್ತಂಬರಿಸೊಪ್ಪು ಹಾಕಿ ಗಟ್ಟಿಯಾಗಿ ಮತ್ತು ತರಿತರಿಯಾಗಿ ರುಬ್ಬಿಕೊಳ್ಳಬೇಕು.

3. ಈ ರುಬ್ಬಿದ ಮಿಶ್ರಣಕ್ಕೆ ಸಣ್ಣಗೆ ಹೆಚ್ಚಿದ ಈರುಳ್ಳಿ ಮತ್ತು ಹೆಚ್ಚಿದ ಸಬ್ಬಸ್ಸಿಗೆ ಸೊಪ್ಪನ್ನು ಹಾಕಿ ಚೆನ್ನಾಗಿ ಬೆರೆಸಬೇಕು. ರುಬ್ಬಿದ ಮಿಶ್ರಣದ ಜೊತೆ ಈ ಮಿಶ್ರಣಗಳನ್ನು ಹಾಕಿ ಕಲೆಸುವಾಗ ನೀರು ಹಾಕಬಾರದು. ಸೊಪ್ಪಿನಲ್ಲಿ ನೀರಿನ ಅಂಶ ಇರುವುದರಿಂದ ಅದೇ ಸಾಕಾಗುತ್ತದೆ.

4. ಚೆನ್ನಾಗಿ ಕಲೆಸಿದ ಮೇಲೆ ಸಣ್ಣ ಸಣ್ಣ ಉಂಡೆ ಮಾಡಿಕೊಂಡು ಒಂದು ತಟ್ಟೆಯಲ್ಲಿ ಇಡಬೇಕು.

5. ಈಗ ಬಾಣಲೆಯಲ್ಲಿ ಅರ್ಧದಷ್ಟು ಎಣ್ಣೆ ಹಾಕಿ, ಎಣ್ಣೆಯನ್ನು ಕುದಿಸಬೇಕು.

6. ಈಗ ಉಂಡೆಯನ್ನು ಚಪ್ಪಟೆಯಾಗಿ, ದಪ್ಪವಾಗಿ ತಟ್ಟಿಕೊಂಡು ಕುದಿಯುತ್ತಿರುವ ಎಣ್ಣೆಯಲ್ಲಿ ಒಂದೊಂದಾಗಿ ಹಾಕಿ, ಬೇಯಿಸಿ. ಎಣ್ಣೆಗೆ ಹಾಕಿದ ತಕ್ಷಣ ಅಲ್ಲಾಡಿಸಬೇಡಿ. ವಡೆಯ ಬಣ್ಣ ಸ್ವಲ್ಪ ಬದಲಾದ ನಂತರ ತಿರುವಿ ಹಾಕಿ, ವಡೆ ಕಂದು ಬಣ್ಣ ಬರುವವರೆಗೂ ಬೇಯಿಸಿದರೆ ರುಚಿಕರವಾದ ಅಂಬೊಡೆ ರೆಡಿ.

ಇದನ್ನು ಬಿಸಿಬಿಸಿಯಾಗಿ ತಿನ್ನಬಹುದು, ತಣ್ಣಗೆ ಆದ ಮೇಲೂ ತಿನ್ನಬಹುದು. ಆದರೆ ಒಂದು ದಿನದ ಮೇಲೆ ಇಟ್ಟರೆ ವಡೆ ಹಾಳಾಗಬಹುದು. ಆದ್ದರಿಂದ ಎಷ್ಟು ಅಗತ್ಯವಿದೆಯೊ ಅಷ್ಟು ವಡೆ ಮಾತ್ರ ಮಾಡಿಕೊಳ್ಳಬೇಕು.