ಇಡ್ಲಿ ಮತ್ತು ಕ್ಯಾರೆಟ್‌ನ ಸ್ವಾದಿಷ್ಟಕರ ಉಪ್ಪಿಟ್ಟು

Snacks

oi-Reena

By Hema S

Published: Wednesday, June 13, 2012, 11:53 [IST]

ಬೆಳಗ್ಗೆ ರುಚಿಯಾದ ಇಡ್ಲಿ ಮಾಡಿರುತ್ತೀರಾ. ಆದರೆ ಮಾಡಿದ ಎಲ್ಲಾ ಇಡ್ಲಿ ಖಾಲಿಯಾಗದೆ ಬಾಕಿ ಉಳಿದಿರುತ್ತದೆ. ಲಂಚ್ ಅಥವಾ ಸಾಯಾಂಕಾಲ ಅದನ್ನೇ ತಿನ್ನಲು ಮನೆಯಲ್ಲಿ ಯಾರೂ ಇಷ್ಟಪಡುವುದಿಲ್ಲ. ಅಕ್ಕಿ ಬೆಲೆಗೆ ಇಡ್ಲಿ ಬಿಸಾಡಲು ಮನಸ್ಸು ಬರುವುದಿಲ್ಲ. ಆದರೆ ಯಾರೂ ತಿನ್ನದಿದ್ದ ಮೇಲೆ ಸುಮ್ಮನೆ ಬಿಸಾಡಬೇಕಾಗುತ್ತದೆ. ಆದ್ದರೆ ಇದೇ ಇಡ್ಲಿಯಿಂದ ಸಾಯಾಂಕಾಲದ ತಿಂಡಿಗೆ ರುಚಿಕರವಾದ ಉಪ್ಪಿಟ್ಟು ಮಾಡಿ ತಿನ್ನಬಹುದಾಗಿದೆ.

ಶಾಲೆಯಿಂದ ಮಕ್ಕಳು ಹೊಟ್ಟೆ ಹಸಿದು ಬಂದಾಗ ಈ ರೀತಿ ಮಾಡಿಕೊಟ್ಟರೆ ಹೊಟ್ಟೆಯೂ ತುಂಬುವುದು ಮತ್ತು ಇದರ ರುಚಿ ಎಲ್ಲರಿಗೆ ಇಷ್ಟವಾಗುತ್ತದೆ. ಇದನ್ನು ತಯಾರಿಸುವ ವಿಧಾನ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು:

* 8-10 ಇಡ್ಲಿ
* 2-3 ಹಸಿಮೆಣಸಿನ ಕಾಯಿ (ಕತ್ತರಿಸಿದ್ದು)
* ಸಾಸಿವೆ
* ಒಂದು ಕತ್ತರಿಸಿದ ಈರುಳ್ಳಿ
* ಒಂದು ತುರಿದ ಕ್ಯಾರೆಟ್
* ಸ್ವಲ್ಪ ಕೊತ್ತಂಬರಿ ಸೊಪ್ಪು
* 1/4 ಚಮಚ ಅರಿಶಿಣ ಪುಡಿ
* 1/2 ಚಮಚ ಕೆಂಪು ಮೆಣಸಿನ ಪುಡಿ'
* ಚಿಟಿಕೆಯಷ್ಟು ಗರಂ ಮಸಾಲ ಪುಡಿ
* 1/4 ಚಮಚ ಮೆಂತೆ ಕಾಳು ಅಥವಾ ಸ್ವಲ್ಪ ಮೆಂತೆ ಸೊಪ್ಪು
* ಒಂದು ಟೊಮೆಟೊ (ಕತ್ತರಿಸಿದ್ದು)
* ಸ್ವಲ್ಪ ತುರಿದ ತೆಂಗಿನ ಕಾಯಿ
* ರುಚಿಗೆ ತಕ್ಕ ಉಪ್ಪು
* ಸ್ವಲ್ಪ ಕರಿಬೇವಿನ ಎಲೆ

ತಯಾರಿಸುವ ವಿಧಾನ:

1. ಇಡ್ಲಿಯನ್ನು ಕೈಯಿಂದ ಹಿಸುಕಿ ಪುಡಿಪುಡಿ ಮಾಡಬೇಕು.

2. ಈಗ ಬಾಣಲೆಯನ್ನು ಬಿಸಿಮಾಡಿ ಅದಕ್ಕೆ ಸ್ವಲ್ಪ ಎಣ್ಣೆ ಹಾಕಿ ಬಿಸಿ ಮಾಡಬೇಕು. ಅದಕ್ಕೆ ಸಾಸಿವೆ ಹಾಕಿ, ಸಾಸಿವೆ ಚಟಾಪಟ ಶಬ್ದ ಬರುವಾಗ ಕತ್ತರಿಸಿದ ಈರುಳ್ಳಿ, ಹಸಿಮೆಣಸಿನ ಕಾಯಿ ಮತ್ತು ಟೊಮೆಟೊ ಹಾಕಬೇಕು.

3. ಈರುಳ್ಳಿ ಕಂದು ಬಣ್ಣ ಬರುವವರೆಗೆ ಮತ್ತು ಟೊಮೆಟೊ ಮೆತ್ತಗಾಗುವವರೆಗೆ ಚೆನ್ನಾಗಿ ಹುರಿಯಬೇಕು. ನಂತರ ಸೌಟ್ ನಿಂದ ಕುಟ್ಟಿ ಟೊಮೆಟೊವನ್ನು ಪೇಸ್ಟ್ ರೀತಿ ಮಾಡಬೇಕು.

4. ಈಗ ಮೆಂತೆ ಕಾಳು ಅಥವಾ ಮೆಂತೆ ಸೊಪ್ಪು, ಕರಿಬೇವಿನ ಎಲೆ ಹಾಕಿ ನಂತರ , ಚಿಟಿಕೆಯಷ್ಟು ಗರಂ ಮಸಾಲ, ತುರಿದ ಕ್ಯಾರೆಟ್ ,ರುಚಿಗೆ ತಕ್ಕ ಉಪ್ಪು ಹಾಕಿ ಮಿಶ್ರ ಮಾಡಿದರೆ ಗೊಜ್ಜು ರೀತಿಯಾಗುತ್ತದೆ. ಬೇಕಿದ್ದರೆ 1/4 ಗ್ಲಾಸ್ ಸ್ವಲ್ಪ ನೀರು ಹಾಕಬಹುದು.

5. ಇದಕ್ಕೆ ಪುಡಿ ಮಾಡಿದ ಇಡ್ಲಿ ಹಾಕಿ ಹಾಕಿ ಮಿಶ್ರ ಮಾಡಿ ತೆಂಗಿನ ತುರಿ ಹಾಕಿ 3-4 ನಿಮಿಷ ಬಿಸಿ ಮಾಡಿದರೆ ರುಚಿಕರವಾದ ಇಡ್ಲಿ ಉಪ್ಪಿಟ್ಟು ರೆಡಿ. ನಂತರ ಕತ್ತರಿಸಿದ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಬೇಕು.